Ўзбекистон - Россия, Алишер Усмонов: Мирзиёев Горбачёв эмас

Жорий йилда "Форбс" нашри йил бизнесмени сифатида асли ўзбекистонлик миллиардер, USM Holdings ва бошқа қатор йирик ширкатлар эгаси Алишер Усмоновни танлади.

Шу муносабат билан "Форбс" миллиардер билан интервью уюштирди.

Интервью давомида Алишер Усмонов шахсий ҳаёти ва Ўзбекистоннинг янги раҳбарияти билан алоқалари борасидаги қатор саволларга ойдинлик киритиб ўтган.

Алишер Усмоновнинг сўзлашича, у бизнесдан деярли кетмоқда ва эндиликда ҳаётини хайрия ишлари ва илм-фанни ривожлантиришга сарфламоқчи.

"Мақом ва ёш жиҳатдан пенсионерман," дейди у.

Бизнесингизни жиянларингизга қолдиришни режалаштиряпсизми, деган саволга Алишер Усмонов шундай жавоб қайтарган: "Агар улар ақл билан иш қилсалар, албатта акционерга айланишлари мумкин. Барибир қўл остимдаги пакетни ёш менежерларга қолдиришни бугунги кунда ҳақиқатга энг яқин вариант сифатида кўряпман."

Алишер Усмонов ўзига тегишли ширкатлар Тошкентда қурилаётган металлургия заводи ва Олмалиқдаги рангли металлургия саноати бўйича лойиҳаларда қатнашаётганини маълум қилган.

"Путин рўйхати"га Алишер Усмонов ва Искандар Маҳмудов ҳам кирди

"Мирзиёев хавфсизлик сабаб Алишер Усмонов самолётини ижарага олган"

Ўзбекистон ҳукумати 2019 йилда халқ учун биринчи галда нима қилмоғи лозим?

'Қийшиқ кўзгулар мамлакатиʼ

"Форбс" журналисти Алишер Усмоновдан сиёсатшунослардан бирининг президент Мирзиёевни "ўзбек Горбачёви", деб атагани юзасидан фикрини сўраган.

"У Горбачёв эмас. Горбачёвдан фарқли ўлароқ у ўз мақсадларида қатъий. У ҳақиқий ватанпарвар ва ҳеч қачон Ўзбекистон давлатининг емирилишига йўл қўймайди. Уни ҳеч ким билан солиштириб бўлмайди," дея жавоб қайтарган миллиардер.

(Марҳум президент Ислом Каримов даврида - таҳр.) амалда ҳамма нарса давлатнинг қўлида қолганди. Советлар Давлат режасига асосланган давлат капитализми амал қиларди, деркан, Алишер Усмонов бундай мерос қолган мамлакатда янги давлат раҳбари Шавкат Мирзиёев сиёсатда ҳам, иқтисодиётда ҳам кескин ўзгаришларга қўл ураётгани ҳақида гапирган.

"Иқтисодиётда эҳтиёткор бўлиш лозим, у узоқ вақт қийшиқ кўзгулар мамлакатида яшади."

Бундан ташқари, Алишер Усмонов жияни Сарварнинг никоҳ тўйида ёшларга қилган мурожаати борасида ҳам аниқлик киритиб ўтган.

Ўтган йили бўлиб ўтган ушбу тўйда Алишер Усмонов ёшларнинг барча йўллари очиқлиги, президентнинг ўзи уларга ёрдам бериши, агар ўз даврида бошқа ўзбек миллиардерлари Фаттоҳ Шодиев ва Искандар Маҳмудовлар қўлида шундай имконият бўлганда, улар бирга "дунёни тескари айлантириб юборган бўлиши" ҳақида гапирган эди.

"Ҳа, шундай деганман. Ҳозир ҳақиқатан бизнес учун барча имкониятлар мавжуд. Ўзбек халқи доно халқ, ўйлайманки, у бу имкониятлардан фойдалана олади. Мен эса қўлимдан келганча, кўмаклашаман."

Шунингдек, Алишер Усмонов Фаттоҳ Шодиевнинг акасига тегишли SFI гуруҳи яқинда "Пахтакор" футбол клубининг 80 фоиз акциясини сотиб олганини ҳам маълум қилган.

Алишер Усмоновнинг сўзлашича, у Ўзбекистонда кенг хайрия ишларини олиб бормоқда. Жумладан, у Тошкентда қурилаётган Ислом таммадуни марказига $100 миллион маблағ киритгани, Жаҳон Банки билан ҳамкорликда Ўзбекистон қишлоқларини обод қилиш дастурини бошлагани ва бу лойиҳага ҳам $100 миллион ажратганини айтган.

"Келгуси йилнинг охирига қадар Ўзбекистонга, умумий ҳисобда, $300-400 миллион маблағ киритамиз," дейди у.

'Ҳукумат ёрдамчисиʼ

Алишер Усмонов Ўзбекистон келажаги президент Мирзиёев олиб бораётган ислоҳотларнинг қай даражада муваффақиятли якун топишига боғлиқ эканлиги ва у ватанининг тақдирига бефарқ бўлмагани сабабли ҳам, ўзини ҳукуматнинг ёрдамчиси сифатида кўриши, бошлаган ишини охирига етказиши йўлида президентга ёрдам беришга тайёр эканини айтган.

Миллиардер Шавкат Мирзиёевнинг президент сифатида амалга оширган бирламчи ижобий иши Марказий Осиёга тинчликни қайтарганидир, деган у.

Тошкентнинг Вашингтон ва Москва билан тенг дўстлик ришталарини ўрнатаётгани, Афғонистондаги тинчликни тиклашга катта ҳисса қўшаётганини алоҳида эътироф қилмоқ лозим, дея фикрлайди Алишер Усмонов.

Алишер Усмонов келажакда Ўзбекистонда ҳам, Россияда ҳам бизнес билан шуғулланишни истамаслигини айтади.

Маълум бўлишича, Алишер Усмонов нафақат Ўзбекистон, балки Татаристон ва Қозоғистонда ҳам масжид-мадрасалар қурмоқда ёки қурилишларга ҳомийлик қилмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek