Ўзбекистон: Тошкент Марказий Осиёнинг молиявий марказига айланадими?

Ўқилиш вақти: 1 дақ

Ўзбекистон ўзининг капитал бозорида сармоялар йўлидаги тўсиқлардан имкон қадар тезроқ қутулмоқчи ва айни мақсадда замонавий молиявий воситаларни ишга туширишни бошлаган.

Бу ҳақда Капитал бозорини ривожлантириш агентлиги директори Отабек Назиров Лондондаги тақдимот маросимида гапирган.

Унинг фикрича, мамлакат қимматбаҳо қоғозлар бозорида бошланган ислоҳотлар пировардида Тошкентни минтақанинг молиявий марказига айлантириши кутилади.

Назировга кўра, ҳозирда Ўзбекистондаги ҳар бир йирик ширкат маҳалий бозорда ўзининг кўпроқ ҳиссаларини сотувга чиқаришга ҳаракат қилмоқда.

Унинг тан олишича, ҳиссадорлик ширкатларида давлат улушининг катталиги жиддий муамммо ва Ўзбекистон ҳозирда бу улуш нисбатини сезиларли даражада камайтириш йўлида қадамларни қўйишни бошлаган, жумладан, давлат улуши бўлган юзлаб корхоналар сотувга қўйилган.

Ўзбекистоннинг Буюк Британиядаги элчихонаси билан ҳамкорликда ўтказилган маросимда Ўзбекистон капитал бозори ва умуман, иқтисодиётида кечаётган ўзгаришлар борасида ғарблик банкирлар, экспертлар ва инвесторларга батафсил маълумот берилган.

Шу йил февралида Ўзбекистон Лондон биржасида ўзининг 1 миллиард долларлик евробондларини жойлаштирганди.

Ўзбекистон 1 миллиард долларлик евробонд чиқаргани нимани англатади?

Skip Энг кўп ўқилган and continue reading
Энг кўп ўқилган

End of Энг кўп ўқилган

Ўзбекистон Молия вазири: "Молия соҳасида қилганимиздан кўра, қилишимиз керак бўлган ишлар кўпроқ"

Мирзиёев Рустам Азимов эгаллаган лавозимни тугатди

5 йиллик 500 миллион доллар ҳамда 10 йиллик 500 миллион долларлик евробондларга талаб катта бўлган ва хорижлик экспертлар Ўзбекистоннинг жаҳон молия бозоридаги дебютини муваффақиятли дея баҳолаганлар.

Ўзбекистон акцияларини жойлаштиришда Morgan Chase, Citibank ва "Газпромбанк" иштирок этган.

Ўзбекистон 2020 йилда яна бир марта еврооблигациялар жойлаштиришни мўлжалламоқда.

АҚШда таҳсил олган ва Голдман Сакс (Goldman Sachs Group) ҳамда Европа Тикланиш ва Тараққиёт банкларида фаолият юритган Отабек Назиров ўтган йил майида Ўзбекистонга қайтган ва шу йил бошида янги ташкил этилган Капитал бозорини ривожлантириш агентлиги директори этиб тайинланганди.

Би-би-си Отабек Назиров билан Ўзбекистон иқтисодиёти ва молия тизимида кечаётган ислоҳотлар ҳақида суҳбатлашди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek