Коронавирус: Хитойдан келган Ўзбекистон фуқароларини вазир самолётга чиқиб кутиб олди -O'zbekiston

Ўзбекистон Хитойдаги фуқароларини чартер рейслар билан олиб келишни бошлади. Пекиндан келган дастлабки рейсни Соғлиқни Сақлаш вазирининг ўзи бортга чиқиб кутиб олган. Ўзбекистонга қайтган 250 фуқаронинг ичида короновирусга гумон қилинаётганлари йўқ.

Пекиндан келган дастлабки рейс 4 феврал куни маҳаллий вақт билан 17:21да Тошкент халқаро аэропортига қўнди.

Би-би-си манбасининг айтишича, Хитойдан эвакуация қилинган фуқароларни кутиб олиш учун самолёт бортига биринчи бўлиб Соғлиқни сақлаш вазири Алишер Шадманов кирган.

Вазир Ўзбекистон фуқароларига нима учун Хитойдан олиб келингани ва энди уларга қандай муносабатда бўлишлари ҳақида тушунча берган, бортдаги Ўзбекистон фуқароларининг кўнглини кўтарган.

Шундан сўнг Пекиндан учиб келганлар самолёт бортидан бирин-кетин тушган, пастда уларни махсус форма ва ниқоб тақиб олган тиббиёт ходимлари кутиб олган.

Улар Хитойдан келган фуқароларни микроб ва касаллик қўзғатувчи бактерияларга қарши махсус суюқлик билан дезинфекция қилган.

Санитария-эпидемиологик осойишталик агентлиги масъули Нуриддин Тошбоевнинг айтишича, Хитойдан самолётда учиб келганларнинг устига сепилган махсус суюқлик таркибида хлор сақловчи ва микробларга қарши бошқа бирикмалар бор.

Унинг таъкидлашича, ушбу чоралар Жаҳон Соғлиқни сақлаш ташкилоти тавсиялари ва тиббий санитария қоидалари асосида кўрилмоқда.

Би-би-си манбасининг айтишича, 5 февралга ўтар кечаси Тошкент вақти билан тунги 2:30 Хитойдан яна бир рейсни кутиб олишга тайёргарлик кўрилмоқда.

Ушбу чартер рейс короновируснинг ўчоғи бўлмиш Ухандаги Ўзбекистон фуқароларини олиб келади.

Хитойдан олиб келинаётган Ўзбекистон фуқаролари 2 ҳафта Тошкент вилоятидаги 6-сонли юқумли касалликлар шифохонаси ва "Бўстон" санаториясида карантинда бўлади.

Шу давр якунига қадар ҳарорати кўтарилган ёки бошқа касаллик аломатлари юзага келганда зудлик билан алоҳидалаш, махсус лаборатория текширувидан тўлиқ ўтказиш ҳамда даволаш ишлари учун барча зарур чоралар кўрилгани айтилмоқда.

Карантин давомида Хитойдан келганларнинг оила аъзолари билан учрашиши тақиқланади.

Яқинлари билан фақат махсус телефон алоқаси орқали мулоқот қилиши мумкин бўлади.

Соғлиқни сақлаш вазирлиги матбуот хизматининг айтишича, ҳозирча Хитойдан келган фуқароларнинг ичида коронавирусга гумон қилинганлар йўқ.

Расмий манбаларда Хитойда яна қанча Ўзбекистон фуқароси борлиги айтилмаяпти.

Ўзбекистон фуқароларнинг Хитойда коронавирусга чалингани ҳақида ҳам расмий маълумот йўқ.

Хитойнинг Ухан шаҳрида декабр ойининг сўнггида аниқланган ҳалокатли коронавирус касаллигига шу вақтгача 20 минг одам чалинган.

Ҳалок бўлганлар сони 427 нафарга етди.

Жаҳон соғлиқни сақлаш ташкилоти коронавирус ҳозирча жаҳон миқёсида ёйилиб пандемик эпидемия босқичига етмаганини маълум қилди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek