آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ترکی میں وینٹیلیٹر میں دھماکے سے کورونا کے نو مریض ہلاک
جنوبی ترکی میں حکام کے مطابق ایک آکسیجن وینٹیلیٹر میں دھماکے کے باعث ہسپتال میں زیرِ علاج کورونا وائرس کے نو مریض ہلاک ہو گئے ہیں۔
دھماکے سے غازی عینتاب میں واقع نجی طبی مرکز سینکو یونیورسٹی ہسپتال کے انتہائی نگہداشت کے وارڈ میں آگ لگ گئی۔
کم از کم ایک مریض کی ہلاکت اُس وقت ہوئی جب انھیں ایک اور ہسپتال منتقل کیا جا رہا تھا۔
واضح رہے کہ جان ہوپکنز یونیورسٹی کے مطابق ترکی میں کورونا وائرس کے کم از کم 20 لاکھ کیسز سامنے آ چکے ہیں جبکہ 17 ہزار 610 اموات ہو چکی ہیں۔
آگ سنیچر کو علی الصبح لگی تاہم جانی نقصان براہ راست اس کی وجہ سے نہیں ہوا کیونکہ اسے فوراً بجھا دیا گیا تھا۔
یہ بھی پڑھیے
End of سب سے زیادہ پڑھی جانے والی
ہسپتال انتظامیہ کے مطابق ہلاک ہونے والوں کی عمریں 56 سے 85 برس کے درمیان تھیں۔
دھماکے کی وجوہات کا پتا چلانے کے لیے تحقیقات جاری ہیں۔
غازی عینتاب کے گورنر کے مطابق مذکورہ وارڈ میں زیرِ علاج دیگر مریضوں کو علاج کے لیے مختلف ہسپتالوں میں منتقل کیا جا رہا ہے۔
سرکاری بیان میں کہا گیا کہ 'حکام کی جانب سے ضروری اقدامات اٹھائے جا رہے ہیں' جبکہ ہلاک شدگان کے ورثا سے تعزیت کی گئی ہے۔
ترک صدر رجب طیب اردوغان کے ترجمان نے ٹوئٹر پر زخمی ہونے والوں کی جلد صحتیابی کی تمنا کا اظہار کیا۔
واضح رہے کہ پاکستان میں پانچ اور چھ دسمبر کی درمیانی شب پشاور کے خیبر ٹیچنگ ہسپتال کے کورونا وارڈ میں آکسیجن کی قلت کے باعث چھ افراد ہلاک ہوگئے تھے۔
ابتدائی تحقیقاتی رپورٹ میں کہا گیا تھا کہ یہ سانحہ نظام کی ناکامی کی وجہ سے پیش آیا، ٹینک میں آکسیجن کی شدید کمی تھی جو کسی کے نوٹس میں نہیں آئی، کسی نے اس پر توجہ نہیں دی اور کسی نے اسے چیک نہیں کیا۔
واقعے کے بعد ہسپتال کے سات اہلکاروں کو معطل کر دیا گیا تھا۔
یاد رہے کہ گذشتہ ماہ رومانیہ میں ایک ہسپتال میں آگ لگنے سے کورونا وائرس کے 10 مریض ہلاک ہوگئے تھے۔ یہ واقعہ تب پیش آیا جب ایک طبی آلے میں آگ لگنے سے قریبی آکسیجن سلنڈر نے آگ پکڑ لی تھی۔
اس کے علاوہ اکتوبر میں روس کے خطے چیلیابنسک میں کورونا وائرس کے مریضوں کے لیے بنائے گئے ایک عارضی ہسپتال کے 'آکسیجن بوتھ' میں دھماکے سے آگ لگنے کے بعد 150 مریضوں کو وہاں سے نکالنا پڑا تھا۔
