Украина аскарлари Севередонецкдан чекинади, Россия Қозоғистоннинг тан олмаслик позициясини ҳурмат қилади ва босим ўтказмайди

Украина армияси 4 ойдан бери оғир жанглар кетаётган Севередонецк шаҳридан чекинишини маълум қилди. Россия Қозоғистоннинг ДНР ва ЛНР давлатларини тан олмаслик қарорини ҳурмат қилишини билдирди.

Луганск вилояти маъмурияти раҳбари Серҳий Ҳайдай Украина армияси Северодонецк шаҳри ташлаб чиқишига тўғри келаётганини ёзди.

"Афсуски, ҳарбийларимизни Северодонецкдан олиб чиқишимизга тўғри келади, чунки вайрон қилинган позицияларда қолишдан маъно йўқ, қурбонлар сони ортмоқда", деган у.

Унинг айтишича, Россия 4 ойдан бери бомбардимон қилаётган шаҳарнинг 90 фоиз биноси вайрон бўлган ёки зарар кўрган.

Бундан ташқари Ҳайдай россияликлар Лисичанск шаҳрининг жануби ғарбидаги Николевка поселкасини қўлга киритганини айтди.

Украина матбуоти аскарларнинг чекиниши ўтган тунда бошланганини ёзди.

"Бугун тунда Украина бўлинмалари Североденцкдаги саноат ҳудудини ташкилий равишда тарк эта бошлади. Фронтнинг мен турган қисмида чекиниш отишмалар остида амалга ошди, аммо қурбонлар йўқ. Кетиш аламли, бироқ бу қарор аллақачон пишиб етилганди. Украина ҳарбийлари бу каби ўта оғир шароитларда керагидан ортиғини қилишди. Кўприк ва кўчма кўприкларсиз ҳар кунги уруш қаҳрамонлик билан тенг эди", деб ёзган журналист Юрий Бутусов

Ҳарбий экспертларнинг айтишича, Украина армияси Северодонецкда иккита муҳим вазифани бажарган.

Рақибнинг ҳарбий захирасини йўқ қилган ва Россияни бошқа фронтларга фаол жанг олиб бормасдан эътиборини ушбу шаҳарга қаратишга мажбур қилган.

Экспертларга кўра Североденцкнинг йўқотилиши урушда катта бурилиш ясамайди.

Россия Қозоғистоннинг қарашини ҳурмат қилади

Россия Қозоғистоннинг ўзларини Луганск Халқ республикаси ва Донецк Халқ республикаси, деб атаб олган Украинанинг Луганск ва Донецк вилоятлари мақоми бўйича мавқеини ҳурмат қилади, деб хабар беради КазТаг хабар агентлиги.

"Россия Қозоғистоннинг долзарб залқаро муаммоларга бўлган нуқтаи назарини ҳурмат қилади ва унга босим ўтказмоқчи эмас. Бу биз кўп гапирадиган қарашларимизнинг фарқ қилишига яққол мисол", деган Россия Ташқи ишлар вазирлиги расмий вакили Мария Захарова.

17 июн куни Петербургда ўтган Халқаро иқтисодий форумда журналистнинг саволига жавоб берган Қозоғистон Республикаси Президенти Қасим-Жўмарт Тоқаев ўзларини ДХР ва ЛХР деб атайдиган бўлгаларнинг мустақиллигини тан олмаслигини айтганди.

Қозоғистон Президенти ўз фикрини ҳар қандай бўлга ўзини шундай мустақил деб эълон қилаверса ер юзида хаос бўлади, деб изоҳлаганди.

Тоқаев, шунингдек, россиялик сиёсатчилар ва таниқли шахсларнинг Қозоғистон шаънига айтилаётган таъналарни танқид қилган.

У бундай чиқишлар икки халқ ўртасидаги алоқаларга зарар беришини таъкидлаган.

Қозоғистон президентининг гапларидан сўнг Чеченистон раҳбари Рамзан Кадиров видео мурожаат билан чиқиб, январ воқеаларида Россия Қозоғистонга ҳеч кимдан қўрқмасдан ёрдам берганини пеш қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek