Туркияда вазият кескинлашди, Эрдўған жиддий хавотирдами? O‘zbekiston Turkiya dunyo koronavirus yangiliklar

Туркияда тўрт кун ичида 200 минг кишида коронавирус аниқланди.

Президент Эрдўған кеча, чоршанба куни яна баёнот билан чиқди ва карантин чораларининг бундан-да кучайтирилишини айтди.

Туркияда ўн минглаб ўзбекистонликлар ҳам яшашади, ишлашади, таҳсил олишади.

Коронавирус юқтираётган юз минглаб одам орасида ўзбекистонликлар бор-йўқлиги маълум эмас.

Бу ҳақда расмий маълумотлар ҳозирча имконсиз.

Туркияда коронавирусга чалиниш ҳоллари ҳамон ўта юқорилигича қолмоқда, янги ҳолатлар кунига 50 мингдан зиёдроқни ташкил этмоқда.

Аксариятнинг коронавируснинг "ўта юқумли" "британча штамми"га чалинаётгани айтилади.

Воқеаларнинг сўнгги ривожи мусулмонлар учун муқаддас Рамазон ойи билан бир пайтга тўғри келган.

Туркия ҳукумати сўнгги икки ҳафтанинг ўзида иккинчи бор карантин чораларини янада кучайтиришга қарор қилган.

Кеча, 14 апрель куни Туркия Вазирлар Маҳкамаси яна йиғилган, йиғилиш ортидан, президент Эрдўған матбуот анжумани берган.

Туркия раҳбари ўз чиқишида карантин чораларининг янада кучайтирилишини айтган.

Унга кўра, бунга сўнгги пайтларда, айниқса, йирик шаҳарларда коронавирус билан боғлиқ вазиятнинг ёмонлашиб бораётгани сабаб бўлган.

Ўтган бир ҳафта ичида кундалик касалликка чалиниш ҳоллари 50 мингдан пастга тушмаган.

Жами рақамлар 4 миллиондан ортган, Туркия жорий пайтда дунёнинг коронавирус энг кўп тарқалган ўнта давлатидан биттаси бўлади.

Шу пайтгача 34 мингдан ошиқ одам коронавирус сабаб ҳаётдан кўз юмган, уларнинг орасида ҳам Ўзбекистон фуқаролари бор-йўқлиги ноаёнлигича қолган, бу ҳақда ҳам расмий статистика ҳалича эълон қилинмаган.

Туркия президентининг айтишича, ҳозир Рамазон ойининг дастлабки икки ҳафтасида коронавирусга янгитдан чалиниш ва ундан ўлим ҳолларини жиддий камайтиришни мақсад қилишган.

Аммо Эрдўған бунга муваффақ бўлишмаса, чораларнинг бундан-да кескинлаштирилиши билан огоҳлантирган.

Қаттиқ чоралар эса, кўчага чиқишни тақиқловчи тўлиқ карантинни англатиши мумкин.

Кеча, чоршанба куни Туркия ички ишлар вазирлиги кучайтирилган янги чораларни очиқлаган.

Вазирлик баёнотидан комендантлик соати узайтирилгани, шаҳарлараро борди-келди тақиқлангани, спорт заллари ва сузиш ҳавзалари ёпилгани, тўйлар ўтказилиши маън этилгани ва мактабларнинг яна онлайн таълимга қайтиши маълум бўлган.

Бунга қўшимча, жамоат транспорти сиғими нақ тенг ярмига қисқартирилган, 65 ёшдан ошганларга фақат эрталаб соат 10:00 дан тушки 14:00 гача кўчага чиқишлари мумкинлиги айтилган.

Чекловлар Туркиянинг барча вилоятларида бирдек кучайтирилган, коронавирус билан боғлиқ вазият нисбатан барқарор бўлганлари ҳам бундан бир четда қолмаган.

Туркияда ҳали Рамазон ойи арафасидаёқ оммавий ифторликлар ва Таровеҳ намозларини жамоат бўлиб ўқиш тақиқланган.

Кўча-куйда ўтириб овқатланишнинг мумкин эмаслиги айтилган, емакхоналарнинг фаолияти чекланган.

Дам олиш кунларида тўлиқ комендантлик режимига ўтилган, қисман амалда бўлгани ҳам бекор қилинмаган.

Туркиянинг 81 та вилоятидан 58 таси ҳозир "қизил" ёки "ўта хавфли ҳудудлар" сирасига киритилган.

Уларнинг орасида ўзбекистонликлар энг кўп сонда яшаши айтилувчи пойтахт Анқара ва Истанбул ҳам бор.

Бу вилоятлар ҳиссасига Туркия аҳолисининг 80 фоизи тўғри келади.

Президент Эрдўған ўтган ой охирида қилган чиқишида хавф даражасига қараб, ҳудудлар харитаси ҳар ҳафта янгиланиши, чораларнинг ҳам шунга мувофиқ ўзгартириб борилишини билдирган.

Туркия ҳукуматининг сўнгги қарори манзарасида ўзбекистонлик масъулларнинг у ерда бўлган ва ёки бориш истагидаги фуқароларига бирор бир огоҳлик билан чиққани ҳозирча кўзга ташланмаган.

Туркия дунёнинг Ўзбекистон мунтазам ва фаол ҳаво қатновларини қайта тиклаган саноқли давлатларидан бири бўлади.

Кўп сондаги сондаги ўзбекистонликлар, йилларки, тижорат ва саёҳат илинжида ҳам айнан Туркияга боришни афзал билиб келишади, ўзларига эп кўра олишади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek