Зеленский биринчи марта Россия билан ер алмашиш ҳақида гапирди. Россия бунга розими?

Украина Президенти Володимир Зеленский Россия билан ер алмашишга тайёр эканини айтди. Зеленский бу ҳақида Британиянинг the Guardian газетасига берган интервюсида билдирган.

Унинг айтишича, Украина олти ой аввал ҳужум қилиб бир қисмини эгаллаб олган Курск вилоятини Москва ишғоли остидаги украин ерларига алмашиш мумкин.

Украина аввал ҳеч қачон Россиянинг Курск вилоятида эгаллаб олган юзлаб километрлик ерларни абадий ишғол қилиш ҳақида гапирмаган, аммо бу ишғолнинг мақсади нима бўлгани энди ойдинлашмоқда.

Россия Хавфсизлик кенгаши раисининг ўринбосари Дмитрий Медведев Зеленскийнинг фикрларини "сафсата" деб таърифлади.

"Қудрат орқали тинчликка эришиш, дейсизми?" дея киноя қилди Медведев, Зеленскийнинг халқаро нутқларида айтган гапларига ишора қилиб.

Медведевнинг ишорасига кўра, Россия бу мақсадга тунги ҳужум билан эришиши мумкин.

Украина учун Курск амалиёти фронт чизиғининг бошқа қисмларидаги украин аскарлари устидаги босимни енгиллаштириши умид қилинганди.

Аммо, жанг майдонида Россиянинг қўли устун бўлиб қолар экан, эндиликда Зеленский Курскни сиёсий қурол сифатида қўллашга уринаётгандек кўринади.

Зеленский Украина ўзининг энг катта иттифоқчиси бўлмиш АҚШнинг дастагисиз ўз хавфсизлигини кафолатлай олмаслигини тан олган.

Ўтган йилги сайловолди тарғиботларида АҚШ Президенти Доналд Трамп Россия-Украина можаросини бир кунда ҳал қилишини айтганди.

Ўтган ой у ижтимоий тармоқларда Путинга таҳдид қилди: Агар Украинадаги урушни якунламасанг, Россияга қарши юқори тарифлар ўрнатилади ва кўпроқ санкциялар киритилади.

Путин урушни тугатиш бўйича музокараларга тайёр эканини бир неча бор айтган. Лекин, унинг айтишича, Украина воқеъликни қабул қилиши керак ва Россия эгаллаган ерлардан воз кечиши керак.

Ҳозирда Россия Украина ҳудудининг тахминан 20 фоизини эгаллаб турибди.

Аввалроқ Зеленский ҳозирда Россия босиб олган ерларни вақтинча қўлдан чиқариб туришга мажбур бўлишини тан олган, лекин Guardian'га гапирган гаплари у илк марта украин ҳудудларидан бутунлай воз кечиш ҳақида ўйлаётганидан дарак беради.

Путин, шунингдек, Украинанинг Ғарб ҳарбий иттифоқи НАТОга қўшилишини мутлақо қабул қилмайди.

Жума куни Зеленский Американинг Киевга ҳарбий дастагини қоралаб келган АҚШ Вице-президенти Жей Ди Ванс билан учрашади.

Аввалроқ Президент Трамп ҳам дам олиш кунларида Мюнхенда бўлиб ўтган Хавфсизлик анжумани ортидан Зеленский билан учрашиши мумкинлигини айтган.

Оқ Уй Украинага ёрдамни давом эттириш эвазига унинг табиий заҳираларига қизиқишини билдирган.

Айни дамда, тунда Украина пойтахтига қилинган Россия ракета ҳужумида бир киши ҳалок бўлган.

Киевнинг ҳокимига кўра, чоршанба тонгида юз берган зарбалар натижасида жароҳат олганлар орасида тўққиз яшар қиз ҳам бор.

Украина армиясига кўра, Россиядан отилган еттита баллистик ракетанинг олтитаси ва 71 дрон уриб туширилган, ва уларнинг баъзилари шаҳарнинг турли қисмларида ёнғинни келтириб чиқарган.