Ўзбекистон, Президент Мирзиёев: "...рўмолга ҳеч ким қарши бўлмайди Ўзбекистонда!"

Президент Шавкат Мирзиёев айтишича, Ўзбекистонда аёлларнинг ўзбекона рўмоллар, ўзбекона либосларда юришларига ҳеч ким қарши бўлмайди.

30 сентябр куни Президент Мирзиёев бокс бўйича жаҳон чемпионатида олтин, кумуш ва бронза медалларини қўлга киритган боксчилар, уларнинг устозлари, ота-оналари билан учрашди.

Учрашувда Фарғона вилояти Қува тумани, Қайрағоч қишлоғида яшайдиган Мирзаҳалилов Миразизбекнинг онаси ҳам иштирок этди ва Президент Мирзиёевга ўз миннатдорлигини изҳор этди.

Боксчи онасининг рўмолли чиқишига муносабат билдирган Президент Мирзиёев ўзбекона рўмол, ўзбекона кийиниш ҳақида гапирди.

"Қандай ярашади ўзбекона рўмоллар? Қандай ярашади ўзбекона кийинишларимиз? Ҳеч ким ҳеч балога ҳеч қачон қарши бўлмаган. Мана шу сизнинг туришингиз менга Ўзбек тимсоли. Мана шу рўмолингиз мен учун муқаддас Ўзбек онасининг тимсоли. Мана шу рўмоллар бизнинг буюклигимиз, самимийлигимиз, ўзлигимизни англаш тимсоли. Мана шундай меҳрли онамиз, сингилларимиз мана шундай юришига ҳеч ким ҳеч қачон қарши бўлмаган, бўлмайди ҳам Ўзбекистонда", деди Президент Мирзиёев.

"Мана ҳаммамизнинг бувиларимиз ўтган. Ҳаёт оналаримиз бор. Уларнинг кийинишига қараб ҳаммамиз ҳавас қиламиз. Бу кийиниш - керак бўлса, бу маданият. Бошқа давлат аёлларига ҳам намуна", деди Ўзбекистон раҳбари.

Бир кун олдин Фарғона вилояти ҳокими Шуҳрат Ғаниевнинг шов-шувли аудио ёзуви тарқалди.

Шуҳрат Ғаниев раислик қилгани ишонилган мажлисда ёзиб олинган ёзувда вилоят ҳокими Фарғонадаги иш жойларида намоз ўқиш учун шароит яратилган ҳолатлар аниқланса, ўша корхона раҳбарига жиноят иши очилишини айтган.

У, шунингдек, унинг олдида ким бўлишидан қатъи назар, рўмол ўраб олган аёлга кўзи тушса, рўмолни ўша туман ҳокимининг оғзига тиқиб қўйиш билан таҳдид қилган.

Ҳоким, ҳижоб маданиятига риоя этмаётган аёллар аниқланиб, 300 нафарининг ташқи қиёфаси ўзгартирилди, деб ҳисобот берган.

Фарғона вилоят ҳокими вилоятга келган меҳмонларнинг ҳам соқолини олишни талаб қилган.

Шунингдек, у Марғилонда лозим, яктак ва бошига дўппи кийиб ётган беморни кийими учун шифохонадан чиқариб юборганини айтиб мақтанган.

30 сентябр куни Ўзбекистон Олий Мажлиси Сенатининг Регламент ва одоб комиссияси сенатор Шуҳрат Ғаниевнинг масаласини муҳокама қилди.

Сенат комиссияси йиғилишида Шуҳрат Ғаниев қатъий огоҳлантирилган.

У айбини тан олган, қизишиб кетгани, ҳар қандай жазога лойиқ эканини айтган, ўзини яна бир марта кечиришларини сўраган.

Сенат Регламент ва одоб комиссияси Шуҳрат Ғаниевга уч ойлик муҳлат бергани хабар қилинди.

Ўзбекистонлик таниқли блоггер Хушнудбек Худoйбердиев Президент Мирзиёевнинг боксчилар билан учрашуви ҳақидаги фикрлари билан ўртоқлашди:

"1. Боксчимиз Мирзахалилов Миразизбек фарғоналик, унинг оналари рўмолда сўзга чиқди. Бу ҳам катта мажозий маънога эга;

2. Президентнинг "ижтимоий тармоқларда кўп масалалар кўтариляпти" деган гапи, унинг жамиятда бўлаётган воқеалардан хабардорлигига ишора бўлди. Яъни Президентга ижтимоий тармоқларнинг энг қайноқ муҳокамаларини етказиб турувчи жамоа жуда яхши ва тезкор ишламоқда;

3. Президентнинг мазкур 40 сониялик нутқи жамиятдаги иккиланишларга нуқта қўйди. "Қандай ярашади ўзбекона рўмоллар, қандай ярашади ўзбекона кийинишларимиз" деган гап келгусида аёлларнинг рўмол ўрашига қарши чиқадиганларнинг барчасига мораторий сифатида янгради;

4. Аслида барчаси қонунларда мустаҳкамланган, ҳеч ким аёлларнинг рўмолини ечтиришга ҳақли эмас. Аммо бизнинг жамиятда ижрочилар қоғоздаги қонунлардан кўра сиёсий иродага қараб иш тутиши барчамизга маълумку. Мана шундай жамиятда Президентнинг бугунги қисқа нутқи амалий жиҳатдан жуда катта қийматга эгалигини тасаввур қилиш қийин эмас. Энди кимнинг ҳам ҳадди сиғарди рўмолга тегишга?!"

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek