Москва Навальний учун “жавоб беради”ми? – Россия, Путин ва дунё, Rossiya, Putin, O‘zbekiston, migrantlar, dunyo, yangiliklar

Москва Навальний учун "жавоб беради"ми? - Ғарб Россия ҳукуматига қарши кескин баёнотлар билан чиқди. Путин ашаддий танқидчисини зудлик билан озод этишга чақирди. Суд кеча, 2 февраль куни Алексей Навальнийни қамашга ҳукм этди.

Мухолифат лидерининг 3,5 йиллик шартли қамоқ жазосини ҳақиқийсига айлантиришга қарор қилди.

Ҳукм Алексей Навальнийни қўллаб ўтказилаётган ва Россиянинг бу яқин тарихида мисли кўрилмагани айтилаётган бир неча ўн минг кишилик оммавий намойишлар манзарасида янгради.

Суд унинг бунгача уй қамоғида ўтказган қарийб 10 ойни қамоқ муддатидан чиқариб ташлади.

Аммо кўзда тутилган қамоқ жазосининг 2,8 йилини умумий тартибдаги колонияда ўташини айтди.

44 ёшли Навальний шартли ҳукм талабларини бузганликда айбдор, деб топилган. Унинг сўзларига кўра, бу иш уйдирма, "тўқиб чиқарилган".

Алексей Навальний адвокатлари суд ҳукми юзасидан шикоят аризаси билан чиқишмоқчи.

Аммо, суд ҳукми ортидан, АҚШ, Германия, Британия ва яна бошқа қатор Ғарб давлатларининг баёнотлари кескин бўлди.

Янги АҚШ Давлат котиби яна бир бор Россия ҳукуматини Навальний ва унинг ҳимоясига чиқиб, ушланган намойишчиларни зудлик билан қўйиб юборишга чақирди.

Энтони Блинкен, ўз ўрнида, Россия раҳбариятига Инсон ҳуқуқлари бўйича Европа судининг 2014 йилги қарорини ҳам эслатган.

Суд эса, Навальнийга қамоқ жазоси берилган "Ив Роше" иши бўйича ҳукмни ноқонуний ва асоссиз, деб топган.

АҚШ Давлат котибининг баён қилишича, Россия билан ўзаро манфаатли соҳаларда ҳамкорликни давом этдиришади.

Аммо, унга кўра, иттифоқчилари билан бирга "ҳуқуқбузарликлари учун Москвани жавоб беришга мажбур қилишади".

Иттифоқчилари ҳам Вашингтонни дастаклаб чиқишган.

Германия канцлери Ангела Меркель Россия ҳукуматини қонун устуворлиги тамойилларини бузишда айблаган.

"Навальний озод қилиниши, тинч намойишчиларга қарши зўравонлик тўхтатиши керак"лигини айтган.

Канцлернинг баёноти Германия ҳукумати матбуот котиби Штеффен Зайберт номидан эълон қилинган.

Ангела Меркелдан аввал Германия Ташқи ишлар вазири ҳам россиялик мухолифат лидерини зудлик билан озод этишга чақириб чиққанди.

Хайко Мааснинг ёзишича, "Навальнийга қарши чиқарилган ҳукм Россиядаги асосий эркинликлари ва қонун устуворлигига берилган оғир зарбадир".

Москвадаги суд ҳукми Британияда ҳам беэътибор қолдирилмаган.

Британия Ташқи ишлар вазири ҳам Россия ҳукуматини Алексей Навальний ва "сўнгги икки ҳафтада қўлга олинган тинч намойишчилар, журналистлар барчасини озод этишга чақирган".

Доминик Раабнинг баён қилишича, "Суд ҳукми ҳамма нарсани бошдан оёқ қилган: заҳарлашга масъуллар эмас, заҳарланиш қурбони жазоланган. Бу эса, Россия халқаро ҳамжамиятнинг ҳурматли аъзосидан кутилган энг оддий мажбуриятларни ҳам бажармаётганини кўрсатади".

Британия Бош вазирига кўра эса, "Алексей Навальнийнинг заҳарланиши ортидан, яна Россия қайтиш қарори ростмана жасорат ва фидокорлик, суд ҳукми эса, пасткашлик бўлган".

Борис Жонсонга кўра, "ҳукм одил судловнинг энг оддий меъёрларига ҳам жавоб бермаган".

Унинг айтишича, "Алексей Навальний зудлик билан озод этилиши лозим".

Худди шундай талаб билан Франция президенти ҳам чиққан.

"Алексей Навалнийнинг ҳукми қабул қилиниши мумкин эмас. Сиёсий тафовутлар ҳеч қачон жиноят деб қаралмаслиги керак. Биз уни зудлик билан озод қилишга чақирамиз. Инсон ҳуқуқлари ва демократик эркинликларини ҳурмат қилиш зарурати муҳокама қилинмайди", дея баён қилган Эмманюэль Макрон.

Европа дипломатияси раҳбари Жозеп Боррель ҳам "Алексей Навальнийни зудлик билан қўйиб юбориш"га чақирган.

Унинг ўз твитида ёзишича, Навальнийга қарши чиқарилган ҳукм билан Россия Россия қонун устуворлиги ва асосий ҳуқуқ ва эркинликларга оид халқаро мажбуриятларини бузмоқда.

Европа Иттифоқининг яна икки марказий органи - Европа Кенгаши ва Европа Комиссияси раҳбарлари ҳам худди шунга ўхшаш баёнотлар билан чиқишган.

Россия Ташқи ишлар вазирлиги вакили Мария Захарова эса, Ғарб сиёсатчиларини ўз мамлакати ички ишларига аралашмасликка чақирган.

Сешанба куни полиция қўлга олган одамлар сони қарийб 1400 кишига етган. Улар мухолифат лидерининг қўлловчилари экани айтилади.

Суд қароридан кейин юзлаб намойишчилар Москва марказида тўпланишган.

Хабарларга кўра, бунга ўхшаш намойишлар яна Санкт-Петербург ва Россиянинг бошқа айрим шаҳарларида ҳам кузатилган.

Москвадаги намойишлар зўравон тус олиб кетгани ҳам кўрилган, намойишчилар ва полиция тўқнашган. Полиция дубинка қўллагани акс этган видеотасвирлар чиққан.

Масъуллар қўлга олинганлар борасида фаоллар келтираётган рақамларни ҳалича шарҳлашмаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek