Дунё, янгиликлар: Муҳаммад Мурсийнинг ўлими Мисрни нега қийин вазиятга солиб қўйди?

Мурсий ўлими ортидан Миср ҳукуматига халқаро босим кучаймоқда

Мисрнинг собиқ президенти Муҳаммад Мурсий душанба куни суд жараёни вақтида хушидан кетиб, оламдан ўтгани хабар қилинган эди. Мамлакатнинг жорий ҳукумати собиқ президент ўлимига юрак хуружи сабаб бўлганини маълум қилган.

Бироқ Amnesty International ташкилоти жаноб Мурсий ўлимининг «холис, ҳар томонлама ва шаффоф» ўрганиб чиқилишига чақирган.

Оила аъзолари ва фаоллар ҳибсдаги кўп вақтини ёлғизликда ўтказган 67 ёшли собиқ президентнинг саломатлиги юзасидан хавотирларни ўртага ташлаган.

"Собиқ президент Мурсийнинг ўлимига ҳукуматнинг йиллар давомида кўрсатган ёмон муносабати, узоқ вақт ёлғиз ҳибсда сақлаш, талабга жавоб бермайдиган тиббий кўмак ва оила аъзолари ҳамда адвокатлар билан кўришишдан маҳрум қилиниш сабабдир," дея ёзган Human Rights Watch ташкилоти вакиласи Сара Ли Витсон.

Ташкилот, шунингдек, БМТни "Мисрда давом этаётган инсон ҳуқуқларининг мислсиз поймол этилиши, жумладан, қамоқхоналарда кенг тарқалган ноинсоний муносабат"ни текширишга даъват этган.

Amnesty International ташкилоти эса жаноб Мурсийнинг деярли олти йил ичида оила аъзолари билан атиги уч марта кўришишига рухсат берилгани ва шифокор ҳамда адвокат хизматларидан фойдаланишдан маҳрум этилганини таъкидлаган.

Муҳаммад Мурсий сешанба куни эрта тонгда Қоҳира яқинида дафн этилгани, маросимда бир неча оила аъзоларигина иштирок этгани хабар қилинмоқда.

Унинг ўғли Абдуллоҳ Муҳаммад Мурсий отасининг дафн маросимини ўз она шаҳрида оммавий тарзда ўтказиш сўрови Миср ҳукумати томонидан рад этилгани тўғрисида сўзлаган.

Ҳозирда Мисрда тақиққа учраган Мусулмон Биродарлар ҳаракатининг энг кўзга кўринган етакчиларидан бўлган Муҳаммад Мурсий Ҳусни Муборакнинг узоқ йиллик қаттиққўл бошқаруви ортидан, 2012 йилда, ҳокимиятга келиб, мамлакатнинг демократик тарзда сайланган илк президентига айланган эди.

Орадан бир йил ўтгач, оммавий намойишлар дастагини олган Абдул Фаттоҳ ал-Сиси бошчилигидаги ҳарбийлар уни ҳокимиятдан ағдариб ташлаган.

АҚШ Яқин Шарққа яна қўшин жўнатмоқчи

Мамлакат мудофаа вазири Патрик Шенаҳан Эроннинг «душманона хатти-ҳаракатлари»га қарши туриш мақсадида минтақага қўшимча 1,000 нафар аскар юборилишини маълум қилди.

Баёнотда жаноб Шенаҳан «Америка Қўшма Штатлари Эрон билан зиддиятга боришни истамаслиги», аммо «миллий манфаатларни муҳофаза қилиш йўлида бутун минтақа бўйлаб меҳнат қилаётган ҳарбий хизматчилар хавфсизлигини таъминлаш» учун шундай қарор олинганини айтган.

Аввалроқ АҚШ армияси Уммон Кўрфазида нефть ташувчи танкерларга уюштирилган ҳужумларга Эроннинг алоқадорлигидан дарак берувчи видео тасвир ва суратларни эълон қилган эди.

Бундай иддаоларга жавобан Эрон 27 июнга қадар бойитилган уран захирасини ошириб, мамлакат ядро дастури бўйича 2015 йилда эришилган халқаро шартномада белгиланган чекловни ҳатлаб ўтажагини таъкидлаган.

Ҳозирча, АҚШ қўшинлари минтақанинг айнан қайси нуқтасига юборилиши ошкор этилмаган.

Хитой раҳбари Ш Кореяга илк бор ташриф буюради

Хитой президенти Си Жингпинг пайшанба куни Шимолий Кореяга икки кунлик ташриф билан бориши хабар қилинди.

Жаноб Си Шимолий Корея раҳбари Ким Чен Ин билан Корея яриморолида мавжуд муаммоларни муҳокама этиши кутилмоқда.

Шу тариқа 2012 йилда ҳокимиятга келган Си Жингпинг сўнгги 14 йил ичида Шимолий Кореяга борган илк Хитой раҳбарига айланмоқда.

Сўнгги бор Хитой собиқ раҳбари Ху Зинтао 2005 йилда Пхенянга борган эди.

Шимолий Корея раҳбари жаноб Ким Хитойга аллақачон тўрт бор ташриф билан келган.

Жаноб Сининг ташрифи расмий Пекин ядро синовлари учун БМТ томонидан Шимолий Кореяга қарши жорий этган айрим санкцияларни дастаклаши ортидан ташкил этилмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek