Трамп импичментга юз тутди – АҚШ ва Ўзбекистон, O'zbekiston, Mirziyoyev, AQSH, Rossiya, dunyo, yangiliklar

Трамп импичментга юз тутди - Вакиллар Палатаси ўз сўзини айтди. Трамп ҳозирча жим. АҚШ дунёнинг энг кўп сондаги ўзбекистонликлар яшаб, меҳнат қилиб, таҳсил олиб келаётган тўртта давлатидан биттаси саналади.

Орада Қирғизистон АҚШ даги фуқароларини эҳтиёт бўлишга чақириб ҳам чиққан.

Дональд Трамп икки бор импичмент эълон қилинган АҚШ тарихидаги ягона президентга айланди.

Вакиллар Палатаси ортидан, энди Трамп импичменти борасида ўз сўзини Сенат айтиши керак.

Аммо Сенат АҚШ янги президенти инаугурациясидан кейингина бу масалани кўриб чиқишни ваъда қилмоқда.

Жо Байденнинг инаугурация маросими 20 январга режаланган. Унгача яна қарийб бир ҳафта муҳлат бор.

Агар, шундай бўлса, бу шу вақт оралиғида Дональд Трамп АҚШ президенти бўлиб қолаверишини англатади.

Демократлар Американинг амалдаги раҳбари ўз вазифаларини бажара олмаслигига амин.

Экспертлар эса, Трампнинг кейинги қадамларидан қўрқишмоқда.

Сўнгги АҚШ президент сайлови ўтган йилнинг 3 ноябрь куни бўлиб ўтган.

АҚШ президент сайловида демократчи номзод Жой Байден ғалаба қозонган. У амалдаги президенти Дональд Трампни мағлуб этган.

Вакиллар Палатасининг Трамп импичменти билан боғлиқ сўнгги қарори Капитолий ишғолидан роппа-роса бир ҳафта ўтиб янграган.

Капитолий эса, ўтган чоршанба куни айнан Трамп даъвати билан унинг тарафдорлари томонидан ишғол қилинган.

Ишғол Конгресс президент сайлови натижасини расман тасдиқлашга киришган бир пайтда юз берган.

Ишғолдан саноқли соатлар ўтиб, Конгресс Жо Байденни президент, деб расман маъқуллаган.

Бунинг ортидан, нуфузли Демократлар президент Трамп муддати тугашини кутмасликка қатъий қарор қилишган.

Қатъият билан Трампни президентликдан олиб ташлаш таклифини илгари суришган.

Хабарларга кўра, АҚШ Вакиллар Палатаси саноқли соатлар ичида бир тўхтамга келган.

Дональд Трампни исёнга гижгижлашда айбдор, деб топган.

Вакиллар Палатаси спикери Нэнси Пелоси имзоси билан, импичмент тўғрисидаги ҳужжат кучга кирган.

Бу жараёнда Капитолий биноси 15 минг ҳарбий томонидан қўриқланган.

АҚШ ҳатто Ироқ ва Афғонистонда бунча катта сондаги аскарга эга бўлмаган.

Ҳарбийлар сони айрим вакиллар томонидан худди шу каби баҳоларга ҳам сабаб бўлмай қолмаган.

Бир йил олдин, биринчи импичмент ҳаракатига Республикачилар партияси қарши чиққан.

Бу сафар эса, уларнинг бир нечтаси буни қўллаб-қувватлашган.

Aгар Трамп Сенат томонидан ҳам айбдор деб топилса, унинг қайта президентликка даъво қила олмаслиги учун вакиллар яна бир бор овоз беришлари керак бўлади.

Трамп бундан аввал 2024 йилги сайловда ўз номзидини илгари суриши мумкинлигига ишора қилган.

Трамп ва Ўзбекистон

Трамп даври Америкаси янги Ўзбекистоннинг ўзаро алоқаларида стратегик шерикликнинг янги даврини бошлаган илк Ғарб давлати бўлади.

Ўзбекистон президенти ҳалича Жо Байденни президент сайловидаги ғалабаси билан расман қутламаган.

Эмомали Раҳмон ўтган ой Қирғизистон, Қозоғистон ва Туркманистондан сўнг АҚШ янги президентини табриклаган сўнгги минтақа давлати лидери бўлган.

Кеча, чоршанба куни президент Трампнинг қуролланган тарафдорлари Капитолий биносига бостириб киришган, уни куч билан қамал қилишган.

Ҳодиса Конгресс қуйи ва юқори палатаси сўнгги президент сайлови натижасини расман тасдиқлаш учун йиғилган бир пайтда юз берган.

Бу сайловда амалдаги президент Дональд Трамп мағлубиятга учраган, натижалар унинг демократчи рақиби Жой Байден ғалаба қозонганини кўрсатган.

Аммо Республикачи номзод ҳали-ҳануз ўзининг президент сайловидаги мағлубиятини расман тан олмай келади.

Вашингтон мэри Мюриэл Баузер Капитолий ишғоли ортидан янги президент Жо Байденнинг инаугурациясига қадар узайтиришга қарор қилган.

Дунё лидерлари Вашингтонда юз берган сўнгги зўравонликларни қоралаб чиқишган.

Кўплаб раҳбарлар ҳокимиятни тинч ва тартибли равишда топширишга чақиришган.

Капитолий ишғолини "даҳшатли" ва "демократияга қарши ҳужум", деб таърифлашган.

Cўнгги ҳодисаларга Марказий Осиё давлатлари лидерларининг муносабати маълум эмас.

Ўзбекистон президенти 11 январда бир ҳафталик қисқа меҳнат таътилдан қайтган.

Би-би-си: Америка Қўшма Штатлари жорий пайтда дунёнинг энг катта сондаги ўзбекистонликлар яшаб, ўқиб, ишлаб келаётган тўртта давлатидан биттаси бўлади.

Айрим ҳисоб-китобларга кўра, ўзбекистонликлари дохил Америкадаги ўзбекларнинг тахминий сони ҳозир деярли уч юз минг кишига етай, деб қолган.

Улардан аксариятини эса, Грин-карта ёрдамида Америка Қўшма Штатларида яшаш ҳуқуқини қўлга киритганлари ташкил этишади.

Америкада яшаб, меҳнат қилаётган ўзбекистонликлар орасида етакчи олимлар, ишбилармонлар, турли халқаро ва жамоат ташкилотлар вакиллари мақомида бўлганлари, нуфузли университетларида таҳсил олаётганлари озмунча эмаслиги айтилади.

Ўзбекистондаги "Ижтимоий фикр" тадқиқот марказининг сўнгги сўровларидан бири Америкага кетиш истагида бўлган ўзбекистонликлар сони ортиб бораётганига далолат қилган.

Бугун хорижда турли иш, юмуш ва таҳсилда банд ўзбекистонликлар сони миллионларга нисбат берилади.

Бу каби ҳолат Марказий Осиёнинг қолган бирор бир давлати мисолида кўрилмайди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek