Швейцария суди Гулнора Каримова пулларини қайтаришни вақтинча тўхтатди

Швейцариянинг федерал жиноий суди Гулнора Каримовага алоқадор деб ишонилган банк ҳисобларидаги 550 миллион Швейцария франки (557,8 миллион доллар)ни Ўзбекистонга қайтишини вақтинча тўхтатиб қўйди.

Бу ҳақида қатор агентликлар хабар бермоқда.

Гулнора Каримованинг адвокати Грегуар Манже Твиттердаги постида суд қарорини "катта ғалаба" дея таърифлади.

Ўзбекистон бизнинг мижозимизни ўзбошимчалик билан ушлаб туришни тўхтатмагунча, бу давлат билан ҳамкорликни тўхтатиб турилсин. Унга нисбатан кўпроқ босим ўтказилсин", - деди Манже ўз твитида.

Ўзбекистон Адлия вазирлиги чоршанба куни чиқарган баёнотида Каримовага қамоқхонада ёмон муносабат қилинаётгани бўлганлиги ҳақидаги онлайн хабарлардан сўнг, у жазо муддатини ўтаётган аёллар қамоқхонасида текширув олиб бораётганини эълон қилди.

Ўзбекистон матбуоти: Гулнора Каримова сақланаётган қамоқхонадан аёллар озод этилиши нимани англатади?

Ўзбекистон, Бош прокуратура: Гулнора Каримова пулларининг қайтарилишида шаффофлик таъминланади

Ўзбекистон: Гулнора Каримова, Мансур Мақсудий ва Coca-Cola можаросига Мирзиёев қарори алоқаси қандай?

Швейцария Бош прокуратураси 2012 йилда Каримованинг шахсий ёрдамчиси ва Россия телекоммуникация компаниясининг ўзбек филиали бош менежери томонидан амалга оширилгани ишонилган шубҳали молиявий фаолиятни текшира бошлаган.

Кейинчалик прокуратура текширувлари Каримованинг икки ишчиси, унинг қариндоши ва Каримованинг ўзини ҳам ўз ичига олган.

Собиқ президент Ислом Каримовнинг қизи Женевадаги Бирлашган Миллатлар Ташкилотида Ўзбекистоннинг доимий вакили сифатида дипломатик иммунитетга эга эди, аммо у 2013 йилда суд томонидан бекор қилинган.

Июнь охирида Каримова ўз қизи Имоннинг Инстаграм саҳифаси орқали баёнот чиқариб иқтисодий жиноятларни қисман бўйнига олган ва шу кунгача унга тегишли 1,2 миллиард доллар Ўзбекистон бюджетига қайтарилганини билдирган.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.