Гулнора Каримова Тошкентдаги ҳибсларни 1938 йилга қиёслади
Гулнора Каримованинг Twitterда ёзишича, "Фонд Форум" ташкил қилган "Келажак овози" тадбири иштирокчиларидан бири бўлган қиз ҳибсга олинган.
Шундан кейин у туман Ички ишлар бўлимига борган.
"Мен РОВДдаман", дея твит қилган Ўзбекистон Президенти Ислом Каримовнинг қизи.
@DostonArtikov исмли фойдаланувчи ёзишича, "фаол бўлган ёшларни таъқиб қилмоқдалар".
Шундан кейин Гулнора Каримова ҳибсларни амалга ошираётганларга мурожаат қилган:
"Ақли ва юрагини йўқотмаган ҳаммага! Ёшларни синдириш мумкин эмас!!! Сизнинг келажагингизни ўчириб чизиб ташлашаяпти! Бу сизга кечқурун келиб уйидан ими-жимида олиб кетадиган 1938 йил эмас!", деб ёзган рус тилида Каримова хоним.
"Ақли соғлом ҳар бир киши тушунадики, мамлакатини, Президентни, унинг оиласини ер билан яксон қилаётганларни уйидан олиб кетаётганлари, таъқиб этаётганлари йўқ. Аксинча бутун мамлакатга қўрқув солиш ёки зиндонга ташлаш билан энг истеъдодлиларни йўқ қилишаяпти! Бунинг ҳаммаси нимага олиб келади? Фақат портлашлар ва қарама-қаршиликка", деб ёзган Гулнора Каримова.
Бунинг ортидан Каримова хоним ўзини Ўзбекистондан қўллаб-қувватлашмаётгани ҳақида твит қилган.
"Энг қизиғи, мени дастаклашларини изҳор қилиб лентага Россиядан, Қозоғистондан ёзишаяпти... Ўзбекистон эса ҳар доимгидек сукут сақлаяпти..."
Сўнг Тошкент шаҳридаги милиция бўлимларидан бирида эканини ёзган Гулнора Каримовага кўра, "Келажак овози" тадбирининг Интернет макони бўйича лойиҳаси иштирокчиларидан бири бўлган талаба қизни террорчилик айблови билан олиб кетганлар.
Талаба қизни "бемаъни Интернет жамияти" ташкил қилишда айблашаётгани ҳақида ёзган Гулнора Каримова.
"Келажак овози болаларини терроризм деган бошбошдоқлик бўйича ҳибсга олишган", деб ёзган Гулнора Каримова.
