Ўзбекистон: Мирзиёев қайта сайланишига қарши собиқ ректор президент бўлмоқчи

4 июн куни Термиз давлат университети собиқ ректори Хидирназар Аллақулов Ўзбекистонда янги партия тузмоқчи ва 2021 йилдаги президентлик сайловида ўз номзодини илгари сурмоқчи эканини таъкидлаган видео эълон қилинди.

Аллақулов ушбу баёнотни "Адабиёт" газетаси бош муҳаррири, журналист Бахтиёр Карим билан суҳбат чоғида маълум этган.

Мазкур суҳбатда Аллақулов янги сиёсий партия тузишни мақсад қилганини ҳам билдирган.

Аллақулов Ўзбекистонда иқтисодий-сиёсий танглик туфайли ишсизлик даражаси ортиб бораётганини айтиб, ҳукуматни коронавирус пандемияси даврида хорижда қолган ўз фуқароларини ҳимоя қила олмаганликда танқид қилган.

Аслида иқтисодчи олим бўлган собиқ ректор Ўзбекистонда одамларнинг ўз қобилиятини рўёбга чиқара олишида эркинлик таъминланмаганидан ҳам мамлакатда юқори даражада қашшоқлик мавжудлигини таъкидлаган.

2002-2004 йилларда Термиз давлат университети ректори лавозимида ишлаган Хидирназар Аллақулов собиқ Миллий хавфсизлик хизматининг маҳаллий раҳбарлари томонидан ташкил этилган коррупцион схемаларга қарши кураши ортидан лавозимидан олиб ташланганини айтади.

Мирзиёев Фарғонада, ишсизлик туфайли ижтимоий танглик кучайиши мумкин

Шундан бери у Ўзбекистондаги бир қатор судлар ва БМТ Инсон ҳуқуқлари қўмитасига арз қилгани, улардан ижобий жавоб олган бўлсада, ҳукумат бу қарорларни эътиборга олмаётганини таъкидлайди.

Янги сиёсий партия

Унинг фикрича, Ўзбекистонда фаолият юритаётган сиёсий партиялар "амалдаги ҳукумат томонидан бошқарилиши ва молияланиши" туфайли мавжуд вазиятни халқ манфаатига мос равишда ўзгартиришга қодир эмас.

"Бу партиялар ва уларнинг дастурлари яхлит бир миллатнинг манфаатларига эмас, айрим олинган ижтимоий гуруҳларнинг манфаатларига хизмат қилишни устувор, деб билишади", деган Аллақулов.

Аллақуловнинг сўзларига кўра, Ўзбекистон халқининг манфаатларига хизмат қила оладиган, "ҳақиқат ва адолат қарор топтирадиган" сиёсий партия тузишга эҳтиёж туғилган.

"Биз ёзувчилар, драматурглар, олимлар, журналистлар, блогерлар, нафақахўрлар, улуғларимиз ва йигит-қизларимиз билан фикр алмашдик. Мана шу фикрлар асосида мамлакатимизда "Ҳақиқат ва тараққиёт" социал-демократик партиясини ташкил этишга жазм этдик", таъкидлаган собиқ ректор.

Бахтиёр Карим билан суҳбат давомида Хидирназар Аллақулов ушбу партияни ташкил этишда амалдаги қонунчилик талабларига қатъий риоя этилиши ва уни тузишда жамиятнинг дастаги кераклигини билдирган.

Шунингдек, у агар мазкур партия ташкил этиладиган бўлса, 2021 йилда бўлиб ўтадиган президентлик сайловида ўз номзодини илгари суришини эълон қилган.

"Халқ бу партияни тузишимизни қўллаб-қувватласа, партия аъзолари мени президентликка лойиқ кўрилса, мен сўзсиз президентлик сайловида иштирок этаман".

"Мирзиёев президент бўлмаслиги керак"

Ижтимоий тармоқда Аллақулов ташаббуси қўллаб-қувватланган кўплаб постлар қолдирилган.

"Бугун мен учун мустақил Ўзбекистон тарихидаги демократик жамият сари яна бир қадам олға қўйилган кун! Бугун Профессор Хидирназар Аллакулов томонидан янги сиёсий партия ташкил этиш ташаббуси олға сурилди! Мен ишонаманки, бу ташаббус, албатта, сиз халқимиз томонидан қўллаб-қувватланилади. Хуллас, халқимиз ўзининг ҳақиқий вакилларини танлаш (сайлаш) имконига эга бўлади. Шу муносабат билан. мен ҳам шу ташаббусни қўллаб-қувватлашимни билдираман", ёзган Facebook фойдаланувчиларидан бири.

Хидирназар Аллақулов бундан аввал Ўзбекистондаги қашшоқлик ва 2021 йилдаги сайловда амалдаги президент Мирзиёев номзодини илгари суришга йўл қўйиб бўлмаслик борасидаги фикрлари ортидан жамоатчилик эътиборига тушган эди.

Шу йилнинг май ойида Бахтиёр Карим билан интервьюда у марҳум Ислом Каримов давридаги авторитаризм ва эрксизлик туфайли мамлакат аҳолисининг катта қисми қашшоқлик чизиғидан ҳам тубда яшашга мажбур бўлаётганини билдирган эди.

Шунингдек, ушбу интервьюда Шавкат Мирзиёевни ҳам жиддий танқид остига олиб, у томонидан бошланган ислоҳотлар тўхтаб қолгани ва мамлакатдаги вазият яна ортга қайта бошлаганини таъкидлаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek