Янгиликлар, Ўзбекистон: Аномал қиш ортидан аномал ёз O'zbekiston Dunyo Yangiliklar

Ҳали январдаги электр тақчиллиги кунлари Ўзбекистон ёзги жазирамалардаги электр истеъмоли ортишига тайёрланиши кераклиги ҳақидаги огоҳлантиришлар янграган эди.

Бу йил Ўзбекистонда ёз чилласи эрта бошлангани ва бу йилги чилла узоқ давом этиши хабар қилинмоқда.

Ҳали май ойидаёқ ҳаво ҳарорати +40 дан кўтарилди.

Республика гидрометереология хизмати ҳафтанинг дам олиш кунлари ҳарорат пасайиши ва 12 июндан бошланадиган ҳафтада яна пойтахт Тошкентда +41 даражагача кўтарилишини башорат қилаяпти.

Мамлакат жанубидаги Термиз шаҳрига Афғонистондан қум бўрони кузатилди.

Кундузи тунги чироқларни ёқишга тўғри келди.

Uzb_Meteo Телеграм канали ёзишича, Термиздаги бу чанг бўрони минтақада қурғоқчилик, чўллашиш жадал давом этаётганининг яна бир белгиси сифатида намоён бўлди.

Республика ҳудудида эса Ўзбекистон президентининг дарахтларни кесиш мораторийсига қарамасдан, кўп йиллик дарахтлар кесилиши давом этмоқда.

Электр таъминотини яхшилаш мақсадида мансабдорлар эълон қилаётган ҳисоботлар фақат қоғозда, деган таассурот уйғонади.

Таниқли блогер, иқтисодий таҳлилчи Отабек Бакиров Тошкентдаги қуёш панеллари ҳақидаги саволни ўртага қўйди:

"Кейинги 3 кунда пойтахтда қаерга бормай, айниқса қоқ марказда идора ва ташкилотларда дизель генераторларининг тариллаб ишлаб ётганига гувоҳ бўлмоқдаман. Ҳа, свет муаммосини 5 июнгача ҳал этишга 3,6 трлн.сўм пул ажратилган аномал пойтахтда свет катта муаммо, кўп ташкилотлар генераторлардан фойдаланишга мажбур бўлишмоқда.

Лекин мени ҳайрон қолдиргани генератор таррилатаётган шу ташкилотларнинг аксарига қуёш панеллари ўрнатилган ёки ўрнатилди, дея рапорт берилган.

Расман икки ҳафта аввал эълон қилинган ахборотда 107 мегаваттлик қуёш панеллари ўрнатилгани эълон қилинганди. Бу ижтимоий муассасалар ва давлат идораларида 2023 йилда ўрнатилиши мўлжалланган панелларнинг 50 фоизи деб айтилганди.

Ё бу шунчаки чиройли рақаммиди?

Ўрнатилган дейилган миллиард миллиард сўмлик панеллар ўзи қанча электр энергияси генерация қилмоқда? Ахир улар қуёш панеллари, айнан қуёш қизиган вақтда нагрузкани ўзларига олиши керак эмасми? Нега унда айнан кундузи гўёки таъмирлаш учун, дея бутун бошли районларда, мавзеларда, ўша панеллар ўрнатилган ҳудудларда свет ўчирилмоқда?

Пойтахтни тутган генераторларнинг шовқини ва ўрнатилган қуёш панеллари томон бир назар ташлаб қўйиш зиён қилмайди".

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002