'Қаҳрамон Қуронбоев ҳоким бўлиши керак'

Ижтимоий тармоқларда Ёшлар Иттифоқи етакчиси Қаҳрамон Қуронбоевнинг Наманганда келин-куёв кортежини тўхтатиб, уларни таксига ўтқазиб юборгани ҳақидаги сўзлари ортидан бошланган муҳокамалар тўхтамаётир.

Мирзиёев маслаҳатчиси Қуронбоевнинг қайси гапи рост?

Блогер Шаҳноза Тўрахўжаева ушбу ҳодиса боис Президент Шавкат Мирзиёевнинг кадрлар сиёсатини бир нави савол остига олган.

"Менимча, Қаҳрамон Қуронбоев бирон вилоят ҳокими бўлиши керак. Кўп йиллар раҳбар лавозимларда ишлаган, бошқарув илмини сув қилиб ичиб юборган, буйруқларни тўғри берадиган ва уларни бажармагунларича қўймайдиган қаттиққўл ва тажрибали раҳбарга талаб ҳамиша бор. Фақат... ёшлар нозик масала-да..." - деб ёзди блогер ўзининг Фэйсбукдаги саҳифасида.

Унинг фикрича, ёшларни "қўрқитадиган эмас, бағрига босадиган, тушунтирадиган, ишонтирадиган етакчи (ёшидан қатъи назар) керак".

Эскича мафкура

Шаҳноза Тўрахўжаева ўз блогпостида Ёшлар Иттифоқининг бутун мамлакатдаги ёшлар устидан монополиясига ҳам қарши чиққан. Унинг ёзишича, ёшлар ташкилотлари кўп бўлиши керак.

"Биргина ташкилот бутун мамлакат ёшларини бирлаштириб, уюштириб олиши мумкин эмас. Ёшларни ягона ғоя атрофида бирлаштиришга уриниш - абсурд. Ёшлар манфаатлари кесишган нуқтада бирлашиши мумкин (айниқса, ҳозирги ёшлар), лекин уларни битта ғоя учун бирлаштириш, яъни бир хилда ўйлашга мажбур қилиш - утопия", - деб ёзади у.

Блогернинг фикрича, Ёшлар Иттифоқининг номи ўзгаргани билан мафкураси ўзгармаган.

"Ёшлар Иттифоқи ватанпарварлик, фидойилик каби «Камолот»дан мерос идеологиядан воз кечиб, тараққийпарварлик, илм-фанда илғорлик, инсон қадри каби замонга мос, янги авлод ёшларини яратувчанликка ундайдиган мафкурани яратганида, ёшларнинг янада кенгроқ қатламларини қамраб олган бўларди", дейди у.

Муаллиф шунингдек, Ёшлар Иттифоқининг "уюшмаган ёшлар" назариясининг тўғрилигини ҳам савол остига олган.

Унинг фикрича, ёшлар уюшмаса фожиа эмас, ёшлар ўйламаса - фожиа.

"Дунёда миллиардерлар, олимлар, сиёсатчилар, лидерлар тобора "ёшариб" бораётган бир даврда биз ёшларга ҳамон тўйини қандай ўтказишни ўргатиб юрибмиз. Сабаби, бу ёшлар ҳаётида фақат шу бир кун - тўй учун яшайди, фақат шу куни ўзининг нақадар аҳамиятли эканини, тирик эканини ҳис қилади. Шу кунини имкон қадар ёрқин қилиш бошқалардан зўрроқ, "крутойроқ" эканини кўрсатиш улар учун умр мазмунига айланади. Бошқа кунлар эса улар бирон оламшумул ғоянинг бўлажак муаллифи, дунёни лол қолдиришни истайдиган улкан амбицияли шахс эмас, шунчаки уюшмаган ёш бўлиб қолаверади. Ёшларга тўйдан кўра аҳамиятлироқ идеологияни беролмас эканмиз, кортежлар йўлини тўсгандан фойда йўқ", - деб ёзган Шаҳноза Тўрахўжаева.

Бўлинишлар

Ҳодиса борасидаги баҳсларга қўшилган яна бир блогер Диёр Имомхўжаев эса Ёшлар Иттифоқининг механизми қанчалик тўғри, деган саволни қўяди.

"Ёшлар Иттифоқи битта ва унга ажратилган каттагина маблағ мавжуд. Агар бизда унинг каби яна 2—3 ташкилот бўлганида, вазият бироз бошқача кўриниш олиши мумкин эди. Қуронбоев ҳам, унинг иттифоқчилари ҳам ким биландир ҳисоблашарди, рақобатда ютиш учун интиларди. Ҳозирги ҳолатда эса улар ўз йўналишида монопол. Шунинг учун ҳам Иттифоқ аъзоларининг ҳаммасини иқтидорли, унга аъзо бўлмаганларни иқтидорсиз дея олмайсиз", - деб ёзди Имомхўжаев Фэйсбукдаги саҳифасида.

Унинг фикрича, сўнгги ҳодиса жамиятдаги бўлинишларни ўртага чиқарган.

"Мен Ёшлар Иттифоқи ёмон ишлаяпти, нотўғри ишлар қиляпти демоқчи эмасман. Аммо у қанчалик тўғри йўлда эканини ҳеч бўлмаганда ўзи учун билиб олиши йўлида ҳам рақобатчилари керак, оппозиция керак. Ҳозирги ҳолат эса жамиятни тенг иккига бўлиб қўяётгани учун ҳам хавфлидир", - дейди блогер.

'Йўлтўсар раис'

Эслатиб ўтамиз, 5 июнь куни журналистлар билан учрашган Қаҳрамон Қуронбоев водийда келин-куёв кортежини тўхтатиб, уларни таксига ўтқазиб юборгани ва қолган машиналарни ҳибсга олдирганини айтганди.

Ижтимоий тармоқларда ёшлар етакчисининг бу ҳаракати кескин танқидларга сабаб бўлган.

Ўзбекистонликлар Қуронбоев ёшларнинг орзусини чилпарчин қилгани ва инсон ҳақларини топтаганини айтиб, мулозимнинг аслида бунга ваколати бўлганини савол остига олганлар.

Kun.uz нашри журналисти Азиз Қаршиев Қуронбоев ёшларнинг ишончини оқламаганини айтиб, истеъфога кетиши кераклиги ҳақида ёзган.

Бунинг ортидан Kun.uz га интервъю берган Қуронбоев бу сафар ҳодисанинг бошқачароқ талқинини баён қилган.

Унга кўра, кортеж тўхтатилиб, ёшлар огоҳлантирилганидан сўнг, келин-куёв "ўз машинасида йўлда давом этган"

Айни пайтда "Ёшлар иттифоқининг йўлтўсар раисидан ўзбекистонлик ёшлар истеъфо сўрайди" мақоласи муаллифи, журналист Азиз Қаршиев ижтимоий тармоқларда Қуронбоев тарафдорларининг нишонига айланган.

48 ёшли Қаҳрамон Қуронбоев Президент Мирзиёевнинг маслаҳатчиси ва Сенат аъзоси ҳамдир.

BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek