نیوزی لینڈ: وزیراعظم جاسنڈا آرڈرن نے منگنی کرلی
،تصویر کا ذریعہGetty Images
نیوزی لینڈ کی وزیراعظم جسنڈا آرڈرن کے ترجمان کے مطابق انھوں نے اپنے پارٹنر ٹی وی میزبان کلارک گیفورڈ سے منگنی کر لی ہے۔
جوڑے کی منگنی کی خبر اُس وقت سامنے آئی جب جاسنڈا آرڈرن جمعے کو ایک تقریب میں ہیرے کی انگوٹھی پہنے نظر آئیں۔
مقامی ذرائع ابلاغ کے مطابق جاسنڈا آرڈرن اور کلارک گیفورڈ طویل عرصے سے ایک ساتھ ہیں اور ان کی ملاقات 2012 میں تقسیم انعامات کی ایک تقریب میں ہوئی تھی۔
تقریب کے دوران ایک زیر تربیت صحافی کی نظر ان کی انگوٹھی پر پڑی اور اُس نے وزیر اعظم کے دفتر سے اس بارے میں معلومات کے لیے رابطہ کیا۔ وزیر اعظم کی ترجمان نے بتایا کہ منگنی ایسٹر کے دوران ہوئی تھی۔
پچھلے سال جاسنڈا آرڈرن نے جوڑے کے پہلے بچے کو جنم دیا اور ہونے والی بیٹی کا نام 'نیو ٹی آروہا' رکھا۔
یہ بھی پڑھیے
،تصویر کا ذریعہGetty Images
جنوری میں بی بی سی کے ایک پروگرام میں جاسنڈا آرڈرن سے پوچھا گیا تھا کہ کیا وہ اپنے پارٹنر کو شادی کا پیغام دیں گی تو انہوں نے کہا کہ 'نہیں میں نہیں پوچھوں گی، میں چاہتی ہوں کہ وہ خود اس کرب سے گزریں اور مجھ سے یہ سوال کریں'۔
End of سب سے زیادہ پڑھی جانے والی
جاسنڈا آرڈرن خواتین رہنماؤں میں دوسری ایسی سیاسی رہنما ہیں جنہوں نے اپنے عہدے پر ہوتے ہوئے بچے کو جنم دیا۔ پاکستان کی دو بار وزیر اعظم رہنے والی بنظیر بھٹو پہلی خاتون رہنما تھیں جنہوں نے عہدے کے دوران بچے کو جنم دیا تھا۔
جاسنڈا آرڈرن نے کہا تھا کہ اُن کے ساتھی کلارک گیفورڈ گھر پر رہ کر بچے کی دیکھ بھال کریں گے۔ 'ریڈیو این زیڈ' سے بات کرتے ہوئے انہوں نے کہا تھا کہ 'میں بہت خوش قسمت ہوں'۔
انہوں نے مزید کہا کہ 'میرا ایک ایسا ساتھی ہے جو میرے ساتھ ہوتا ہے اور بچے کی پرورش میں اہم کردار ادا کر رہا ہے کیونکہ وہ بھی بچے کے والدین میں سے ایک ہے۔۔ وہ بچے کی آیا نہیں'۔
