Трамп: ўзбекистонликлар АҚШга кирмасин!

АҚШ Президентлигига Республикачи партиядан номзод Доналд Трамп яна муҳокамалар қаршисида қолди.

Бу сафар у ўзбекистонликларни Америкага киритмасликка чақирди.

4 август куни Портланд шаҳрида йиғилган ўз тарафдорлари намойишида жаноб Трамп бошқа давлатлардан мусулмонларни Қўшма Штатларга киришини тақиқлаш ғоясини эслар экан, уларни террористлар деб атади.

Трамп жаноблари ўз чиқишида Ироқ, Сурия, Афғонистон, Покистон, Яман, Сомали, Марокаш каби давлатларни айтар экан улар қаторида ўзбекистонликларни ҳам келтирди.

Трамп АҚШнинг Айдахо штатида террорчиликни қўллаганликда айбланиб, 25 йилга қамалган ўзбекистонлик Фазлиддин Қурбонов билан боғлиқ воқеани, Бостон портлашларини уюштирган ака-ука Царнаевларни эслади.

Айни пайтда Трампнинг Ўзбекистонни эҳтимолий террорчилар етиштириб бераётган давлатлар сафига қўшиши ижтимоий тармоқларда ўзбекистонликларнинг ғазабнок муносабатларига сабаб бўлган. 4 август куни Портленддаги чиқишида республикачилар номзоди ўз тарафдорларидан Ўзбекистон қаерда эканини биласизларми, деб ҳам сўраган.

Трампнинг сўзлари одатдагидек ижтимоий тармокларда муҳокама қилинмоқда. (Изоҳларнинг аксарияти таҳрирсиз)

Elyor Timurov: "Агар ҳақиқатдан шундай фикрда бўлса, демак у телба." деб ёзади.

Джамолитдин Кадиров: "Ўқимаган маcқарабоз. Битта гаппи билан 32 миллион аҳолига эга мамлакатни ўзига қарши қилиб қўйди!" деб изоҳ қолдирган.

Елена Исаханова: "Бу гап мени ҳавотирлантиряпти. Уларнинг фақат бир усуллари бор, Олдинига сенга тамға қўйиб кейин 'даволашни' бошлашади. Оллоҳ асрасин!" дейди.

Anora Ismatovaга кўра: "Бошқа мамлактлар билан солиштирганда, Ўзбекистон ҳақида гапирмаса ҳам бўлар эди."

Jamshid Qutliyev: "Аҳир у қўғирчоқку, уларнинг қўғирчоқ ойнатувчилари жуда яҳши беркинган, шу сабабдан унинг гаплари сариқ чақачалик қадри йўқ." дейди.

Javohir Irismatovнинг айтишича: "Яхшиси ўша террорчиларга ҳомийлик қилишни тўхтатишсин."

Анна Леонидовна Григорьеванинг фикрича, "Америка демократияси учун навбатдаги нишон бўлиб қолмасак бўлди. Улардан ҳамма нарса кутса бўлади."

Zulya Emirzakova эса : "Шунчаки Ўзбекистондаги гўзал ҳаётдан беҳабар бу инсон. Агар келиб бу ерларни кўриб кетса фикрини ўзгартиради деб ишонаман." деса

Фойдаланувчи Гульнара Хамраходжаева: "Ҳукуматимиз бизларни ҳафа қилдириб қўймайди деган умиддаман. Бизнинг И. А. Каримов бунақа инсонлар билан қандай муомила қилишни билади. Бизнинг президентимиз зўр!" деб фикр қолдирган.

Asror Allaev: "Odam borki odamlarning naqshidur Odam borki hayvon undan yaxshidur . Bejizga hazrat Navoiy aytmaganlar. Yuzida nur yuq bunaqalarni sovuqbashara. Bunaqalarga bu dunyoda berildi quyaveringlar akillaversin." деб ёзади

Adxam Umarov: "Бизни юртимизда уларни малайлари колмади шунинг учун шундай деган. ТИШИ утмаяпти и утмидихам." деган фикрда экан.

Рустам Маматкулов: "Ўзбекистон хукумати уни судга бериш керак бу гаплари учун" дейди.

АҚШ Президентлигига номзод Дональд Трамп жорий президент Барак Обаманинг "Трамп президентликка лойиқ эмас", деган танқидий сўзларига жавобан уни сусткашликда айблаб, бошқарувидаги йилларни фожеа деб атаган, рақиби Хиллари Клинтонни эса иблис деган эди.

Куни кеча Республикачи партиянинг нуфузли 50 аъзоси эълон қилган очиқ хатда америкаликларни Дональд Трампга овоз беришдан огоҳлантирдилар.

Оқ уйнинг республикачи маъмуриятларида хизмат қилган миллий хавфсизлик экспертлари фикрича, Дональд Трамп Америка тарихидаги энг ақлсиз президент бўлиши мумкин. Уларга кўра, Трампда давлатни бошқариш учун зарур характер, қадрият ва тажриба йўқ.

Трамп жаноблари ҳам бунга жавобни узоқ куттиргани йўқ.

Ўзига қарши турганларни дунёдаги хаосни бошлаб берганлар, деди ва уни хавфли жойга айлантирганлари учун жавобгарликка тортиш кераклигини айтди.