Беларусь: Лукашенко қасамёд келтирди, қандай қилиб - кўпчилик ҳайрон, dunyo, Belarus, Rossiya, yangiliklar

Беларусь: Лукашенко қасамёд келтирди, қандай қилиб - кўпчилик ҳайрон: инаугурация ҳақида олдиндан айтилмади. Янгилик мамлакатда оммавий намойишлар ҳали-ҳануз тинмаган, Россия Беларусда фаоллашиб қолган бир манзарада бўй кўрсатди.

Александр Лукашенко энди кетма-кет олтинчи бор президентлик ваколати ижросига киришиши мумкин бўлади.

Аммо бугунги расмий маросим олдиндан эълон қилинмади, худди шу боис Беларусдаги кўпчилик учун бу янгилик кутилмаган бўлди.

Бундан ҳатто журналистларнинг ҳам хабари бўлмади.

Беларусдаги зиддиятли президент сайлови шу йилнинг 9 август куни бўлиб ўтган.

Президент сайловида расман амалдаги президент Александр Лукашенконинг ғолиб чиққани эълон қилинган.

Аммо мухолифат илова Беларусдаги катта кўпчилик сайлов натижалари сохталаштирилганини айтиб, бунга ишонмаган, Лукашенконинг кетиши талаби билан кўчаларга чиқишни бошлаган.

Намойишлар йирик норозилик акцияларига ҳам айланган.

Сўнгги ҳафталарда милиция намойишларни шафқатсизлик билан бостиришга ўтган.

Намойишчилар калтакланган, ҳибсга олинганларининг қийналганига оид хабарлар сони кўпайган.

Аммо, шунга қарамай, Беларусда норозилик чиқишларининг ҳануз тинмаётгани кузатилган.

Тинмаётган оммавий норозилик чиқишлари Беларуснинг иккинчи Украинага айланишига оид хавотирларни ҳам пайдо қилмай қўймаган.

Худди шу фонда Россия Ғарб, Ғарб эса Россиянинг Беларусдаги воқеаларга иштирокидан жиддий хавотирда экани кўрилаётганди.

Хабарларга кўра, қасамёдга келтириш маросими пойтахт Минскдаги Мустақиллик саройида бўлиб ўтган, бор-йўғи "бир неча юз киши" таклиф қилинган, аммо уларнинг кимликлари очиқланмаган.

Беларусь конституциясига мувофиқ, ғолиб номзод сайловдан икки ой ўтиб, ўз вазифаси ижросига киришиши керак.

Россия президенти матбуот котиби Дмитрий Песковнинг журналистларга айтишича, бугунги маросимдан шахсан ўзининг ҳам хабари бўлмаган.

Унга кўра, Владимир Путин ҳам инаугурацияга бормаган, "бу каби тадбирлар протоколи хорижий давлатлар раҳбарларининг иштирокини кўзда тутмайди, улар чақирилмайди".

Яқинда пезидент Лукашенко Москвага борган, Россия Бош ва Мудофаа вазирлари эса, Беларусга келиб кетишган, томонлар иттифоқчи давлат масаласида анча олдинга силжиб қолишганини ҳам баён қилишган.

Худди шу манзарада томонлар Беларус ғарбида қўшма ҳарбий машғулотлар ўтказишга ҳам улгуришган.

Александр Лукашенко бугунги чиқишида, шундай бир пайтда "беларусь халқини ташлаб қўйишга ҳаққи йўқ"лигини айтган.

Лукашенконинг сайловдаги асосий рақиби Александр Лукашенко бугунги маросим ортидан, "ортиқ Беларуснинг қонуний раҳбари эмаслиги"ни таъкидлаган.

Беларуснинг "ягона сайланган президенти бўлиб қолиши"ни баён қилган.

Светлана Тихоновская Беларусдаги оммавий ҳибсга олишлар ортидан, Литвага чиқиб кетган ва ҳануз ўша ерда қолмоқда.

Қолган мухолифат фаоллари ижтимоий тармоқлар орқали аллақачон одамларни кўчаларга чиқиш ва шу тариқа бугунги маросимдан ўз норозиликларини изҳор этишга чақиришга киришишган.

Европа парламенти бундан анча аввал Беларусдаги президент сайлови натижаларини тан олмаслигини баён қилган.

Литва президенти Беларусдаги инаугурация маросими "ноқонуний" эканини айтиб, твит қилган.

Беларусдаги президент сайлови ортидан, Ўзбекистон илова аксарият Марказий Осиё давлатлари президентлари Лукашенкони ғалабаси билан расман табриклашган.

Лукашенко Беларусни 26 йилдан буён бошқариб келади, четда Европанинг "сўнгги диктатори" сифатида кўрилади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek