روہن کا بیٹنگ سٹائل چچا جیسا ہے

ان کے ٹیسٹ کرکٹ میں آنے کے دو مہینے بعد ہی سچن کے بڑے بھائی نِتن کے ہاں ایک بیٹے کی پیدائش ہوئی جس کا نام روہن تندولکر رکھا گیا۔

اور اب نوجوان تندولکر بھی اپنے چچا سچن تندولکر کی طرح قومی سطح پر کرکٹ کھیلنے کے لیے تیار ہیں۔

انڈین ایجوکیشن سوسائٹی کے نیو انگلش سکول، باندرہ کی طرف سے انجمنِ اسلام کے خلاف انڈر 17 ہیرس شیلڈ ٹورنامنٹ میں کھیلتے ہوئے روہن نے 73 رنز بنائے۔ یاد رہے سچن تندولکر کا بھی یہی پہلا سکول تھا۔

یہ روہن کی اس ٹورنامنٹ میں تیسری نصف سنچری تھی جس کی وجہ سے اب ان کی ٹیم فائنل میں پہنچ چکی ہے۔

1897 میں شروع کیا جانے والا ہیرس شیلڈ بھارت کا سب سے پرانا کھیلا جانے والا ٹورنامنٹ ہے اور اسی ٹورنامنٹ میں سچن تندولکر اور ونود کامبلی نے 1988 میں 664 رنز کی پارٹنرشپ بنائی تھی اور دونوں میں سے کوئی بھی آؤٹ نہیں ہوا تھا۔

29 جنوری کو پندرہ سال کے ہونے والے روہن تندولکر کا کہنا ہے کہ ’میں اپنے چچا سے متاثر ہوں‘۔

’انہوں نے مجھے بڑے مفید مشورے دیے ہیں، خاص کر میرے بیٹ پکڑنے کے طریقے اور بیٹنگ کے دوران کہنی کے استعمال کے ٹھیک طریقے کے متعلق۔‘

چچا سچن کی طرح روہن دائیں ہاتھ سے کھیلنے والے بلے باز ہیں اور کبھی کبھار آف سپن بولنگ بھی کرتے ہیں۔