Путин обрўсизландими – Россия ва сиёсат, Rossiya, Navalniy, Putin, O‘zbekiston, dunyo, yangiliklar

Путин обрўсизландими - Россияда ўтказилган янги сўров натижалари худди шу нарсага далолат қилмоқда. Сўров муаллифларига кўра, бунақаси бу яқин ўртада кузатилмаган. Путинга ишонч ҳам камайиб бораётгани кўрилган.

Сўров натижалари мухолифат лидери Алексей Навальнийнинг навбатдаги коррупцион суриштируви, Россия устма-уст саҳна бўлган ва сўнгги йилларда мамлакат учун мисли кўрилмаган бўлгани айтилаётган йирик оммавий намойишлар ортидан эълон қилинган.

Намойишлар бутун Россияни қамраб олган ва Путин ашаддий танқидчиси Алексей Навальнийни зудлик билан озод қилиш, коррупцияга чек қўйиш талаби билан ўтказилган.

Сўнгги сўров натижаларига таянилса, Путиннинг обрўси энг кўп Россия ёшлари орасида тушган.

18-24 ёшлиларнинг тенг ярмига яқини Россиянинг амалдаги президенти фаолиятини маъқулламасликларини билдиришган.

Бу каби кўрсаткич шу йил январь ойида қайд қилинган.

Сўров муаллифларига кўра, бунақаси ўз фаолиятлари давомида кузатилмаган.

Агар, қиёс учун олинса, ўтган йил бу рақамлар 30 фоизни ташкил этган.

Бунга Россиядаги етакчи "Левада" омма фикрини ўрганиш марказининг сўрови натижалари далолат қилган.

Айнан ёшлар Россиядаги сўнгги оммавий намойишларни ҳаракатга келтирувчи куч сифатида кўрилмоқда.

Ёшлар назарда тутилмаганда ҳам, умуман Россия президенти фаолиятини маъқулламаётганлар сони ортгани кузатилган.

2019 йилда бу рақамлар 68 фоизни ташкил этган бўлса, ҳозирга келиб, тўрт фоизга камайган.

Путиннинг бугунги обрўси Россияда адолатли сайловлар ва унинг қайта президент этиб сайланишига қарши митинглар кечган 2011-2013 йилдагиси билан тенг бўлиб чиққан.

Ўз ўрнида, яна бир муҳим кўрсаткич - президентга бўлган ишонч ҳам пасайиб бораётгани маълум бўлган.

Ўтган йил октябрь ойида респондентларнинг 34% фоизи Путинга ишонган.

Ҳозир, яъни бир неча ойнинг ўзида бу кўрсаткич 29 фоизга тушган.

Алексей Навальнийга ишонч ҳануз анчайин паст эса-да, айнан бу йилга келиб, бироз кучайган.

Россияда "Левада" маркази "чет эл жосуси вазифасини бажарувчи ташкилот" сирасига киритилган.

Сўров иштирокчиларининг 49 фоизи наздида Россия тўғри йўлдан кетмоқда.

Мамлакат янглиш йўлда, деганларнинг фоизи эса, 40% бўлиб чиққан.

Сўров муаллифларига кўра, кўпчилик россияликнинг жиддий эътирозига сабаб бўлган 2018 йилги пенсия ислоҳотларидан буён бу рақамлар ўзгаришсиз қолмоқда.

Россия янглиш йўлда, деганларнинг ярмига яқини ҳам яна ёшлар бўлиб чиқишган.

Таъкидланишича, бу ёшлар янгиликларни асосан интернет нашрлари ва ижтимоий тармоқлардан олишади.

Президент Путиннинг фаолиятини ёқловчи 40 ёшдан ошганлар учун эса, асосий ахборот манбаси дўстлари ёки телевидение бўлади.

Россия ёшларида норозиликка мойиллик 2017 йилдан бошлаб кучайиб бораётгани қайд қилинган.

Худди ўша йили Алексей Навальний амалдаги Бош вазир Дмитрий Медведев билан боғлиқ коррупцион суриштирувини эълон қилган.

Бунинг ортидан, Россия коррупцияга қарши намойишларга саҳна бўлганди.

Россия дунёнинг энг кўп - миллионлаб сондаги Ўзбекистон фуқаролари турли иш, юмуш ва таҳсилда банд давлати бўлади. Ўзбекистонликлар учун энг йирик меҳнат бозори вазифасини ўтаб келади.

Россия барча минтақа давлатларининг бирдек анъанавий энг йирик савдо-иқтисодий, стратегик ва ҳарбий-техник шерикларидан бири саналади.

Россиядаги сўнгги ҳодисалар аллақачон аксарият Ғарб ҳукуматларининг кескин танқид ва хавотирларига сабаб бўлиб улгурган.

Бу воқеаларга ҳозирча бирор бир Марказий Осиё давлатининг расмий муносабати кўзга ташланмайди.

Хабарларга кўра, кеча 4 февраль куни Олма Ота шаҳрида Ўзбекистон Бош вазири Абдулла Орипов Россия Бош вазири Михаил Мишустин билан учрашган.

Бу икки давлат Бош вазирларининг Ўзбекистон Россия шамсияси остидаги ЕвроОсиё Иқтисодий Иттифоқига расман кузатувчи сифатида қабул қилиниши ортидан илк учрашуви бўлган.

Бош вазирлар Ўзбекистон президентининг шу йил март-апрель ойларида (санитария-эпидемиологик чекловлар туфайли кечиккан) Москва шаҳрида бўлиб ўтадиган расмий ташрифига тайёргарликни муҳокама қилишганига оид хабарлар шу соатда рад этилган.

Аниқлик киритилишича, аксинча, ҳукумат раҳбарлари даражасида Қўшма комиссиянинг навбатдаги йиғилишини ўтказиш масаласи муҳокама қилинган.

Хабарларда Қозоғистондаги учрашувда томонларнинг оммавий вакцинация (коронавирусга қарши - таҳр.) жараёнида ўзаро ҳамкорлик қилишаётгани ҳам ҳақида ҳам айтилганди.

Россиядаги сўнгги конституцион тузатишлар эса, Владимир Путиннинг, истаса, 2036 йилгача президентлик учун беллашишига қонунан йўл очган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek