فلسطینی اولمپیئن کو بیت اللحم جانےسے روک دیا گیا

اسرائیل کی ہائی کورٹ نے ایک فلسطینی اولمپیئن ایتھلیٹ کو غزہ چھوڑ کر غربِ اردن میں ہونے والی میراتھن ریس میں حصہ لینے سے روک دیا ہے۔

اسرائیل نے 2013 میں بھی فلسطینی اولمپیئن نادر المصری کو بیت اللحم میں ہونے والی میراتھن ریس میں حصہ لینے سے روک دیا تھا۔

فلسطینی ایتھلیٹ نے اسرائیلی حکومت سے بیت اللحم میں ہونے والی میراتھن ریس میں شرکت کی اجازت مانگی تھی لیکن اسے ملٹری کورٹ نے مسترد کر دیا۔

اسرائیلی ہائی کورٹ نے کہا ہے کہ وہ ملٹری کورٹ کے فیصلے میں مداخلت نہیں کر سکتی۔

منگل کے روز اسرائیلی ہائی کورٹ کے فیصلے کے بعد 34 سالہ نادر المصری کے بیت اللحم میں ہونے والی ریس میں شرکت کے تمام امکانات ختم ہوگئے ہیں۔

نادر المصری نے 2008 میں اولمپکس میں حصہ لیا تھا۔

نادر المصری نے عدالتی فیصلے پر مایوسی کا اظہار کرتے ہوئے کہا کہ انھیں امید تھی کہ وہ غزہ سے باہر ہونے والے مقابلوں میں شرکت کر سکیں گے لیکن اب ایسا ممکن نہیں ہے۔

اسرائیل نے فلسطینی شہریوں کے غزہ سے باہر جانے کی پابندی عائد کر رکھی ہے اور اکا دکا لوگوں کو ہی غزہ سے باہر جانے کی اجازت دی جاتی ہے۔