عبدالرشید شکور بی بی سی اردو ڈاٹ کام ،کراچی

یہ بات جنوبی افریقی ڈاکٹروں کی رپورٹ میں سامنے آئی ہے۔

پاکستان کرکٹ بورڈ نے پاکستان کرکٹ ٹیم کے ٹرینر مرے اسٹیونسن اورفزیو ڈیرن لفسن کے مشورے پر عمر گل کو علاج کے لئے کیپ ٹاؤن بھیجا تھا۔

ماہرین نے پی سی بی کو بتایا ہے کہ عمر گل کی اسپائن میں تین اسٹریس فریکچر ہیں اور وہ کم ازکم ایک سال تک کرکٹ نہیں کھیل سکتے۔طبی ماہرین کا کہنا ہے کہ چھ ماہ بعد ان کی کمر کا دوبارہ معائنہ کیا جائے گا۔

عمرگل کمر کی تکلیف کے باوجود کرکٹ کھیلتے رہے تھے جو بھارت کے خلاف ہوم سیریز کے دوران شدت اختیار کرگئی تھی۔

عمرگل نے لاہور ٹیسٹ میں شاندار بولنگ کر کے پانچ وکٹیں حاصل کی تھیں لیکن اسی دوران خود ان کی کمر کی تکلیف میں اضافہ ہوگیا جو ان کے مستقبل کے لئے خطرہ بن گئی ہے۔

عمر گل نے پاکستان کی طرف سے پانچ ٹیسٹ کھیلے ہیں جن میں انہوں نے پچیس اور پندرہ ایک روزہ میچوں انیس وکٹیں حاصل کی ہیں۔