Ўзбекистон: Коронавирус 2802, тест бекор қилинди, бизнесларга имтиёз, ёш болалиларга ёрдам берилади

Ўзбекистонда яна 11 кишида коронавирус аниқланган ва шу пайтгача вирусга чалинганлар сони жами 2802 нафарга етган.

Хабарларга кўра, касаллик аниқланган аксар фуқаролар чет эллардан, хусусан, Россиядан келганлар.

Улар нафақат Россияда ишловчи ё яшовчилар, балки ораларида халқаро юк ташувчи ҳайдовчилар ҳам бор.

Ўзбекистонда шу пайтгача вирус юқтирганларнинг аксариси (80% кўпроқ) тузалгани айтилади.

Ҳозирда 475 бемор касалхонада қолмоқда.

6 кишининг аҳволи оғир.

Вирус қурбонлари сони расман 13 нафар.

Бу - дунёдаги ўртача 1-2% кўрсаткичдан анча паст рақам.

(Маълумотлар 2020 йил 19 май Тошкент вақти билан эрталабки соат 10:00 бўйича олинган).

Бекор қилинган тестлар

Ўзбекистонда умумий карантин чекловлари июнь ойи бошигача чўзилгани айтилган, аммо мамлакат секин-аста карантиндан чиқмоқда.

Тошкент шаҳрида эрталаб 06:00дан кечки 10:00 оралиғида автоуловлар ҳаракатланиши мумкин.

Аммо Самарқанд шаҳрида кучайтирилган карантин чоралари амалда қолмоқда.

Самарқанд шаҳри ва вилоятида бир нечта коронавирус ҳолатлари аниқлангани айтилганди.

Шунингдек, Ўзбекистонда пойтахтдан узоқ шаҳарлар билан поезд ва ҳаво қатновлари тикланмоқда.

Олдинроқ Урганч, Термиз ва Нукусга парвозлар тикланиши, Самарқанд, Бухоро, Карши ва Фарғона водийсига поездлар қатнови бошланиши айтилганди.

Бироқ йўловчилар йўлга чиқишдюан олдин сўнгги 5 кун ичида 200 минг сўмдан кўпроқ пул тўлаб, (20 АҚШ долларидан кўпроқ) коронавирусга тест топширишлари керак эди.

Ушбу тест талаби бекор қилинди.

Расмийлар пандемия шароитида фуқароларнинг имкониятларидан келиб чиқиб, шундай қарорга келинганини айтишган.

Эндиликда ўзини соғлом ҳис қилган одам мамлакат ичида жамоат транспортида ҳаракатланиш учун тест топширмайди.

Бироқ учоқда (яъни самолётда) ва поездда йўловчилар орасида масофа сақланиши, ниқоб тақиш ҳамда транспорт воситаларини зарарсизлантириш чоралари кўрилади.

Кичик бизнес ва ёш болали оилалар

Президент Мирзиёев янги фармонга имзо чекиб, 1 июндан то 1 сентябрга қадар кичик бизнесларни мол-мулк солиғидан озод қилди ва ижтимоий солиқ ставкасини бир фоизга туширди.

Кун.уз нашрининг ёзишича, кичик тадбиркорлик субъектлари, бозорлар ва савдо мажмуалари, умумий овқатланиш жойлари, жамоат транспорти такшилотлари, спорт ва соғломлаштириш муассасалари ҳамда кинотеатрлар ушбу имтиёздан фойдалана олади.

Фармон кичик тадбиркорлик субъетларидан қатор қўшимча солиқ, жарима ва пеняларни ундириш ҳам кечиктирилишини кўзда тутади.

Шунингдек, келаётган июнь ойидан бошлаб 14 ёшгача фарзанди бўлган ёки қарамоғида 2 ёшга тўлмаган гўдаги бор оилаларга бериладиган ёрдам ҳам 10% кўпайиши кутилмоқда.

Сардоба жабрдийдаси: Ёрдам пули беришармикан?

Президент мукофоти ўрнига тазйиқми?

Коронавирус ўзимизники бўлиб қолади

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek