ابو عمر کا کہنا ہے کہ دورانِ حراست ان پر تشدت کیا گیا
اٹلی میں اعلیٰ اپیل عدالت نے ملک کے خفیہ ادارے کے سابق سربراہ نیکولو پولاری کو دس سال پہلے ایک مشتبہ امام کو اغوا کرنے کے جرم میں دس سال قید کی سزا سنائی ہے۔
عدالت نے نیکولو پولاری کے نائب اور تین دوسرے جاسوس اہلکاروں کو بھی سزا دی ہے۔ یہ سزا ان کو دس سال پہلے امریکہ کی مشتبہ دہشت گردوں کو غیر قانونی طور پر ایک ملک سے دوسرے ملک منتقل کرنے یا رینڈیشن پروگرام کے دوران ابو عمر نامی امام کو گرفتار کرنے کے جرم میں دی گئی ہے۔
امام کو میلان کی ایک گلی سے اٹھایا گیا تھا اور پھر اسے ہوائی جہاز کے ذریعہ مصر منتقل کیا گیا تھا جہاں ان پر جسمانی تشدد کیا گیا تھا۔
خبر رساں ادارے اے ایف پی کے مطابق مصر سے تعلق رکھنے والے اسلام پسند اوسامہ مصطفیٰ حسن کو جو ابو عمر کے نام سے بھی جانے جاتے ہیں امریکی جاسوسی ادارے سی آئے اے اور اٹلی کے جاسوسی ادارے نے 2003 میں ایک مشترکہ کارروائی کے دوران میلان کی ایک گلی سے اٹھایا تھا۔ ابو عمر نے اس وقت اٹلی میں سیاسی پناہ لی ہوئی تھی۔
خبر رساں ادارے اے پی کے مطابق عدالت نے نیچلے درجے کی عدالت کے اس فیصلے کو رد کر دیا جس کے تحت ان پانچ افراد کو رہا کیا گیا تھا۔
عدالت نے اٹلی کے ملٹری انٹیلیجنس کے سربراہ نیکولو پولاری کو دس سال، ان کے نائب مارکو مانسینی کو نو سال اور تین ایجنٹوں کو چھ چھ سال سزا سنائی۔ ان سزاؤں کے خلاف اپیل کی جا سکتی ہے۔
نیکولو پولاری کے وکیل کا کہنا تھا کہ وہ منگل کو سنائے جانے واے اس عدالتی فیصلے کے خلاف اپیل کریں گے۔ نیکولو کے وکلاء کا یہ موقف رہا ہے کہ وہ حکومت کی طرف سے ریاستی راز کو افشاں کرنے پر پابندیوں کی وجہ سے اپنے مؤکل کی صحیح طرح سے دفاع نہیں کر سکے۔
اس کیس میں 26 امریکی اہلکاروں کو بھی ان کی غیر موجودگی میں سزائیں سنائی گئی ہیں۔
یہ دنیا پہلے میں سی آئی اے کے اہلکار ملوث والے پہلے ایسے مقدمات ہیں جس میں کسی کو ذمہ دار ٹہرایا گیا ہے۔
