آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دو ڈالر کی چوری اور پانچ سو ڈالر کا خرچ
اطلاعات کے مطابق تائیوان میں ایک خاتون کے خلاف اپنی روم میٹ کا دہی سے بنا ہوا مشروب چوری کرنے کا مقدمہ درج کیا گیا ہے۔ ان کی شناخت ڈی این اے ٹیسٹ سے کی گئی ہے۔
براڈکاسٹر ٹی وی بی ایس کے مطابق یہ مشتبہ خاتون جن کا نام ظاہر نہیں کیا گیا تائی پی میں ایک سٹوڈنٹ ہاؤس میں پانچ دیگر خواتین کے ہمراہ مقیم تھیں۔
گذشتہ ماہ ان کے ساتھ اس گھر میں رہنے والی ایک ساتھی کو لگا کہ ان کا 1.92 ڈالر کا دہی سے بنا مشروب ان کی اجازت کے بغیر پی لیا گیا ہے۔ انھوں نے کوڑے دان سے اس بوتل کو نکالا اور مجرم سے سامنے آنے کو کہا۔
جب کوئی بھی سامنے نہ آیا تو وہ اس بوتل کو پولیس کے پاس لے گئیں اور قانونی کارروائی کرنے کی درخواست کی جو پولیس نے قبول کر لی۔
اب یہ مشروب کی بوتل چونکہ نم تھی تو اس پر سے انگلیوں کے نشان حاصل نہیں کیے جا سکتے تھے تو اس مشروب کی مالک نے افسران سے اپنی ساتھیوں کے ڈی این اے ٹیسٹ کرنے کو کہا، تاکہ معلوم ہو سکے کہ کس پر الزام لگایا جائے۔
End of سب سے زیادہ پڑھی جانے والی
اس پر پولیس نے الزامات لگانے والی خاتون سمیت دیگر کو پولیس سٹیشن بلایا تاکہ ان کا فرانزک ٹیسٹ کیا جا سکے۔
چونکہ ہر ایک ٹیسٹ پر 98 ڈالر خرچ آتا ہے جو ٹیکس ادا کرنے والوں کی جانب سے فنڈڈ ہوتا ہے لہذا مقامی افراد نے شدید غصے کا اظہار کیا اور کہا کہ اتنے سے مسئلے کے لیے اتنا وقت اور پیسہ خرچ کیا گیا۔
ایک مقامی شخص لیو نے ایپل ڈیلی اخبار کو بتایا: ’یہ معاشرے کے وسائل کا ضیاع ہے۔ اگر میں پولیس اہلکار ہوتا تو میں اس خاتون کو ایک اور بوتل خرید دیتا۔‘
