Ўзбекистон яхши вакцина олаяптими? Ковид, дунё, коронавирус, koronavirus, Covid-19, O'zbekiston, dunyo, yangiliklar

Ўзбекистон яхши вакцина олаяптими? - Олимлар вакцина кучини кескин кесадиган коронавируснинг янги хавфли штаммларини топишди. Аммо мавжуд вакциналардан биттаси уларга бас келишини аниқлашди. Худди шу вакцинадан Ўзбекистон ҳам миллионлаб дозада олмоқда.

Янги тадқиқот

Янги тадқиқот Кембриж университети олимлари томонидан олиб борилди.

Улар коронавируснинг вакцина кучини 10 баробар қирқиши мумкин бўлган янги хавфли мутант турларини аниқлашди.

Худди шу манзарада оксфордлик тадқиқотчилар яхши хабар билан чиқишди.

Oxford-AstraZeneca вакцинаси, ҳатто, биринчи эмлаш ортиданоқ одамларни янги штаммдан яхши ҳимоя қила олишини исботлашди.

Кембрижлик олимлар эса, E484K, деб номланувчи "британча штамм"нинг 11 та мутацион ҳолатини аниқлашди.

Маълум бўлишича, бу коронавируснинг Жанубий Африка ва Бразилияда тез тарқалишига ёрдам берган.

Яқинда "британча штамм"нинг Ўзбекистонга ҳам кириб боргани расман тасдиқланган.

Ўзбекистон худди шу манзарада "британча штамм" аниқланган биринчи Марказий Осиё давлатига айланган.

Oxford -AstraZeneca

Kеча, 3 февраль куни Ўзбекистоннинг БМТ COVAX дастури доирасида 2,6 млн доза Oxford -AstraZeneca вакцинасини олиши маълум бўлган.

Бу ҳақда халқаро ташкилотнинг ЮНИСЕФ жамғармаси сайтида хабар қилинган.

Коронавирусга қарши вакциналар дунёнинг кам ва ўртача даромадли 92 давлатига шу йил июнь ойигача тақдим этилиши кутилмоқда.

Орада Ўзбекистон 100 минг доза олиши айтилган BioNTech/Pfizer вакцинаси эса, "британча штамм"га қарши кучсиз экани ҳам аён бўлган.

Маълум бўлишича, "британча штамм" бу вакцинанинг кучини 10 баравар қирққан.

Бунга BioNTech/Pfizer вакцинаси билан эмланган одамларнинг қон намуналаридаги аксилтаначалар далолат қилган.

Айни пайтда, Буюк Британияда 10 миллион киши аллақачон вакцинанинг биринчи дозасини олган ва олимлар, эмлаш дастури янги мутацияга қарши у қадар самарали бўлмаса ҳам, касалланиш ва ўлимни камайтиришга ёрдам беришига амин.

Оксфорд университети олимлари эса, Oxford-AstraZeneca вакцинаси вирусни юқтириш хавфини сезиларли даражада камайтиради ва биринчи эмлашдан кейин ҳам яхши ҳимоя қилади, деган фикрда қатъий, аниқ хулосага келишди.

Британия ҳукумати нуқтаи назаридан, бу уларнинг пандемияга қарши умидлари ва саъй-ҳаракатларини тўлиқ оқлайди.

Аммо янги тадқиқот натижалари AstraZeneca кекса ёшдаги одамларда қанчалик иш бериши тўғрисидаги мунозаралар фонида нашр этилди.

Европа Дори-дармон Агентлиги ўтган ҳафтада бу вакцинани барча ёшдагилар учун тавсия қилган.

Лекин, шунга қарамай, дунёнинг қатор давлатларида шифокорлар уни кексалар учун ишлатишга қарши чиқишди.

Уларнинг айтишларича, AstraZeneca нинг кексаларда самарадорлиги тўғрисида далиллар етарли эмас.

Оммавий эмлаш

Ўзбекистонда аҳолини оммавий эмлаш ишлари ҳалича бошланмаган.

Масъуллар бу ишга шу ой охири ва келаси ой бошларида киришилишини айтишган.

Ҳозирча Қозоғистон ўз аҳолисини эмлашни бошлаган ягона минтақа давлати бўлиб турибди.

Қозоғистон эмлашни Россиянинг Спутник V вакцинаси билан бошлаган.

Кеча, чоршанба куни Туркманистон пойтахт Ашхабодда тиббиёт ходимларини Россиянинг худди шу вакцинаси билан эмлашни бошлаганига оид хабарлар ҳам олинган.

Ўзбекистон минтақанинг аҳолиси энг катта давлати бўлади.

Аҳолисининг сони ҳозир расман 34500 миллион кишидан ортади.

Ўтган ой охирида Ўзбекистон Ковидга қарши 15 миллион дозага яқин вакцина олиш истагида экани хабар берилган.

Маълум бўлишича, бу дастлаб мамлакат аҳолисининг 20 фоизини эмлашга имкон беради.

Аммо хабарларда Ўзбекистон томони айнан қай бир вакцинани кўзда тутаётгани тафсилотлари ноаён қолган.

Орада Ўзбекистоннинг жорий йилда коронавирусга қарши кураш ва вакцина хариди учун жами 3 триллион сўм ажратиши ҳақида ҳам хабарлар олинган.

Ўзбекистонда ҳозир Хитой коронавирусга қарши яратаётган вакциналардан бирининг учинчи босқич синови бормоқда.

Президент Шавкат Мирзиёев Россияни ҳам вакцина сотиб олишлари мумкин бўлган давлатлар қаторида тилга олиб ўтган.

Спутник V синовдан ўтказиш, рўйхатга олиш саноат миқёсида ишлаб чиқариш мақсади билан ўтган йил Ўзбекистонга ҳам келтирилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek