Володимир Зеленский Киев Россия ва АҚШ ўртасида Украина иштирокисиз келишилган ҳар қандай тинчлик битимини қабул қилмаслигини айтди

Президент Володимир Зеленский Киев Россия ва АҚШ ўртасида Украина иштирокисиз келишилган ҳар қандай тинчлик битимини қабул қилмаслигини айтди.

• Украина "мамлакат иштирокисиз тузилган ҳар қандай келишувларни қабул қила олмайди", деди Зеленский. Унга кўра,"Украина ҳақида Украинасиз гап бўлиши мумкин эмас" ва "европаликлар ҳам музокаралар столида бўлишлари керак"

• Зеленский Трампга унинг мамлакати учун устувор вазифа "хавфсизлик кафолатлари" экани, АҚШнинг қўллаб-қувватлашисиз бунга эришиб бўлмаслигини айтган.

Аввалроқ, етти Европа давлати, жумладан, Британия, Франция ва Германия Украина-Россия музокараларида Украинани қудратли мавқеда ушлаб туришга бел боғлашганини айтишганди. НАТО мудофаа вазирлари Брюсселда учрашишган.

НАТОнинг Бош котиби Генерал Марк Рутте барча НАТО аъзолари музокараларда Украинани қўллаб-қувватлашларини билдирди.

"НАТО Путинга келажакда Украинанинг бир квадрат километрини, бир квадрат милясини ҳам босиб олишига йўл қўя олмайди", - деди Рутте.

Уларнинг бу баёнотида сал аввал Доналд Трамп Владимир Путин билан урушни тўхтатиш бўйича музокараларни "зудлик билан" бошлашга келишиб олганини эълон қилди.

Кремлдан билдиришларича, Трамп ва Путин ўртасидаги телефон суҳбати 1,5 соат давом этган ва икковлон юзма-юз кўришишга келишиб олганлар.

Суҳбатдан сўнг Трамп дарҳол Владимир Зеленскийга сим қоққан.

Трампнинг ўз ижтимоий тармоғи Trust Social да ёзишича, Путин билан у Украина, Яқин Шарқ, энергетика, сунъий ақл, "долларнинг кучи ва кўплаб бошқа мавзулар"ни муҳокама қилган.

Кремл сўзчиси Дмитрий Песков икки томон маҳбуслар алишуви, Эрон ядровий дастури ва АҚШ-Россия ҳамкорлиги ҳақида ҳам гаплашишганини билдирди.

Трампнинг айтишича, Путин билан илк учрашуви Саудия Арабистонида бўлиб ўтади.

Зеленский ҳам Трамп билан суҳбатлашгани ҳақида эълон қилди.

"Украина ҳамма нарсадан ҳам тинчликни кўпроқ истайди. Россия тажовузини тўхтатиш ва ишончли, давомли тинчликни кафолатлаш учун бизнинг Америка билан бирга қўядиган қадамларимизни аниқлаяпмиз", - деб ёзди Зеленский ижтимоий тармоқларда.

Трамп ҳам, Зеленский ҳам тинчлик музокараларининг қандайдир шартлари ёки келишувлар ҳақида маълум қилишмади.

Ижтимоий тармоқлардаги саҳифаларимиз

Аммо, Трампнинг шу пайтгача билдирган фикрларига таянилса, тинчлик Украина учун ўз ҳудудларидан воз кечишга етаклайди.

Чоршанба куни АҚШ Мудофаа вазири Пит Хегсет Украина ўзининг 2014 йилдан аввалги чегараларига қайтиши "эҳтимоли кам"лигини айтди.

Хегсетга кўра, Украинанинг НАТОга қўшилиш истаги "музокара келишувининг реалистик натижаси эмас", лекин Европа Украина хавфсизлигини таъминлаши керак.

Аввалроқ Зеленский Россия билан ер алмашишга тайёр эканини айтди.Зеленский бу ҳақида Британиянинг the Guardian газетасига берган интервюсида билдирган.

Унинг айтишича, Украина олти ой аввал ҳужум қилиб бир қисмини эгаллаб олган Курск вилоятини Москва ишғоли остидаги украин ерларига алмашиш мумкин.

Украина аввал ҳеч қачон Россиянинг Курск вилоятида эгаллаб олган юзлаб километрлик ерларни абадий ишғол қилиш ҳақида гапирмаган.

Россия Хавфсизлик кенгаши раисининг ўринбосари Дмитрий Медведев Зеленскийнинг фикрларини "сафсата" деб таърифлади.