Илон Маск Ўзбекистон мусаффо осмонида дрон ҳам учиролмайдими, у 2018 йил қаердан чиқарди? - Сўз сизга
Тадбиркор Илон Маскнинг SpaceX хусусий ракета компанияси илк маротаба фазогирларни орбитага олиб чиққани ўзбекзабон ижтимоий тармоқларида енгил ҳазил, умид ва бироз алам билан қаршиланди.
Икки фазогирнинг янги капсула ва 80 фоиз қайта ишлатилувчи ракеталарда коинотга олиб чиқишини тўғридан тўғри эфир орқали узатиб турилди.
Твиттерда фаол бўлган миллиардер Илон Маск ўша куни кўплаб фойдаланувчилардан минглаб изоҳлар олди.
Шулар орасида 9 мингдан ортиқ ўқувчиси бор ўзбекистонлик журналист Қаҳрамон Асланов Илон Маскка ўзбекистонликлар тушунадиган ҳазил ёзди.
«Сен космосга ракета учиришинг мумкин, лекин бизнинг мусаффо осмонимизга дрон тушуролмайсан», деб ёзди Асланов.
Яна бир журналист Лазизбек Ҳамидов Ўзбекистонликлар шахсий дронларни учириш учун рухсат сўраб юрган вақтда Маскнинг ракета учирганига эътибор қаратган.
«Биз шахсий дронларни учириш учун рухсат беришларини сўраб юрган бир вақтда, Илон Маск космосга шахсий ракетасини учиряпти…», дейди «Улар» лойиҳаси муаллифи Лазизбек Ҳамидов.
Facebook фойдаланувчиларидан бири Ўзбекистонда жазирама иссиқ кунлари машина ойнасини қорайтиришга бепул рухсат берилмаётган вақти дронларга йўл бўлсин деган.
Твиттердаги ургутлик, деган фойдаланувчи Маск Ўзбекистонда туғилганда ҳоли қандай кечиши мумкинлигини кулги остига олди.
"Илонмаск бизда туғилганда 2018 йил чиқарди!
-Космосгами?
-Йўқ, қамоқдан чиқарди", дейди у.
Trolluz саҳифаси Ғайрат Омоннинг ракета учирилишига бағишлаб Ўзбекистон телеканалларидан бирига қилинган пародиясини чоп қилди.
«Содиқ хизматлари учун» медали соҳиби, таниқли тадбиркор Илон Масктомонидан бошланган хайрли ишлар бугун ҳеч кимга сир эмас", дейилади унда.
"Муҳтарам Президентимиз Доналд Трамп мамлакатимиз биринчи хоними ҳамроҳлигида буюк воқеани ўз кўзи билан кузатиш, тарихий воқеанинг бир бўлаги бўлиш мақсадида космодромга ташриф буюрди.
Президентимиз бу ерда космос илми билан шуғулланаётган инсонларга яратилган шароитлар билан танишди. 45 йилдан бери ижарада яшаб келаётган профессорнинг Кариб денгизи соҳилида янги бунёд этилган намунали уйида меҳмон бўлди. Бу намунали уйлар 45 йиллик имтиёзли кредит асосида берилган".
«АМEРИКА-24 телеканали, махсус Флорида водийсидан», деб ёзади Gayrat Omon
Блогер Қудратуллаҳ Аҳмад нега айнан АҚШда хусусий ракета учирилгани борасида билдирган фикрлари ҳам ижтимоий тармоқларда кенг ёйилди.
"АҚШ нега энг ривожланган давлат эканини, АҚШликлар нега ҳаммадан олдинда эканини тушундингизми?
Илон Маск президентнинг куёви, ёки бирон катта амалдорнинг жияни эмас!
Илон Маскни бирон марта налоговий, снб, прократура босмади!
Илон Маскни бирон монополистик ташкилот ёптириб юбормади.
Илон Маскдан хеч ким доля сўрамади!
Илон Маск мингта жойдан справка, документ, бало-баттарлар йиғмади.
Илон Маскни аеродромини хокимият келиб бузмади.
Илон Маск неча йиллик меҳнатини, твда чиқиб Доналд Трампни мадҳ қилишга алишмади. Хаммасига ўз кучи билан эришганини кўрсатди.
Илон Маскни ишчиларини кўча тозалашга, пахта теришга опкетиб қолишмади. Доналд Трамп шу штатга келаркан деб ишларини тўхтатиб, аеродром атрофини супиртиришмади", деб жамиятдаги муаммоларни ёзган у.
НАСА Фазогирлари Даг Ҳўрли ва Боб Бенкен илк хусусий ракетада Халқаро космик станцияга етиб олган.
SpaceX компанияси Драгон кемалари билан келажакда орбитага истовчилар учун саёҳатлар уюштиришни режалаган.
Драгоннинг учирилиши инсониятнинг Марсга мўлжалланган сафарида муҳим қадам бўлгани айтилмоқда.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: @bbcuzbek
