Шифокор кундалиги: Коронавирус, ниқоблар ва уларни "ўзбекча" тушуниш ҳақида Ўзбекистон O'zbekiston

Карантин даврида ҳам бозор-ўчарга боришга тўғри келди. Бозорларда ҳам ҳуқуқ-тартибот ходимлари бўларди, аммо кейинги пайт улар бироз кўпайгандай... Айниқса бозорларда уларни деярли ҳар бир қадамда учратасиз. Умуман олганда, бозорга боришнинг ўзига яраша гашти бор, кираверишда турнақатор навбатга тизиласиз, ҳимоя кийимидаги ҳамшира ёнидан секин ўтишни бошлайсиз.

У қўлидаги иссиқ ўлчагич билан сиз томонга юзланади. Иссиғи бор одам бозорга чиқармикан деган савол келади кўнгилга.

Кейин қанақадир туннелсимон жойдан ўтасиз ва сизни ҳеч бир огоҳлантишсиз ...антисептик "ҳужумга" тутишади. Ҳеч ким сиздан бу туннелда ўтасанми йўқми, деб сўраб ўтирмайди. Ихтиёрий мажбурий... Энг қизиғи антисептикдан кейин кийимингизда ҳеч бир ҳид сезилмайди. Худди сув пуркаб қўйишгандай...

Бизнинг клиникамизда Америка маҳсулоти - Прогрин ишлатилади, бунда ҳам ҳид йўқ, аллергияни қўзғатмайди, кийимда ҳам бирор бир доғ қолмайди.

Кейин яна бир қаторга тизилдик ва бу гал ҳарбийлар кўригидан ўтдик. Ниқобларингиз жағингизга тушган бўлса улар койиб беришар, дарров ростакамига тақиб олишни жаҳл билан буюришарди.

Ана шундан кейин ниҳоят биз бозорга кириб келдик.

Бозорга икки томондан кирилади. Бири одамлар ва яна бири машиналар учун. Дарвозалари катта ва иккига бўлинган. Ҳар иккаласида ҳам кириб-чиқиш туннеллари бор.

Шифокор сифатида айтсам...бозор - вирус тарқаладиган марказ! Аксарият одамлар умуман ижтимоий масофа сақламайди. Аксарият сотувчилар ўз расталарини қалин полиэтилен билан тўсиб олгани сизни бир қадар тинчлантириши мумкин.

Расталарга қараб Тошкентда ниқоб етишмовчилиги умуман йўқлигига амин бўласиз. Ниқобларни деярли ҳар қадамда сотиб олиш мумкин. Ҳатто онлайн буюртма бериш мумкин.

Бозорда эса ниқоблар хилма -хил, турфа рангларда…албатта, уларнинг ҳаммасини ҳам сифатли деб бўлмайди. Сиз оддий ниқоблардан тортиб, безатилганларини ҳам бемалол сотиб оласиз.

Сотувда ҳатто респираторлар бор, ҳимоя кийимлари ва антисептиклар ҳам сотиб олиш мумкин.

Боғларда икки кишининг бирга юришига рухсат берилиши билан кўчалар одамга тўлиб кетди.

Ҳеч ким ва ҳеч нарса бизни ортиқ уйда ушлаб туролмаётгандай… Ниқобларни ҳам аксарият номига тақиб олганини кўриш мумкин.

Шифокор сифатида мен табиийки хавотирдаман…Шифохоналарда биз ҳамкасбларимиз билан жонимизни жабборга бермоқдамиз. Кўчадаги айрим одамлар эса…дунёни сув босса тўпиғига чиқмайдигандай!.

Албатта, ниқоб тақиш ҳақида ҳамон баҳслар тугагани йўқ. Аммо ниқоб касаллик тарқалишининг олдини олиши аниқ! Масалан, бизнинг шифохонада барча шифокорлар учун ниқоб тақиш шарт қилиб қўйилган. Мақсад шифохонага келадиганларни эҳтиёт қилиш ва касаллик тарқалишининг олдини олишдир.

Аммо ниқоб ҳақиқатдан ҳам фойда бериш учун юзнинг фақат бир қисмида турмаслиги лозим. Ниқоб юзни бутунлай қоплаши керак бўлади. Аммо энг хатарли саналган шу кунларда ҳам аксарият ниқобни соқол қўйгандай тақадиган бўлган! Айримлар эса қўлда олиб юришади, баъзилар эса бўйинларига осиб олишган! Яна бир тоифадаги ҳамшаҳарларимиз ниқоб билан фақат оғизни ёпиб олишади. Вирус кириб-чиқадиган асосий аъзо -бурун эса очиқ!

Жамиятимизда энг оддий санитария-гигиена қоидаларига кўникма ҳосил қилишимиз керак деган фикрдаман.

Баъзилар ниқобни…бошларига тақиб олишган!

Ачинарлиси шуки, аксарият ҳали ҳам бу бало ва эпидемия ҳолатини, вируснинг қанчалар осон тарқалиши ва хатарини тушуниб етмаган.

Коронавирус, шифокор кундалиги: Юмшатилаётган карантин ва йўл ҳаракати маданияти

Сардоба, шифокор ҳикояси: Биз борган қишлоққа ҳали ёрдам етиб келмаган эди... (Видео)

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek