عبدالرشید شکور بی بی سی اردو ڈاٹ کام، کراچی

پاکستان کے چھ کھلاڑی کوارٹر فائنل تک پہنچنے میں کامیاب ہوگئے تھے (فائل فوٹو)

پاکستان کے پاس اٹھارہ سال کے بعد ورلڈ جونیئر ٹائٹل جیتنے کا سنہری موقع ہے تاہم سیمی فائنل میں ہی اسے یقینی کرلینے کا چانس اس نے اسطرح گنوادیا کہ مصر کے رامی آشور نے پاکستان کے فرحان محبوب کو شکست دیدی ورنہ سیمی فائنل میں پہنچنے والے چاروں کھلاڑی پاکستانی ہوتے۔

اس کا مطلب یہ ہے کہ ٹائٹل سے مصری کھلاڑی کو دور کرنے کی ذمہ داری اب عامر اطلس پر عائد ہوگئی ہے جو سیمی فائنل میں آشور سے مقابلہ کرینگے۔

چودہ سالہ عامراطلس ٹرائلز میں اچھی کارکردگی نہ دکھانے کے سبب چیمپئن شپ میں حصہ لینے والے چار رکنی پاکستانی اسکواڈ میں جگہ نہیں بناسکے تھے۔

لیکن انفرادی حیثیت میں کھیلتے ہوئے وہ اس چیمپئن شپ میں بھرپور فارم میں دکھائی دے رہے ہیں کوارٹرفائنل میں انہوں نے باسط اشفاق کو چارگیمز میں ہرادیا۔ باسط اشفاق نے پچھلے میچ میں ٹاپ سیڈ بھارت کے سورو گھوسل کو ہرایا تھا۔
رامی آشور نے کوارٹرفائنل میں ایشین جونیئرچیمپئن فرحان محبوب کو شکست دی۔

چیمپئن شپ کے دوسرے سیمی فائنل میں نمبردو سیڈ خالداطلس اور یاسربٹ مدمقابل ہونگے۔ خالد اطلس نے ہموطن شاہنواز کو اسٹریٹ گیمز میں ہرادیا جبکہ یاسربٹ نے مصر کے محمود عادل کے خلاف کامیابی حاصل کی۔