ٹیکساس کے سکول میں فائرنگ، ہلاک شدگان میں پاکستانی طالبہ سبیکا شیخ بھی شامل

امریکی ریاست ٹیکساس میں شہر ہیوسٹن کے نزدیک سانتا فے ہائی سکول میں ایک طالبعلم کی فائرنگ سے پاکستانی طالبہ سبیکا عزیز شیخ سمیت دس افراد ہلاک جبکہ مزید دس زخمی ہو گئے ہیں۔

پولیس کے مطابق ہلاک ہونے والوں میں زیادہ تعداد طلبہ کی تھی۔

17 سالہ حملہ آور طالبعلم دیمیتریوس پگورٹزس کو حراست میں لے لیا گیا ہے۔

امریکن کونسلز فار انٹرنیشنل ایجوکیشن کی ویب سائٹ پر جاری پیغام کے مطابق کراچی سے تعلق رکھنے والی طالبہ سبیکا عزیز شیخ امریکی وزارت خارجہ کے کینیڈی لوگر یوتھ ایکسچینج پروگرام کے تحت اگست 2017 میں پڑھنے گئی تھیں۔

سبیکا نے نو جون کو واپس پاکستان آنا تھا مگر وہ جمعے کو دیمیترس کی فائرنگ کا شکار ہو گئیں۔

اس بارے میں مزید پڑھیے

'چھوٹی سی سبیکا شیخ کے بڑے بڑے خواب تھے'

’گولی چلنے کی آواز آئی تو جتنا ممکن ہوا تیز بھاگی‘

امریکہ: فلوریڈا کے سکول میں فائرنگ سے 17 ہلاک

’اب بہت ہو گیا، لوگوں کی حفاظت کرو بندوقوں کی نہیں‘

ریاست ٹیکساس کے گورنر گریگ ایبٹ نے کہا کہ 'مختلف قسم کا دھماکہ خیز مواد' سکول اور سکول کے نزدیک سے ملا ہے۔

انھوں نے مزید کہا کہ پولیس کو حملہ آور کی ڈائری اور اس کے کمپیوٹر اور موبائل فون سے مزید معلومات ملی ہیں جس سے یہ ظاہر ہوتا ہے کہ اس نے حملے کی پہلے تیاری کی تھی اور اس کا ارادہ تھا کہ وہ اس کے بعد خود کشی کر لے گا۔

گورنر گریگ ایبٹ نے کہا کہ ملزم نے 'خود کو پولیس کے حوالے کر دیا کیونکہ اُس میں خودکشی کرنے کی ہمت نہیں تھی۔'

حملہ کس طرح شروع ہوا؟

سکول میں موجود طلبہ نے بتایا کہ حملہ آور نے مقامی وقت کے مطابق صبح آٹھ بجے آرٹ کی کلاس میں داخل ہو کر فائرنگ شروع کر دی۔

مقامی میڈیا سے بات کرتے ہوئے ایک عینی شاہد نے بتایا کہ 'کوئی شخص بندوق لے کر کلاس میں داخل ہوا اور فائرنگ شروع کردی اور ایک لڑکی کو ٹانگ میں گولی لگ گئی۔'

ڈکوٹا شریڈر نامی طالبہ نے بتایا کہ فائر الارم بجنے کے بعد تمام طلبہ باہر کی جانب بھاگے اور 'باہر جاتے ہیں گولی چلنے کی آواز آتی ہے اور میں جتنا ممکن ہوا تیزی سے بھاگی تاکہ میں چھپ سکوں اور پھر میں نے اپنی ماں کو فون کیا۔'

حکام کے مطابق حملے کے وقت سکول میں 1400 طلبہ تھے۔

رد عمل:

امریکہ میں پاکستانی سفیر اعزاز چوہدری کی جانب سے ٹوئٹر پر پیغام میں سانٹا فے سکول میں ہونے فائرنگ کے نتیجے میں سبیکا شیخ اور دیگر ہلاک ہونے والوں کی موت پر اپنے افسوس کا اظہار کیا اور کہا کہ شہر ہیوسٹن میں پاکستانی کونسل جنرل حکام سے مسلسل رابطے میں ہیں۔

دوسری جانب امریکی صدر ڈونلڈ ٹرمپ نے ٹویٹ میں کہا کہ 'ٹیکساس کے سکول میں فائرنگ۔ ابتدائی رپورٹیں اچھی نہیں ہیں۔'

صدر ڈونلڈ ٹرمپ نے وائٹ ہاؤس میں ایک تقریب سے خطاب میں کہا کہ یہ ایک ہولناک واقعہ ہے۔

'میری انتظامیہ طلبہ کو محفوظ رکھنے کے لیے اور اسلحے کو ان ہاتھوں سے دور رکھنے کی ہر ممکن کوشش کرے گی جو دوسروں کے لیے خطرہ ہیں۔'

واضح رہے کہ دو ہفتے قبل نیشنل رائفل ایسوسی ایشن کی تقریب سے خطاب کرتے ہوئے صدر ٹرمپ نے ایک بار پھر مطالبہ کیا تھا کہ سکولوں میں اساتذہ کو اپنے ساتھ ہتھیار رکھنے چاہییں۔

یاد رہے کہ ٹیکساس سکول کی فائرنگ سے قبل فروری میں فلوریڈا کے ایک سکول میں پڑھنے والے طالبعلم نے فائرنگ کی تھی جس سے 17 افراد ہلاک ہوگئے تھے۔

امریکی اخبار واشنگٹن پوسٹ کے مطابق سال 2018 میں امریکی سکولوں میں امریکی فوج کے مقابلے میں زیادہ اموات ہوئی ہیں۔

سکولوں پر بڑے حملے