Украина: Ўзбеклар Путин аннексиясини ёқлашадими ёки қоралашади? Тошкент кўчаларидан муносабат. Видео Video Putin Rossiya Ukraina Yangiliklar

Ўзбеклар Путиннинг аннексиясини қўллайдими ёки қоралайди? Бутун дунё Путиннинг зиддиятли эълонини кутаётган бир вақтда Би-би-си Ўзбек хизмати ўзбекистонликларга ҳам микрофон тутди. Уларнинг бу ҳақдаги фикрлари билан қизиқди.

Ўзбекистон "Путин ва Россия билан бир оила"ми - Тошкент кўчаларидан муносабат:

Россия, йилларки, ўзбекистонликлар учун энг йирик меҳнат бозори вазифасини бажариб келади.

Ўзбекистондаги миллионлаб одамнинг тирикчилиги асосан Россиядан ортга юборилаётган пуллар ҳисобидан ўтади.

Россия, бундан ташқари, Ўзбекистоннинг энг йирик савдо-иқтисодий ҳамкори, стратегик шериги ва иттифоқчисидан биттаси саналади.

Ўзбекистон минтақанинг аҳолиси энг катта - сони расман 35 миллиондан ошувчи, улардан аксарияти чекка қишлоқ ҳудудларида яшовчи, бошқа томондан, ишсизлик ва камбағаллик ҳануз анчайин кенг тарқалган давлатларидан бири бўлади.

Расмий Тошкент шу йил март ойида Украина ҳудудий яхлитлиги ва суверенитетини тан олиши, Донбассдаги ўзини ўзи мустақил, деб эълон қилган республикаларни тан олмаслигини расман баён қилган.

Путин эса, бугун, 30 сентябрь куни зиддиятли аннексия жараёнини бошламоқчи, Донбассдан ташқари, Украинанинг яна икки вилоятини ҳам Россия таркибига қўшиб олмоқчи.

Россия президенти шу соатларда Херсон ва Запорожьенинг ҳам Украинадан мустақиллигини тан олган.

Донецк ва Луганск мустақиллигини эса, шу йил февраль ойида, Украинага уруш очиш арафасида расман эътироф этган.

Кечаётган ойда ўзи тўлиқ босиб олмаган эса-да, бу тўрт минтақада зиддиятли ва халқаро нормаларга зид референдумлар ҳам ўтказган.

Худди шу референдумлар натижалари асосида энди расман уларнинг аннексияси жараёнига йўл очган.

Шу бугун Ўзбекистон Ташқи ишлар вазирлиги Украинадаги вазият атрофида яна бир бор расман баёнот билан чиққан.

Расмий Тошкент ўз баёнотида халқаро меъёрларга зид референдумлар, унинг натижалари ва Россиянинг аннексия режасини тилга олмаган эса-да, Ўзбекистон ўзининг ташқи сиёсатида тенг ҳуқуқлилик, суверенитет, ҳудудий яхлитликни ҳурмат қилиш каби устуворликка ҳам содиқ қолишини яна бир бор баён қилган.

Ўзбеклар-чи, улар Путиннинг зиддиятли аннексияси борасида нима деб ўйлашади?

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek