Дунё, янгиликлар: Кремл боши берк кўчада ва Украина паспорти керакми?

Times: Кремл боши берк кўчага кириб қолди

Сешанба куни Кремл бир ой давомида Москвада бўлиб ўтган бир неча оммавий намойишлар юзасидан изоҳ берди. Россия президенти матбуот котиби Дмитрий Песков журналистлар билан учрашув чоғида Кремл намойишчиларга қарши ҳаддан зиёд куч ишлатилишини ёқламаслиги, аммо кучишлатар тизим ходимларининг оммавий тартибсизликлар олдини олишга қаратилган қаттиққўл хатти-ҳаракатларини тўғри, дея ҳисоблашини маълум қилди.

Ўзбекистон: Доллар кўтарилмоқда, нима бўлади?

Дунё, Янгиликлар: Масжид ҳужумчисига террор айби, Россия қандай қуролни синамоқда?

Қирғизистон: собиқ президент одам ўлдирганми?

Times нашрининг ёзишича эса, Москва кўчаларида тинмаётган норозилик ҳаракатлари ортидан Кремл боши берк кўчага кириб қолган. Нашр илгари сурган фикрларга кўра, президент Путин олдида икки йўл турибди: ўзгача фикрловчи фуқаролар овозини репрессия йўли билан ўчириш ёки муросага бориш.

Россия етакчиси, катта эҳтимол ила, кичик муросалар ўз рақиблари томонидан янада кўпроқ босим ортишига олиб келишидан хавотирланмоқда. Бироқ репрессияни ишга солиш йўли - ўта хатарли. Ушбу ёз ҳукумат қаттиққўллиги ўзгача фикрловчилар овозини ўчирмаслиги, қайтанга уларни озиқлантираётганини кўрсатди, дея ёзилади Times мақоласида.

Зеленский россиялик сиёсий қочоқларга фуқаролик беришни осонлаштирди

Украина президенти Владимир Зеленский, ўз ваъдасига кўра, расмий Киев фикрича сиёсий таъқибларга учраган россияликларга фуқаролик бериш тизимини соддалаштирди.

Президент фармонида ушбу қарор инсон ҳуқуқлари ва ҳурлигини муҳофаза этиш мақсадида олингани айтилади.

Қарорга биноан Украина паспортини олиш учун россияликлар ўзининг биринчи фуқаролигидан воз кечиши ва сиёсий таъқибга учраётганидан далолат берувчи ҳужжатларни тақдим этиши зарур. Украина Ташқи ишлар вазирлиги, Украина дипломатик ваколатхонаси ёки консуллиги бундай ҳужжатни тайёрлашга асос бўлувчи маълумотнома бериши мумкин.

Зеленский, шунингдек, соддалаштирилган кўринишда сиёсий бошпана тақдим этиш тўғрисида қонун лойиҳасини ишлаб чиқишга ҳам кўрсатма берган.

Шу йилнинг апрель ойида эса президент Владимир Путин Украина шарқидаги Донетск ва Луганск вилоятлари аҳолисига Россия фуқаролигини бериш тизимини соддалаштириш тўғрисидаги фармонга имзо чеккан эди.

Атамбоев давлат тўнтариши уюштиришда айбланмоқда

Қирғизистон Миллий хавфсизлик қўмитаси раҳбари Ўрозбек Опумбаев собиқ президент Олмосбек Атамбоевни давлат тўнтариши уюштиришга тайёргарлик кўришда айблаб чиқди.

"Атамбоев кейинги қадам мажбурий ҳибсга олиш бўлишини кутган. У ўз уйи ҳудудида қариялар, болаларни ушлаб турган, уларга ҳақ тўлаган… Тўқнашув бўлишини кутган. Унга қон керак бўлган. Давлат тўнтаришини амалга ошириш учун қон керак бўлган - шунда у айбни ҳукуматга ағдарган бўларди," таъкидлаган Опумбаев матбуот конференциясида.

Ўрозбек Опумбаев уйни қамал қилиш вақтида Атамбоевнинг шахсан ўзи махсус гуруҳ аъзоларига қарата ўқ узгани ва ҳалок бўлган ҳуқуқни муҳофаза қилиш органлари вакили собиқ президентнинг уйидан топилган қурол билан отилганини билдирган.

Олмосбек Атамбоевнинг ўзи тарафдорлари қўлида ҳеч қандай қурол бўлмаганини таъкидлаган, аммо унинг ўзи қурол ишлатганини инкор этмаган.

Кейинроқ расмийлар Атамбоевга қарши оммавий бетартибликлар келтириб чиқариш, одамларни асирга олиш, ҳукумат вакилларига қарши куч ишлатиш ва қотиллик айбловлари илгари сурилганини тасдиқлаган. Эндиликда, собиқ президент умрбод озодликдан маҳрум этилиши мумкин.

Британиялик учувчилар энди соқол қўйиши мумкин

1 сентябрдан бошлаб Буюк Британия Қироллик ҳаво-кучлари ҳарбийларига хизмат вақтида соқол қўйиб юришга рухсат берилди.

Қироллик ҳаво-кучлари вакилининг сўзлашича, бунга қадар маълум сабабларга кўра соқол тақиқ остида бўлган. Аниқроқ айтганда, соқол кислород ниқоблари ва бошқа нафас олиш аппаратларидан фойдаланган вақтда халал бериши мумкин. Нафас олиш аппарати кислород сизиб чиқиши олдини олиш мақсадида учувчи юзига жипс ёпишиши лозимдир.

Бироқ замонавий кислород ниқобларидан, ҳатто, ўсган соқол билан ҳам фойдаланиш мумкин.

Бир вақтнинг ўзида британ расмийлари учувчилар соқолининг дид билан тарашланган бўлишини талаб қилмоқда.

Авваллари британиялик ҳарбий хизматчиларга фақат диний ёки шифокор кўрсатмаси билан саломатликка оид сабаблар асосида соқол қўйиб юришга рухсат берилган эди.

Буюк Британия пиёда қўшинлари жангчилари эса, ҳозирча, мўйлов ўстириш ҳуқуқига эга, холос. Фақат тезкор амалиётлар чоғидагина истиснога йўл қўйилиши мумкин.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek