АҚШ Демократлари Трамп ва Эпштейнга оид электрон хатларни ошкор қилди: Нималар маълум?

Хатларнинг бир қисми 2019 йилда вафот этган, жинсий жиноятлар учун судланган Эпштейн ва унинг ҳамкори Гислен Максвелл ўртасидаги ёзишмалардан иборат.

Вакиллар палатаси Демократлари томонидан янги эълон қилинган электрон хатлардаги ёзишмалар Эпштейн ва Доналд Трамп ҳақида тўртта китоб ёзган, ҳамда Эпштейн билан интервью қилган муаллиф Майкл Вулф ўртасидаги гўё ўзаро ёзишмалардир.

Вулфнинг 2015 йил 15 декабрда, яъни Трамп 2016 йилги АҚШ президентлик сайловларида қатнашишини эълон қилганидан олти ой ўтиб, Эпштейнга ёзган электрон мактубида: "Эшитишимча, CNN бугун кечқурун Трампдан сиз билан бўлган муносабати ҳақида ё эфирда, ёки шундан кейинги матбуот учрашувида сўрашни режалаштирмоқда", дейилади.

Эпштейн Вулфга шундай жавоб берди: "Агар биз унга жавобни тайёрлаб берсак, у қандай бўлиши керак деб ўйлайсиз?"

"Менимча, уни ўзини осишига рухсат беришингиз керак", деб ёзган Вулф эртаси куни.

"Агар у самолётда бўлмаганман ёки у уйга бормаганман деса, бу сизга қимматли пиар ва сиёсий куч беради. Сиз уни сизга ижобий фойда келтириши мумкин бўлган тарзда "осишингиз" мумкин, ёки, агар унинг ғалаба қозониши ҳақиқатан ҳам аниқ бўлса, сиз уни қутқаришингиз ва шу билан уни қарздор қилишингиз мумкин. Албатта, ундан сўрашганда, у Жеффри ажойиб йигит, унга адолатсизлик қилинди ва у Трамп режимида тақиқланадиган сиёсий эҳтиёткорликнинг қурбони, деб айтиши ҳам мумкин."

Ўша пайтда Эпштейн прокурорлар билан келишув доирасида Флоридада жинсий жиноятларда ўзини айбдор деб тан олган эди.

2019 йилдаги электрон хатда, Эпштейн АҚШ президентининг уни ўзининг Флоридадаги Мар-а-Лаго қароргоҳидан қувиб юборгани ҳақидаги даъволарини рад этган.

"Трамп мендан, ҳеч қачон аъзоси бўлмаганим жойдан бўшашни сўраганини айтган" дейди Эпштейн Вулфга.

" Албатта у қизлар ҳақида хабари бўлган, чунки Гислендан ишни тўхтатишни сўраган" деб қўшимча қилади у. Трампнинг бу гапида у уларга кўнгилхушлик учун ёш қизларни топиб, таъминлаш билан шуғуллангани учун ҳозирда 20 йилга қамалган, Эпштейннинг собиқ севгилиси ҳақида гапираётгани аниқ.

Шу йили бундан сал аввалроқ, Трамп Мар-а- Лаго соҳил клубида ишлайдиган бир ёш қизни "ундан тортиб олгани" учун Эпштейн билан муносабатларини узган.

Очилиши керак бўлган яна бир сир — бу Трамп…

Июль ойида Гислен Максвелл АҚШ Бош прокурор ўринбосари Тодд Бланш томонидан сўроқ қилинди.

Суриштирув чоғида, Эпштейннинг қамалган ҳамкори Гислен Максвелл Доналд Трамп ёки собиқ президент Билл Клинтон томонидан номақбул хатти-ҳаракатларни кўрмаганини айтди. Клинтон ҳам Эпштейннинг собиқ таниши сифатида ҳужжатларда тилга олинган, аммо жиноятга алоқадорлик ҳақида ҳеч қандай далил йўқ.

Трамп маъмурияти Эпштейн ҳақидаги маълумотларни ошкор қилиш босими остида қолган, чунки АҚШ президенти у билан дўстона муносабатда бўлган. Бироқ Трамп Эпштейн билан алоқани 2006 йилда, биринчи марта ҳибсга олинмасидан олдиноқ узганини айтган.

Янги эълон қилинган стенограммага кўра, Гислен Максвелл Бланшга кўп муҳокама қилинган "мижозлар рўйхати" мавжуд эмаслигини айтган.

Эпштейннинг таниқли айбловчиси бўлган Жуфрей шу йил бошида ўз жонига қасд қилган эди. Бу интервью Виржиния Жуфрей оиласини ғазаблантирди - улар ҳукумат Максвеллга "тарихни қайта ёзиш учун майдон" берганини айтмоқда.

Максвелл Трампдан афв сўрамоқда ва федерал расмийларга ёлғон гапиришда айбланмоқда.

Илгари Трампнинг шахсий адвокати бўлган Бланче билан интервьюдан кўп ўтмай, Максвелл Флорида қамоқхонасидан Техасдаги янги минимал хавфсизликдаги муассасага кўчирилди. Унинг нима сабабдан кўчирилгани номаълум.

Эпштейн Демократлар томонидан ошкор қилинган электрон хатда Трамп унинг қурбонларидан бири билан "соатлар давомида" бўлганини даъво қилган

Бугун Вакиллар Палатасидаги Демократлар томонидан ошкор қилинган электрон хатлардан бири Жеффрей Эпштейн ва Гислен Максвелл ўртасидаги тўғридан-тўғри ёзишмаларга алоқадор.

2011 йил апрель ойидаги Эпштейндан Максвеллга ёзилган хатда шундай дейилади:

"Бир нарсани тушунишингни хоҳлайман, очилиши керак бўлган яна бир сир — бу Трамп… [Қурбон] менинг уйимда у билан соатлар давомида бўлди, у ҳеч қачон тилга олинмаган. Полиция бошлиғи ва ҳоказо. Мен 75 % тайёрман.

" Максвелл жавоб ёзади: "Мен ҳам шуни ўйлаб юрибман…"

Электрон ёзишмаларни ким эълон қилди?

Учта электрон ёзишма бугун АҚШ Вакиллар палатасидаги Назорат қўмитаси Демократлари томонидан эълон қилинди.

Уларнинг таъкидлашича, бу хатлар уларга бугун эрталаб Жеффри Эпштейн мулки вакиллари томонидан тақдим этилган.

Трамп нима деди?

Оқ Уй Вакиллар Палатасидаги Демократлар томонидан электрон хатлар эълон қилинишига жавоб берди.

Матбуот котиби Каролин Леавитт шундай деди: "Демократлар электрон хатларни танлаб олиб, либерал ОАВга сиздириб, Президент Трампни обрўсизлантириш учун сохта нарратив яратмоқчи бўлди.

"Ушбу хатларда тилга олинган исми ошкор этилмаган қурбон - марҳум Виржиния Жуфрей бўлиб, у бир неча бор Президент Трамп ҳеч қандай ноқонуний ишга аралашмаганини ва улар ўртасидаги чекланган мулоқотда ундан дўстона одам бўлмаганини айтган.

"Аслида, Президент Трамп Жеффрей Эпштейнни ўнлаб йиллар аввал ўз клубидан ҳайдаб чиқарган, чунки у аёл ходимларга, жумладан Жуфрейга, номақбул муносабатда бўлган.

"Бу ҳикоялар - Трампнинг тарихий ютуқларидан диққатни чалғитиш учун ёмон ниятли уринишлардан бошқа нарса эмас, ва соғлом фикрли ҳар бир америкалик бу фитнани ва ҳукуматнинг аниқ чалғитиш ҳаракатини дарҳол англайди."