Ўзбекистон ва Қозоғистон қўшма автомобил ишлаб чиқариши мумкин

Икки қўшни давлат ширкатлари эҳтиёт қисмлар ва янги автомобил моделларини ишлаб чиқариш юзасидан ҳамкорлик истиқболларини муҳокама қилмоқда.

Бу ҳақда Қозоғистоннинг Ўзбекистондаги элчиси Ерик Утембаев маълум қилган.

Sputnik нашрининг қозоқ элчисининг сўзларидан иқтибос келтиришича, Қозоғистоннинг етакчи автомобил ишлаб чиқарувчи ширкати - "СарыаркаАвтоПрометакчи" мутахассисларидан иборат ҳайъат пайшанба куни Тошкентга ташриф буюради.

"СарыаркаАвтоПрометакчи" турли русумлар -Toyota, Hyundai, SsangYong, Geely, JAC автомобиллари ҳамда Iveco махсус техникаларини ишлаб чиқаради.

Қозоғистонлик мутахассислар Самарқанд автомобил заводи ва GM Uzbekistan корхоналарида бўлишлари кутилмоқда.

Жаноб Утембаевнинг айтишича, қозоқ томонини автомобил компонентлари ва эҳтиёт қисмларини ишлаб чиқариш, шунингдек, Ўзбекистон ва Қозоғистон бозорларида харидоргир бўлиши мумкин бўлган маълум автомобил моделларини ишлаб чиқариш бўйича қўшма корхона ташкил этиш истиқболи қизиқтиради.

Қозоқ дипломатининг сўзларига кўра, Овросиё Иқтисодий Иттифоқига аъзо Қозоғистон янги қўшма корхона маҳсулотлари учун бутун Овросий бозорига дарвоза вазифасини ўташи мумкин.

Ўтмишда қозоғистонлик автомобил ишлаб чиқарувчилар Ўзбекистон машиналари миллий автосаноатнинг ривожланишига тўсқинлик қилаётганидан шикоят қилишган.

2014 йилда қозоқ томони Ўзбекистонда ишлаб чиқарилувчи "Нексия" автомобилларини техник регламентга тўғри келмаслиги важидан импорт қилишни тўхтатган эди.

Натижада Қозоғистон бозорида ўзбек автомобилларининг сотилиши икки баробарга тушиб кетган.

Ўзбекистонда ишлаб чиқарилган автомобиллар Қозоғистонга божхона тўловларисиз кириб келади ва импорт кўлами бўйича "кучли учлик"ка киради.

Қозоғистон автосаноати мулозимлари ташқи савдо адолатли бўлиши учун ўзбек томони ҳам қозоқ автомобиллари учун божхона тўловларисиз кириб келишни таъминлаши кераклигини айтишган.

Акс ҳолда улар ўзбек автомобилларига акциз тўловлари ва солиқларини кўтаришни таклиф қилишган.

Қозоғистон билан ҳамкорлик истиқболлари ўзбек автомобил саноатидаги коррупция иддаолари юзасидан жиноий текширувлар давом этаётган пайт муҳокама қилинмоқда.

Шу йил апрелида "Ўзавтосаноат" бошқарув раисининг ўринбосари ва 'GM-Uzbekistan' қўшма корхонаси бош директори Тохиржон Жалиловнинг лавозимидан четлатилгани хабар қилинган.

Давлат ширкати 'GM-Uzbekistan' автомобилларини сотиш бўйича йирик коррупцион схема амал қилиши ҳақидаги даъволарни рад этиб чиққан.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз:+44 78-58-86-00-02

•ТЕЛЕГРАМДА ЭСА каналимиз - https://telegram.me/bbcuzbek

•Instagram - BBC UZBEK

•Twitter - BBC UZBEK

•Odnoklassniki - BBC UZBEK

•Facebook - BBC UZBEK

•Google+BBC UZBEK

•YouTube - BBCUZBEK (https://www.youtube.com/user/bbcuzbek)

•Skype - uzbekbbclondon

•bbcuzbek.comга тўсиқ бўлса, uzbekweb.netга киринг.