شام کے قلعہ الحصن پر لگے جنگ کے زخم

شام میں سرکاری فوج نے لبنان کی سرحد کے قریب واقع صلیبی دور کے تاریخی قلعے الحصن کو باغیوں سے آزاد کروا لیا ہے۔

فوج کے ایک افسر نے بتایا کہ لڑائی کے دوران 93 باغیوں کو ہلاک کیا گیا اس دوران ایک قریبی دیہات کو بھاری نقصان پہنچا۔

جمعے کو یونیسکو کی جانب سے ورثہ قرار دیے جانے والے اس قلعے میں صحافیوں کو جانے کی اجازت دی گئی۔

ایک پہاڑی کی چوٹی پر بنائے گئے اس قلعے میں بمباری سے ہونے والے نقصانات واضح طور پر دکھائی دے رہے تھے۔

ابھی یہ واضح نہیں ہے کہ اس میں سے کتنا نقصان قلعے کا کنٹرول واپس لینے کے لیے کی گئی سرکاری فورسز کی کارروائی کی وجہ سے ہوا ہے۔

یہ قلعہ پچھلے دو برسوں سے باغیوں کے قبضے میں تھا۔ یہ گذشتہ تین برس سے شام میں جاری خانہ جنگی کے باعث خطرے سے دوچار کئی تاریخی مقامات میں سے ایک ہے۔