Ўзбекистон: Мирзиёев Каримов даврини қандай тилга олди ва жиззахлик аёл уч эркак томонидан зўрлангани хабар қилинди – янгиликлар O‘zbekiston mintaqa dunyo yangiliklar

  • Мирзиёев Каримов даврини тилга олди;
  • Депутат Кушербаев яна бир тақиқни танқидга тутди;
  • Жиззахлик аёл уч эркак томонидан зўрланганини иддао қилди;
  • Ўзбекистонга яна Спутник V вакцинаси келтирилди;
  • Кунлик коронавирус ҳолатларида илк пасайиш кузатилди;

"Ўтган даврни ёмонламаймиз"

30 август куни Шавкат Мирзиёев Мустақилликнинг 30 йиллиги муносабати билан мукофотланган бир гуруҳ ўзбекистонликларни фахрий унвон, орден ва медаллар билан тақдирлаш маросимида сўзга чиққан.

Ўз нутқи бошида у биринчи президент даврини тилга олиб ўтган.

"Вақт шиддат билан ўтяпти. Мустақиллик онларида туғилган фарзандларимиз бугун 30 ёшга киряпти.

Биринчи президентимиз томонидан амалга оширилган улкан ишлар бугун ёдимизда турибди. Биз ҳеч қачон ўтган даврдаги ишларни ёмонламаганмиз, келгусида ҳам бундай қилмаймиз", таъкидлаган амалдаги давлат раҳбари Кўксарой қароргоҳидаги байрамда.

Самолётнинг нимаси махфий?

Депутат Расул Кушербаев самолётларда суратга олишга қўйилган тақиқни "кулгили", деб атаган.

Ўзбекистонда 2016 йил январидан бошлаб йўловчиларга самолётлар парвозининг барча босқичларида сурат ва видеотасвирга олиш расман тақиқлаб қўйилган эди.

Кушербаев "ахборотлашган дунёда, ҳамма ёқда камералар бор вақтда йўловчи самолёти билан расм тушиш мумкинмаслиги" сабаби қизиқ эканини билдирган.

"Агар самолёт махфий бўлса унда нега ҳарбий эмас, оддий йўловчиларни ташимоқда (ахир улар самолётнинг иккита қаноти, сиртига байроқ тасвири туширилгани, ичида ўриндиқлар борлиги каби "ўта махфий маълумотлар"ни яқинларига айтиб бериши мумкинку), нега очиқ аэропортларга қўниб учиб юрибди, нега устига паранжи билан ёпилиб, кўздан пана қилинмаган?", дея саволларни илгари сурган Қонунчилик палатаси депутати.

Skip Энг кўп ўқилган and continue reading
Энг кўп ўқилган

End of Энг кўп ўқилган

Жиззахда зўравонлик

Жиззах шаҳрида ярим тунда кўчада юрган аёл уч нафар эркак томонидан зўрлангани борасида арз қилган.

"Постда" нашрининг ёзишича, эркаклар аёлни автоуловга мажбурлаб чиқариб, шаҳардаги маҳаллалардан бири ҳудудида зўрлаган ва жабрланувчининг телефони ҳамда пулини олиб қўйган.

Нашр тезкор қидирув натижасида бу ишга қўл уришда гумонланган шахслар топилиб, ҳибсга олинганини хабар қилган.

Яна Спутник келди

Ўзбекистонга яна Спутник V вакцинасининг 90 минг дозалик иккинчи компоненти келтирилди.

Бу ҳақда 30 август куни Соғлиқни сақлаш вазирлиги хабар берди.

Вазирлик, шу тариқа, мамлакатга келтирилган жами вакцина 17,9 миллион дозани ташкил этганини маълум қилган.

Ўтган вақт давомида Ўзбекистонга энг кўп келтирилган вакцина 13,5 миллион доза билан ZF-UZ-VAC2001 бўлган.

Бир ойда илк бор

ССВ 29 август куни 795 нафар инсонда коронавирус аниқланганини маълум қилган.

Шу тариқа ўтган бир ойдан зиёдроқ вақт давомида кунлик аниқланган коронавирус ҳолатлари сони илк бор 800 тадан пастга тушган.

26 июлдан буён мамлакатда кунига 800 нафардан ошиқ инсонда коронавирус аниқланиб келинаётган эди.

29 август ҳолатига кўра, ўтган вақт давомида коронавирус қайд этилган инсонларнинг умумий сони 155 минг нафардан зиёдни ташкил этиб, 1,075 бемор вафот этган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek