Янгиликлар: Тошкент – Олма-ота самолёти кучли ҳаво гирдобига тушди, бир киши шифохонага ётқизилди Yangiliklar, O'zbekiston

Тошкентдан Олма-отага учган самолёт кучли ҳаво гирдоби (турбулентлик)га тушиб қолиши натижасида 5 киши жароҳат олган, улардан бири Ўзбекистон фуқароси бўлмиш аёл киши бўйин умуртқаси ёпиқ синиши ташхиси билан шифохонага ётқизилди.

Қозоғистон фуқаро авиация қўмитасининг хабар беришича, Қозоғистоннинг "Air Astana" авиакомпаниясига тегишли КС128 рейси Тошкентдан Олма отага учаётганда кули ҳаво гирдобига тушиб қолган.

Самолёт Тошкентдан маҳаллий вақт билан соат 14:35 да ҳавога кўтарилган.

"Дастлабки маълумотларга кўра, ҳодиса натижасида 5 киши зарар кўрган. Уларнинг 4 нафари турли лат ейиш ва куйиш ҳоллари кузатилган бўлса-да, шифохонага ётишдан бош тортди. Уларга биринчи тиббий ёрдам кўрсатилди. Ўзбекистон фуқароси аёл киши бўйин умуртқасининг ёпиқ синиши ташхиси билан касалхонага ётқизилди", дея қўмитадан иқтибос келтирган Tengrinews.kz сайти.

Самолёт Олма-отага соат 16:45 да қўнган. Парвоз экипаж аъзолари йўловчилар илк тиббий ёрдамни кўрсатган.

Учувчилар аэропорт хизматларига бўлиб ўтган воқеа ҳақида хабар берган. Олма-ота аэропортида йўловчиларни тез тиббий ёрдам машиналари кутиб олган.

"Парвоз йўловчиларига ҳар қандай ёрдам берилади. Содир бўлган ҳолат бзасидан ваколатли идоралар текширув олиб боради. Натижалар қўшимча тарзда хабар қилинади. Хавфсизлик нуқтаи назаридан парвоз давомида камарлар тақилган бўлиши кераклиги ҳақидаги тавсияни эслатамиз", деган Қозоғистон фуқаро авиация қўмитаси.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.