"Каримовага қарши айбловлар сиёсийдир" - Лондондаги воиз

Сурат тагсўзи, Гулнора Каримовага боғлиқ деб кўрилган терговлар 10дан ортиқ давлатларни қамраб олган

15 июл 2014

Гулнора Каримованинг яқин шериклари Рустам Мадумаров ва Гаянэ Авакянларнинг Ўзбекистонда ҳукм қилингани борасидаги хабарлар манзарасида, Каримова хонимнинг оиласи воизи эканини айтган шахс Гулнора Каримованинг Оврўподаги порахўрлик ва пул ювиш ишларига алоқаси борлигини рад қилган.

EurasiaNet.org хабар агентлиги электрон почта орқали олган мактубда бу воиз: "Гулнора Каримовага қарши қилинган иддаоларни асослаб бериш учун ҳеч қандай далил-исбот йўқ", деб ёзади.

EurasiaNet.org хабар агентлигига кўра, бу шахс Лондонда жойлашган таниқли пиар ширкати ходими бўлиб, ўз исми-шарифи ва ширкат номи сир тутилишини илтимос қилган.

Би-би-си мақоланинг муаллифи Жоанна Лиллисга боғланганида, Лиллис хоним айни ширкатнинг Лондонда жойлашгани ва воиз ҳақиқатдан ҳам шу ширкатнинг ходими эканини тасдиқлади.

Воиз Тошкентдаги суд ишларига Гулнора Каримованинг қандай алоқаси борлиги ё йўқлиги ҳақида бирон баёнот қилмаган.

"Бироқ, унинг Ўзбекистон президентига қандай алоқаси борлиги назарда тутилса, 2015 йилда бўлиб ўтиши режаланган (президентлик) сайловлардан олдин Гулнора Каримовага қарши қилинаётган иддаолар сиёсий экани эҳтимолини назарда қочирмаслик керак", - деб айтган воиз.

Би-би-си билан суҳбатлашган швециялик терговчи-журналист Фредрик Лоринга кўра, Каримова хоним ва унинг шерикларига боғлиқликдаги коррупция тергов ишлари доираси кенгаймоқда.

"Ҳозирда швециялик прокурорлар ўн ва ҳатто ундан ортиқ давлатларнинг расмийлари билан яқин ҳамкорликда иш олиб боришаяпти", - деб айтган жаноб Лорин.

Skip Энг кўп ўқилган and continue reading

Энг кўп ўқилган