Россияда вазият кескин ёмонлашди – Ўзбекистон қўрқиши керакми? Rossiya Putin O‘zbekiston dunyo yangiliklar

Россия ковидни жиловлолмаяпти. Ҳозир Европадаги вазияти энг оғир иккита давлатдан биттасига айланган. Бугун илк бор кундалик кўрсаткичлар 40 мингдан ошган. Сўнгги воқеълик Ўзбекистон ва Россия ўртасида миграция алоқалари кучаяётган ва мунтазам парвозлар қайта фаоллашаётган бир пайтга тўғри келмоқда.

Маҳаллий масъулларга кўра, беморлар сони олдинги ковид тўлқинига қараганда кўп, шифохоналар тўлиб кетган, уларнинг аксари эмланмаган одамлар.

Коронавирус ўчоғи бўлиб келаётган пойтахт Московда қисман карантин тартиби амалда.

Шаҳарда фақат муҳим озиқ-овқат дўконлари ва дорихоналарнинг фаолиятига рухсат берилган, холос.

Асосий темир йўл бекатларида яна дезинфекция ишлари амалга оширилмоқда.

Президент Путин шанбадан мамлакат бўйлаб иш жойларини ёпишга фармон берган.

Бироқ аксар россияликлар тўланган таътилдан саёҳат мақсадида фойдаланишга қарор қилган кўринишади.

Сўнгги сўровга кўра, мамлакат аҳолисининг учдан бири иш жойлари ёпилган кунлари саёҳатни режалаштирганлар.

Россия Ўзбекистон фуқаролари учун энг йирик меҳнат бозори бўлади.

Йилларки, миллионлаб ўзбекистонлик айнан Россияда меҳнат қилиб, ортда қолган оиласини боқиб келади.

Коронавируснинг илк тўлқини ўтган йили Россиядаги ўзбекистонлик мигрантларни ҳам жуда оғир аҳволда қолдирган.

Улардан юз минглаби турли йўллар билан ортга - Ўзбекистонга ҳам қайтишга мажбур бўлишган.

Аммо ковиднинг энг ҳалокатлиси экани айтилаётган ҳозирги - учинчи тўлқини яна минглаб ўзбекистонлик ишлаш учун Россияга келган ва келаётган бир пайтга тўғри келган.

Сўнгги ҳафталарда Россияда ковидга чалиниш ва ундан ўлим ҳоллари мамлакатнинг пандемия тарихида кузатилмаган бир даражага етган.

Кунига коронавирус юқтираётганлар сони бугун илк бор 40 мингдан ошган, мингдан зиёд ўлим ҳоллари қайд қилина бошланган, антирекордлар устма-уст янгиланган.

Мустақил экспертлар, ҳатто шунда ҳам, россиялик масъуллар келтираётган расмий рақамларга ишонқирамай қарашади.

Россиядаги ковид билан боғлиқ вазият ҳатто якшанба кунги президент сайлови арафасида ҳам ўзбекистонликларни ўйлантирган муҳим мавзулардан бири экани англашилган.

Санитария-эпидемиологик осойишталик ва жамоат саломатлиги хизмати бошлиғи Баҳодир Юсупалиев бу ҳақда 23 октябрь куни Марказий сайлов комиссиясида бўлиб ўтган матбуот анжумани чоғида хосан тўхталиб ўтган.

У Россиядаги кескинлашиб бораётган аҳвол Ўзбекистонда ҳам касалланиш ҳолати ортиши эҳтимолини пайдо қилишини инкор этмаган.

Аммо ўзбекистонлик масъул "чегараларда назорат ҳар қачонгидан ҳам кучайтирилгани, Ўзбекистонга 72 соатлик ПЗР тести топширилган ҳолдагина четдан кириш мумкинлиги, борди-ю, фуқароларда тест бўлмаганда, чегарада экспресс-тест топширилиши"ни таъкидлаб ўтган.

"Бугунги кунда ҳеч қанақа локдаун ҳақида гап бўлиши мумкин эмаслиги ва барча ҳаракатлар шунга қаратилгани"ни баён қилганди.

Баҳодир Юсупалиевга, ўз навбатида, локдаунни олдини олишнинг яна бир йўли - жамоавий иммунитетни шакллантириш эканини ҳам айтган.

Бунинг энг самарали усули оммавий эмлаш эканига тўхталган.

Агар Ўзбекистон аҳолисининг камида 60 фоизини эмлай олишса, жамоавий иммунитетни шакллантирган бўлишлари, шунда ўзларига ҳеч қандай локдаун хавф сола олмаслигини таъкидлаган.

Унга кўра, Ўзбекистонда ҳозирга келиб, эмланиши лозим бўлган 21 миллион нафардан ошиқ аҳолининг 13 миллион нафари биринчи доза вакциналарини олиб улгурган.

Россия, коронавирус ва ўзбекистонликлар

Россия жорий пайтда дунёнинг коронавирус энг кўп тарқалган бешта давлатидан биттаси бўлади.

Мамлакатда шу пайтгача ковидга чалинганларнинг жами сони 8 миллиондан ортган.

Уларнинг чорак миллионга яқини ҳаётдан кўз юмган.

Бу Европада фақат Буюк Британиядан кейинги иккинчи энг ёмон кўрсатки бўлади.

Россия дунёнинг энг катта сондаги ўзбекистонликлар турли иш, юмуш ва таҳсилда банд давлати бўлади.

Глобал коронавирус пандемиясига қадар уларнинг сони расман икки миллиондан ортган, норасмий ҳисоб-китобларда эса, бундан бир неча баробар юқори экани ҳам айтилган.

Россияда ковидга чалинаётган ва ундан вафот этаётганларнинг аниқ қанчаси Ўзбекистон фуқаролари экани маълум эмас.

Ҳар икки томон ҳам бунга оид тўлиқ ва муфассал маълумотларни ҳалича расман очиқлашмаган.

Ўзбекистон томонининг Россиянинг йирик шаҳарларидаги бугунги ҳолат юзасидан ўз фуқароларига огоҳлик мурожаати билан чиққани ҳам ҳалича кўзга ташланмайди.

Россия аҳолисининг сони 146 миллион кишини ташкил қилади.

Пандемияга қадар уларнинг 10 миллиондан ошиқроғи меҳнат муҳожирлари ҳисобига тўғри келган.

Сабаб ва оқибат

Россияда коронавирус билан боғлиқ вазият сентябрь ойида ёмонлашишни бошлаган, октябрга келиб янада оғирлашган.

Масъуллар сўнгги вазият сабабини вакцинация жараёнининг секин кечаётгани билан изоҳлашган.

Улар бу хусусда охир бир неча ой ичида жиддий ташвиш билдириб келишган.

Худди шу каби бир вазиятда пойтахт Москва, Санкт-Петербург ва Россиянинг яна айрим минтақаларида карантинга қайтилган.

Аммо бунинг ҳозирча қарийб икки ҳафталик тўланган дам олиш шаклида бўлиши айтилган.

Бошқалари эса, яна айрим чеклов чораларини қайта тиклашган, аллақачон уларни кучайтиришга ҳам киришишган.

Москва ва Россиянинг бошқа минтақаларида ҳам коронавирусга қарши эмлаш мажбурий қилинган ва қилинмоқда.

Одамларни турли йўллар билан бунга рағбатлантиришгача боришгани кўрилган.

Россия дунёнинг коронавирусга қарши бешта вакцина яратиб, уларни расман қайддан ўтказган саноқли давлатларидан бири бўлади.

Россияда тарқалаётган коронавирус турлари геномининг таҳлили апрель ойидан буён "дельта"сининг бошқаларини сиқиб чиқараётганини кўрсатган.

Айрим маҳаллий экспертлар ўзларининг эътироф этишларича эса, коронавируснинг жорий тўлқини Россияда энг оғири бўлади.

Жумладан, инфекционист Евгений Тимаковнинг ТАСС ахборот агентлигига айтишича, ковид билан боғлиқ ҳозирги вазият фақат декабрь ойи ўрталарига борибгина барқарорлашиши мумкин.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek