Ўзбекистон: Жиззахда Volkswagen машиналари ва карантинда интернет тезлашдими? - O'zbekiston, koronavirus

Ўзбекистонда коронавирусга чалинганлар сони расман 3769 кишига етди. Volkswagen машиналари Ўзбекистон бозорига кириб келмоқда. Ўзбекистон аэропортлари ҳинд компаниясига берилиши мумкин. Пандемия пайтида интернет тезлиги кўтарилдими? Тошкентда ёнғин; ўнлаб инсон эвакуация қилинди - bbcuzbek.com дайжести:

Ўзбекистон ва коронавирус

3 июнь соат 10:00 ҳолатига кўра, Ўзбекистонда коронавирус инфекцияси қайд этилганлар сони 3769 (+9) нафарни ташкил этмоқда.

"Янги касалланиш ҳолатларининг 7 нафари Тошкент вилоятида (6 нафари халқаро юк ташувчи автомашина ҳайдовчиси, 1 нафари аҳоли орасидан аниқланган), 2 нафари Сирдарё вилоятида (1 нафари халқаро юк ташувчи автомашина ҳайдовчиси, 1 нафари коронавирусга чалинганлар билан мулоқотда бўлиб карантинга олинган) аниқланган", дея хабар берган Соғлиқни сақлаш вазирлиги.

Шу вақтга қадар 2919 бемор соғайган, шифохоналарда эса 835 нафар бемор даволанишда қолмоқда.

Қайд этилган ўлим ҳолатлари 15 та.

Volkswagen машиналари Ўзбекистон бозорига кириб келмоқда

Ўзавтосаноат акциядорлик жамияти жорий йилнинг март ойида Volkswagen Group Rus концерни билан имзоланган келишув асосида Жиззах Автомобиль Заводи МЧЖ компанияси базасида енгил тижорат атвомобилларини ишлаб чиқаришга мўлжалланган 45 гектар майдонда жойлашган заводнинг қурилиш ишлари якуний босқичга етганини хабар қилмоқда.

Хабарда Volkswagen Caddy русумли автомобиллар савдоси шу йилнинг июль ойидан бошланиши режалаштирилаётгани айтилади.

"Volkswagen Caddy - 7 ўриндиқли (5-ўриндиқли кўриниши ҳам мавжуд) йўловчи ва юк минивени. Автомобиль ҳам бизнес юритишга, ҳам оилавий фойдаланиш учун тўғри келади. Тежамкор ва технологик (MPI) двигатель 1,6 литр қувватга эга, бензинда ишлайди. Ёқилғи сарфи - шаҳарда 100 км.га 9,3 литр, трассада 100 км.га 6,1 литр", дея қўшимча маълумотларни келтирган Ўзавтосаноат АЖ.

Ўзбекистон аэропортлари ҳинд компаниясига берилиши мумкин

Транспорт вазирлиги Ҳиндистоннинг GMR Group компанияси вилоятлардаги халқаро аэропортларни давлат-хусусий шериклик шартлари асосида инвесторларга бериш бўйича ўтказиладиган тендерларда иштирок этишга таклиф этилганини хабар қилган.

Вазирликнинг маълум қилишича, мазкур компания "яшил аэропортлар" концепциясини ривожлантириш, шунингдек, аэропортларга инновацион технологияларни (юзни аниқлаш ва таниш технологиялари, мобил телефонлар имкониятларидан унумли фойдаланган ҳолда назорат-ўтказиш пунктларидан йўловчиларни ўтказувчанлик қобилиятини бир-неча баробарга ошириш) ўрнатишда катта тажрибага эга.

Пандемия пайтида интернет тезлиги кўтарилди

Ахборот технологиялари ва коммуникацияларини ривожлантириш вазирлиги халқаро маълумотларга асосланиб, коронавирус пандемияси даврида Ўзбекистонда интернет тезлиги 6 фоиз, мобил интернет тезлиги эса 18 фоизга ошганини маълум қилган.

Вазирлик Ўзбекистон интернет тезлиги бўйича халқаро рейтингда бир йил ичида 37 поғонага кўтарилиб, 131-ўриндан 94-ўринга чиқиб олганини қўшимча қилган.

Тошкентда ёнғин; ўнлаб инсон эвакуация қилинди

3 июль куни пойтахтнинг Яшнаобод туманидаги 12 қаватли уйнинг 8-қаватида ёнғин чиққан.

Қутқарувчилар 30 дан ортиқ инсонни хавфсиз жойга олиб чиққан.

Тан жароҳати олганлар ва ҳалок бўлганлар қайд этилмагани айтилади.

Ўзбекистон: Коронавирус хавфи аригани йўқ

Коронавирус, шифокор кундалиги: Юмшатилаётган карантин ва йўл ҳаракати маданияти

Ўзбекистон: Карантин чекловлари янада кескинлашиши мумкин - янгиликлар

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek