Ўзбекистон, мода ва бизнес: Гулнора Каримова ўрнига ким келди?

Ёрқин ранглар, каштачилик санъати ва қўлда ишланган матолар - Ўзбекистонда мода саноатини ривожлантириш учун асослар аллақачон етарлидек...

Аммо Ўзбекистоннинг ҳозирда марҳум президенти тўнғич қизи Гулнора Каримованинг узоқ йиллик мопополиясидан кейин мамлакат ўз мода саноатини тўлиғича ривожлантира оладими?

Би-би-си мухбири Бен Тавенер Ўзбекистонда экан икки маҳаллий дизайнер - Тошкентда Саида Амир ва Самарқандда Елена Ладик билан шу хусусда суҳбатлашган.

Модалар намойишига бағишланган "Дейли фронт роу" журнали мухбири билан 2010 йилги суҳбатида Гулнора Каримованинг ўзи Ўзбекистондаги модани ҳали ёш ва янги деб атаган, мамлакатдаги моданинг бугунги аҳволини чақалоқнинг тетапоясига қиёслаганди.

Гулнора Каримова ўз вақтида Ўзбекистонда сиёсатчи, шоира, қўшиқчи, дизайнер ва заргар сифатида танилган.

У орада айрим журналлар рейтингида машҳурлик бобида отаси, ҳозирда марҳум Ўзбекистон президенти Ислом Каримовдан ҳам ўзиб кетганди.

Бу ҳақда 2012 йилда ўзбекистонлик сиёсатчилар рейтинги бўйича мониторинг ўтказган "Биржевой Лидер" журнали эълон қилган.

"Биржевой Лидер"нинг рейтинги эса, Россиядаги "Яндекс" интернет қидирув тизимида фойдаланувчилар томонидан қидириб кўрилган сўзлар ва "Яндекс"даги янгиликларда бирор бир номнинг пайдо бўлиши асосида тузилади.

Ўзбекистон Бош прокуратураси ўтган йил чиқарган баёнотда Гулнора Каримова 2015 йилда фирибгарлик, солиқ қонунчилигини бузиш, хорижий валютани яшириш, савдо қоидаларини бузиш, ҳужжатларни қалбакилаштириш ва жиноий йўл билан олинган даромадларни қонунийлаштиришда айбдор деб топгани айтилган.

Прокуратура баёнотига кўра, Гулнора Каримова 2015 йилда 5 йилга озодлиги "чекланган".

Би-би-си манбасига кўра, Каримовага соат 21:00дан кейин уйидан чиқмаслик, ҳамда жамоатчилик йиғинларида қатнашмаслик шарти қўйилган.

Беннинг Ўзбекистондан тайёрлаган тўлиқ репортажи билан мана бу ерда танишиш мумкин:

Ўзгараётган Ўзбекистон: Шавкат Мирзиёев Ислом Каримов диктатураси асоратларини фақат туризм билан арита оладими?

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek