Пора олишда айбланган ИИБ терговчиси 'қийноққа солинган'

Наманган туман ИИБ тергов бўлими бошлиғи Ғолибжон Ўринбоевнинг яқинлари унинг пора олганлик айбига иқрор бўлиш учун қийноққа солинганини даъво қилишмоқда.

Яқинларига кўра, шу йилнинг 26 июль куни Наманган туман прокуратураси ходимлари томонидан қўлга олинган терговчи ечинтирилган ва бинонинг 2-қавати деразасидан "итариб юборилган".

Терговчи ҳушсиз ҳолда реанимация бўлимига ётқизилган. Аммо шифокорларнинг муолажани нейрохирургияда давом эттириш кераклиги ҳақидаги тавсиясига қарамай, Ўринбоев сўроқ қилиш учун олиб кетилган ва эҳтиёт чораси қўлланиб, Уйчи туманидаги қамоққа жойлаштирилган.

Ғолибжон Ўринбоев пора олганини рад этган.

Би-би-сига етиб келган аризадан англашилича, аризаси Р.А. исмли шахс пора берганини рад этмоқда.

Пора сифатида берилгани даъво қилинган 500 АҚШ доллари эса "топилмаган".

"Ўлмаган одамни ўлдирди, деб укамни қидирувга беришди"

ИИВдаги қотиллик: гумондор қамоқда, унинг ўзини ўлдиришга урингани рад этилди

Аммо ҳозирда иккала шахс ҳам қамоқда.

Би-би-си жиноят иши юзасидан Бош прокуратурага мурожаат қилди.

Бош прокуратура матбуот хизмати Ўринбоев яқинларининг иддаоларини рад этди.

Бош прокуратурага кўра, Ўринбоевнинг пора олгани аризачи ва гувоҳлар кўрсатмалари орқали тасдиқланган.

Бош прокуратура Ўринбоевнинг "жиноий жавобгарликдан қутулиш мақсадида 1-қават деразасидан ўзини ташлаб, қочишга урингани"ни айтган.

Прокуратура жиноят ишидан шикоят қилган Ўринбоев яқинларини "безорилик ҳаракатлари"да айблаган.

Бош прокуратура жиноят иши юзасидан дастлабки терговни ўз назоратига олганини айтмоқда.

BBCUZBEK.COM билан Telegram орқали +44 7858860002 номери билан боғланинг.Telegram каналимиз: @bbcuzbek