 |  ممتاز کھلاڑیوں نے ابھی تک اعلانیہ کچھ نہیں کہا |
برطانیہ کے کرکٹ کے اعلی حکام نے ان دعوؤں کی تردید کی ہے کہ کچھ ممتاز کھلاڑیوں نے زمبابوے کا دورہ نہ کرنے کا فیصلہ کر لیا ہے۔ قبل ازیں ایک اخبار نے یہ اطلاع دی تھی کہ سات کھلاڑیوں کو انگلینڈ اور ویلز کے کرکٹ بورڈز نے اپنے فیصلوں کے بارے میں خاموش رہنے کی ہدایت کی تھی۔ انگلینڈ کرکٹ بورڈ نے اپنے ایک بیان میں کہا ہے کہ کھلاڑیوں کو اس انداز میں منع نہیں کیا گیا جیسے اخبار میں شائع ہوا ہے۔ انگلینڈ کرکٹ بورڈ اور کھلاڑیوں کے نمائندوں نے کھلاڑیوں سے اپنا فیصلہ موخر کرنے کو کہا ہے۔ اخبار ’نیوز آف دی ورلڈ‘ کے مطابق اینڈریو فلنٹوف اور سٹیو ہارمیسن ان سات کھلاڑیوں میں شامل ہیں۔ اخبار کے مطابق صرف کپتان مائیکل واگن نے دورے کے لئے رضا مندی ظاہر کی ہے۔ کھلاڑیوں کی یونین کے صدر رچرڈ بیون نے اخبار کو بتایا کہ ان کی تنظیم نے کھلاڑیوں پر بیان دینے سے پابندی لگانے سے اتفاق نہیں کیا۔ لیکن ان کی تنظیم کے مطابق کھلاڑیوں کو اس وقت تک اس معاملے پر تبصرہ کرنے سے گریز کرنا چاہیے جب تک کرکٹ بورڈ اس کا کوئی حل نہیں نکال لیتا۔ تاہم انگلینڈ کرکٹ بورڈ کے صدر ڈیوڈ مورگن نے کہا ہے کہ کھلاڑیوں کو دورہ کرنے پر مجبور نہیں کیا جائے گا۔ زمبابوے کی ٹیسٹ میچوں کی رکنیت زمبابوے کرکٹ بورڈ کے چند ممتاز کھلاڑیوں کے ساتھ جاری ایک جـھگڑے کی وجہ سے معطل ہے۔اس کے باوجود انگلینڈ اس سال زمبابوے کے ساتھ پانچ ون ڈے انٹرنیشنل کھیلے گا۔ | 
یہ صفحہ دوست کو ای میل کیجیئے
پرِنٹ کریں
