تھائی لینڈ کے بادشاہ وجیرالونگ کورن کی رسمِ تاج پوشی

تاج پوشی کے لیے جاری رہنے والی تین روزہ تقریبات کے دوران تھائی لینڈ کے بادشاہ مہا وجیرالونگ کورن کی تاج پوشی کر دی گئی ہے۔

بادشاہ مہا وجیرالونگ کورن کو یہ تخت سنہ 2016 میں طویل عرصے تک حکمرانی کرنے والے اپنے والد بھومبول ایڈلیڈجج کی وفات کے بعد وراثت میں ملا تھا۔

چند دن قبل محل کی جانب سے ایک غیر متوقع اعلان میں کہا گیا کہ بادشاہ وجیرالونگ کورن نے اپنی طویل عرصے کی ساتھی اور ذاتی سکیورٹی گارڈ سے شادی کر لی ہے اور اب وہ ملکہ سوتھدا کے نام سے جانی جائیں گی۔

اسی بارے میں مذید پڑھیے

بادشاہ نے اپنی سکیورٹی گارڈ سے شادی کر لی

بادشاہ پومی پون کا آخری سفر شروع، ہزاروں سوگوار سڑکوں پر

شہزادی کو وزیر اعظم کا امیدوار بنانے پر پارٹی ’تحلیل‘

تھائی لینڈ میں پرائیویٹ پارٹس کو گورا کرنے کا رجحان

تھائی لینڈ میں آئینی سلطنت ہے لیکن تھائی افراد شاہی خاندان کا بہت احترام کرتے ہیں اور شاہی خاندان کا اچھا اثرورسوخ ہے۔

تھائی لینڈ میں سخت قوانین بھی ہیں جنھیں ’لیسے میجیسٹ‘ کہتے ہیں۔ ان قوانین کے تحت بادشاہت پر تنقید کرنے پر پابندی ہے۔ ان قوانین نے شاہی خاندان کو عوامی نقطہ نظر اور جانچ سے بچائے رکھا ہے۔

سنیچر کی تقریب کے دوران 66 سالہ بادشاہ کو فتح کا عظیم تاج دیا گیا جس کا وزن 7.3 کلو گرام (16 پونڈ) ہے۔ اس تاج کو ان کے سر پر رکھا گیا۔

اس کے بعد انھوں نے اپنا پہلا شاہی حکم جاری کیا جس میں اپنے والد کے 69 سالہ دورِ حکمرانی کی طرح راست بازی کے ساتھ حکمرانی کرنے کا وعدہ کیا۔

یہ تاج پوشی ایک ایسے وقت میں کی جاری ہے جب ملک میں سیاسی صورتحال غیر یقینی کا شکار ہے۔ سنہ 2014 کے فوجی قبضے کے بعد پہلی بار 24 مارچ کو عام انتخابات کا انعقاد کیا گیا تھا لیکن ابھی تک نئی حکومت تشکیل نہیں دی گئی۔

بادشاہ کون ہیں؟

بادشاہ وجیرالونگ کورن، سابق تھائی بادشاہ بھومبول ایڈلیڈجج اور ملکہ سریکت کی دوسری اولاد اور پہلے بیٹے ہیں۔

انھوں نے برطانیہ اور آسٹریلیا میں تعلیم اور کینبرا کے رائل ملٹری کالج سے تربیت حاصل کی ہے۔ بعد میں وہ تھائی مسلح افواج میں ایک افسر بننے کے لیے شامل ہوئے اور وہ ایک اہل شہری اور لڑاکا پائلٹ ہیں۔

سنہ 1972 میں وہ ولی عہد اور تخت کے سرکاری وارث بنے۔ اب انھیں راما 10 یا چکری سلسے کے دسویں بادشاہ کا خطاب ملا ہے۔

ملکہ سوتھدا جو اب ان کی چوتھی بیوی ہیں، ان کے ذاتی سکیورٹی یونٹ کی ڈپٹی کمانڈر بھی ہیں۔ دسمبر 2016 میں انھیں مکمل جنرل کے عہدے پر ترقی دی گئی تھی۔

تاج پوشی کی تقریبات کیا ہیں؟

تاج پوشی کی تقریبات کا آغاز 10:09 پر کیا گیا، وہ مبارک لمحہ جب بادشاہ وجیرالونگ کورن نے پاکیزگی اور تیل ملنے کی رسومات کے لیے سفید رنگ کا لباس زیب تن کیا۔ اس رسم کے لیے مقدس پانی ملک بھر میں موجود 100 سے زائد مقامات سے اکھٹا کیا گیا۔

انھیں پانچ شاہی لوازمات پیش کیے جا رہے ہیں جو بادشاہت کی نشانی ہیں اور ان میں فتح کا عظیم تاج بھی شامل ہے۔

زیادہ تر براہمن اور بدھ مت کی تقریبات کا انعقاد سنیچر کے دن کیا گیا جبکہ تاج پوشی اور دیگر تقریبات پیر تک جاری رہیں گی۔

بادشاہ وجیرالونگ کورن سنہ 2016 سے تخت پر ہیں لیکن تھائی روایات کے مطابق انھیں تب تک زمین پر الہیٰ نمائندہ اور بدھ مت کا اہم سرپرست نہیں سمجھا جا سکتا جب تک انھیں پاک نہ کیا جائے۔

تھائی افراد اس موقعے پر کیسے جشن منا رہے ہیں؟

اتوار کے روز بادشاہ وجیرالونگ کورن دارالحکومت بینکاک کے پاس ایک جلوس میں حصہ لیں گے۔ جس کا مقصد لوگوں کو جشن منانے کا موقع فراہم کرنا ہے۔

اس تقریب اور پیر کے روز جب وہ بڑے محل کی بالکنی میں نظر آئیں گے، دونوں مواقع پر عوام کی ایک بڑی تعداد کی آمد متوقع ہے۔

بادشاہ وجیرالونگ کورن اپنا زیادہ تر وقت ملک سے باہر گزارتے ہیں اور اپنے والد کی طرح عوام میں زیادہ مقبول نہیں۔

جشن والے ہفتوں کے دوران سرکاری دفاتر کے لیے ان کی تصاویر لگانا لازم قرار دینے کے بعد سے ان کے بڑی بڑی تصاویر عمارات پر دیکھی جا سکتی ہیں۔

سول ملازمین کو بھی بادشاہ کے ساتھ منسلک پیلے رنگ کے لباس پہننے کے لیے کہا گیا تھا۔ عام تھائی افراد بھی بادشاہ کے ساتھ اپنی وفاداری ظاہر کرنے کے لیے پیلا رنگ پہنیں گے۔

سنیچر، 4 مئی کو ہونے والی اہم تقریبات

اتوار، 5 مئی

پیر، 6 مئی