Екатеринбургда ўзбекистонлик олти муҳожир ёнғинда ҳалок бўлган
Сурат манбаси, Reuters
Россия интернет нашрларининг Свердловск вилояти Ички Ишлар бошқармасига иқтибосан хабар қилишича, Екатеринбургда 18 май тунги соат учларда юз берган ёнғинда ўзбекистонлик олти меҳнат муҳожири нобуд бўлган. Яна бир киши оғир жароҳатлар билан касалхонага ётқизилган.
Суриштирув хизматига кўра, ёнғин атайлаб уюштирилган бўлиши эҳтимоли ҳам йўқ эмас.
Баъзи хабарларга қараганда, кўча эшик ташқаридан ёпилгани боис меҳнат муҳожирлари ташқарига чиқа олмаганлар.
Жиноий қидирув бўлими ёнғин атайлаб уюштирилгани версиясини ўрганмоқда. Шунингдек ҳалок бўлганларнинг шахслари аниқланмоқда.
Гувоҳлар ёнғин жуда тез бошлангани ва томдаги ёғочлар қулаб тушганини айтишган.
Ёнғин содир бўлган уй Екатеринбургдаги қурилиш ширкатига тегишли бўлган. Меҳнат муҳожирлари шу ерда яшаб, меҳнат қилганлар.
Россияда меҳнат қилаётган кўплаб марказий осиёлик муҳожирлар хавфсизлик қоидалари эътиборга олинмаган биноларда яшаб келишлари айтилади.
Екатеринбургда ўзбекистонлик муҳожирлар билан фожеага айнан нима сабаб бўлгани ҳозирча маълум эмас.
Ҳодиса юзасидан жиноий иш очилган.
Би-би-си Ўзбек хизмати билан Whatsapp орқали боғланишни истасангиз, телефонимиз: +44 7858 860002
