Хитой АҚШ консуллигини ёпишга буйруқ берди

Хитой жануби ғарбий Чэнду шаҳридаги АҚШ консуллигини ёпишга буйруқ берган.

Расмий Пекин ўзининг қарори Американинг амалларига жавоб чораси эканини айтган.

Аввалроқ Қўшма Штатлар Хитойнинг Хьюстондаги консуллигини ёпиш учун 72 соат муҳлат берган эди.

Коронавирус: Вакциналар уруши - Америка Хитой консуллигини нега ёпмоқда?

АҚШ Марказий Осиё давлатларига: Уйғурларни Хитойга топширманг

Уйғурлар: Хитой элчиси Би-би-си саволларига қандай жавоб берди?

АҚШ Давлат Котиби Майк Помпео Хитой Қўшма Штатларнинг интеллектуал мулкини "ўғирлаётгани" учун шундйқ қарор қабул қилганликларини айтган.

АҚШ ва Хитой ўртасида бир қатор масалалар бўйича танглик кучайиб бормоқда.

Трамп маъмурияти Хитой билан савдо ҳамда коронавирус пандемияси юзасидан бир неча бор тўқнашди.

Хитойнинг уйғурларга муносабати ва Гонконгда жорий қилинган зиддиятли хавфсизлик қонуни ҳам кескинликнинг ортишига сабаб бўлди.

Хитой ўз қарорини АҚШ Давлат Котиби Майк Помпеонинг собиқ президент Ричард Никсон кутубхонасида пайшанба куни қилган нутқидан бир неча соат ўтиб эълон қилган.

Никсоннинг 1972 йилда Хитойга ташрифи икки ўртада муносабатларнинг яхшиланишига олиб келган эди.

"Бугун Хитой мамлакат ичкарисида тобра авторитар, ташқарида эса борган сари эркинликларга тажовузкор бўлиб бормоқда", деган Помпео.

"Озод дунё бу янги тиранияни енгиши керак".

Хитой нима деди?

Хитой Ташқи ишлар вазирлиги ўз баёнотида АҚШ консуллигининг ёпилиши Вашингтоннинг "кераксиз чораларига қонуний ва зарур жавоб чораси" эканини айтган.

"Хитой ва Қўшма Штатлар ўртасидаги жорий вазиятнинг юзага келишини Хитой истамаган бўларди, ҳаммаси учун масъулият тўлиқ АҚШ зиммасида", дейилади баёнотда.

Хитойнинг Global Times нашри муҳарририга кўра, Пекин АҚШга консулликни ёпиши учун душанбагача вақт берган.

Қўшма Штатларнинг Чэндудаги 1985 йилда очилган дипломатик миссияси стратегик аҳамиятга эга деб кўрилади.

150 нафар маҳаллий ходимлар дохил 200 киши ишлайдиган миссия Америкага Тибет мухтор минтақаси ҳақида маълумот тўплашга ёрдам беарди.

Саноат ва хизмат кўрсатиш соҳаси тобора ривожланиб бораётган Чэнду АҚШ учун шунингдек, ўз қишлоқ хўжалик маҳсулотлари ҳамда автомобил ва бошқа техникалар экспорти учун яхши бозордир.

Америка Хитой консуллигини нега ёпмоқда?

Америка ҳукумати Хитой Халқ Республикасига Хьюстондаги консуллигини ёпиш учун 72 соат муҳлат берган.

Аввалроқ Америка расмийлари хитойлик хакерлар Covid-19 га қарши вакцинага доир маълумотларни ўғирлашга ҳаракат қилганини айтишганди.

АҚШ Адлия вазирлиги томонидан эълон қилинган айбнома Хитойнинг икки фуқаросига алоқадор.

Унда айтилишича, хитойлик хакерлар коронавирусга қарши восита устида ишлаётган лабораториянинг компьютер серверларини бузиб кирган.

Америка томони, шуниндек, бу хитойликлар АҚШ визасини қўлга киритиш мақсадида қасддан нотўғри маълумот тақдим этгани ва Хитой давлатининг ёрдамида бошқа ўғирликларни ҳам содир этишга уринганликларини айтмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek