Россиядаги Дилафрўз: ‘Ҳомиладор экан, эри ташлаб кетган, энди эса...’

Муҳожирлик йўлини танлаган аёлларнинг турфа қисматлари бор.

Россияда меҳнат қилаётган ўзбекистонликларнинг 30 фоизини хотин-қизлар ташкил этади.

Уларнинг аксари оиласидан ажрашган, турмушга чиқмаган ёки эри касалванд ёки ишсиз бўлганлиги учун тирикчилик ташвишини ўз зиммасига олган аёллардир.

Кам ҳолларда эри билан бирга келганлар ёки Россияда ишлаётган эрининг ёнига келганлар ҳам бор.

Шунингдек, оиласини асраб қолиш мақсадида муҳожирлик йўлини танлаганлар ҳам учраб туради.

Қашқадарёлик Дилафрўз Москвага нафақат эрининг ёнида бўлиш, балки кўпдан бери кутилаётган оналик бахтига етишиш ниятида эди.

Видеони YouTube каналимизда томоша қилинг.

Бундан 3 йил олдин Дилафрўз қурилишда ишлаётган эрининг чақируви билан мактабда ўқитувчилик касбини ташлаб Москва вилоятига келди.

Фарзандсиз ёш оила даволаниш билан бирга ишлаб уй олиш ниятида эди.

Шу мақсадда Дилафрўз эрининг розилиги билан даволаниш учун пойтахтга келади ва кекса аёлга энага бўлиб ишлай бошлайди.

Эр-хотиннинг бирга яшаши ижара пулини тўлаш учун ҳам қимматлик қиларди.

Шу боис Дилафрўз иш жойида, эри эса қурилиш жойининг ўзида бепул яшашга қарор қилишади.

"Ўлигимиздан тиригимиз маъқул яқинларимизга..."

Мирзиёев: 'Россияда ишлаётганлар-бизнинг фарзандларимиз'

Аммо пулни иқтисод қилиш мақсадидаги бу ҳаракат уларнинг оиласини барбод бўлишига сабабчи бўлди.

- Алоҳида яшаганимиздан кейин эрим "ўнгга-чапга" юра бошлади. Ҳатто бир аёл қўнғироқ қилди, турмуш қуришга ҳам аҳд қилишибди. Бу пайтда даволаниб ҳомиладор бўлгандим. Эримга фарзандли бўлишимизни айтдим, хурсанд бўлгандек бўлди. Аммо бу унинг қарорини ўзгартирмади, - ҳикоя қилади Дилафрўз.

Унинг айтишича, туғруқхонадан чиққанида борадиган жойи, иши ва пули ҳам бўлмаган.

Ўзи энагалик қилган уйда вақтинча яшашга розилик олган ва чақалоғини танишларига бир-икки соатга қолдириб, қўшимча ишлар ("подработка") билан кун кўрган. Унинг қарамоғидаги кампир оламдан ўтгач эса, бутунлай кўчада қолган.

- Миграция бўйича халқаро ташкилотни Ўзбекистондаги бўлимини излаб топиб, аҳволимни айтдим. Менга ва чақалоғимга оғир аҳволда қолган муҳожир сифатида самолётга билет олиб беришди. Уларнинг ёрдамида Ўзбекистонга қайтаяпман, - деди Дилафрўз.

Россияга оиласини сақлаб қолиш учун келиб, қийин вазиятларга тушиб қолган ўзбек аёллари кўплаб топилади.

Аммо аксари ватанга қайтишга имкон топа олмай, турли йўлларга киришга мажбур бўлади.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02