عراقی کردوں کا کرکوک شہر پر’مکمل کنٹرول‘

عراق کے شمال میں کُرد فورسز کا کہنا ہے کہ تیل سے مالا مال ملک کے شمالی شہر کرکوک سے عراقی فوج کے فرار ہونے کے بعد انھوں نے شہر پر مکمل کنٹرول حاصل کر لیا ہے جبکہ پارلیمان میں ملک میں ہنگامی حالت کے نفاذ کے بارے میں رائے شماری موخر کردی گئی ہے۔

کُرد فورس کے ترجمان جبّار یاور نے خبر رساں ادارے روئٹرز کو بتایا کہ ’کرکوک کُرد فوج کے ہاتھ میں ہے۔ اب کرکوک میں کہیں بھی عراقی فوج نہیں ہے۔ ‘

کُرد جنگجو سنی مسلمان عسکریت پسندوں کے خلاف ہیں جنھوں نے موصل اور تکریت پر رواں ہفتے قبضے کیا ہے۔

نامہ نگاروں کے مطابق دولتِ اسلامیہ عراق والشام (آئی ایس آئی ایس) نامی تنظیم کی قیادت میں عسکریت پسندوں کا ارادہ ہے کہ جنوبی علاقوں کی جانب مزید پیش قدمی کریں گے جہاں دارالحکومت بغداد اور شیعہ اکثریتی علاقے ہیں۔

ادھر عراقی پارلیمان میں وزیرِ اعظم نوری المالکی کی جانب سے ملک میں ہنگامی حالت کے نفاذ کے بارے میں بحث ہوئی تاہم اس حوالے سے رائے شماری نہیں کی جاسکی کیونکہ اس عمل کے لیے ممبران کی مقررہ تعداد پارلیمنٹ میں موجود نہیں تھی۔

اس سے پہلے بدھ کو عراقی سکیورٹی حکام نے بتایا تھا کہ کہ اسلامی شدت پسندوں نے منگل کو موصل کے بعد سابق صدر صدام حسین کے آبائی شہر تکریت پر بھی قبضہ کر لیا تھا۔

تاہم آئی ایس آئی ایس کی پیش قدمی کو عراقی فوج نے فضائیہ کی مدد سے سمارا میں روک دیا ہے۔

شدت پسندوں کا تعلق دولتِ اسلامیہ عراق والشام (آئی ایس آئی ایس) سے ہے۔ اس تنظیم کو القاعدہ کی شاخ کے طور پر بھی جانا جاتا ہے۔

اقوام متحدہ کے سیکریٹری جنرل بان کی مون کا کہنا تھا کہ عالمی برادری کو متحد ہو کر عراق کے ساتھ اظہارِ یکجہتی کرنا چاہیے۔

اس سے پہلے عراق میں یونیسیف کے سربراہ مارزیو بابیل کا کہنا تھا کہ موصل میں صورتحال انتہائی پریشان کن ہے۔

وزیرِ اعظم نوری المالکی نے کہا ہے کہ شدت پسندوں کے خلاف لڑنے کی بجائے فرار ہونے والے سکیورٹی اہلکاروں کو سزائیں دی جائیں گی۔

بیروت میں بی بی سی کے نامہ نگار کے مطابق صوبہ نینوا پر دولتِ اسلامیہ کا کئی ماہ سے غیر رسمی کنٹرول تھا جس میں یہ تنظیم مقامی اہلکاروں سے بھتہ وصول کیا کرتی تھی۔

کہا جاتا ہے کہ آئی ایس آئی ایس کو شام کے بڑے حصے اور مغربی و وسطی عراق پر کنٹرول حاصل ہے اور اس کی کوشش ہے کہ عسکریت پسند سنی علاقے قائم کیا جائے۔